1 Korin 6:9 - Hano Niu Testamen

⁹ Nam bev mwasigi lalai kimiu be atatu ram lalaḡo bahala rasav haḡo te dum houn ute Ratahigi non God. Gosav dadaloiga tehe. Kera gabe ram bulu alun rebehin vavine mai atamwani ram buroga gin bwatigoron lagiana ram ḡogonai nunu buhiga take ram bulbulu alun rebehin lagiana sage ira atamwani gabe ram bol mulei rebehin atamwani dolua ram bulu maia,

1 Korin 6:9 ပူးပေါင်းရင်းမြစ်များ

Matiu 19:29

I mulei kera gabe ram derai imwara, sa ira tuara, sa ira hogosira, sa ira tamara sa ira ratahira, sa ira nitura, sa ira bilara talu huriau, kera gea rav lai liu vavudolua. I rav haḡo rahuana vai tuai.

Matiu 25:34

Haḡe inau siboku Ratahigi Lavoa nai vevea lalainira la mwatuaku be, ‘Gin mai, na kimiu gabe Tamaḡu nu vatavuhai kimiu. Gin mai ba lai rahuan gara gabe Tamaḡu nu lol vatuvwainia huri kimiu la bwatun tauva.

Leo Tavuha gabe Luk nu Ravae 21:8

Haḡe Jisas mwa bwaliura mwa bevea be, “Giv gitaḡoro; nin ruruhiana. Bwatuna atatu ivusi rav mai lol ihaku rav vevea be, ‘Inau haḡea! Mahavana mwa mai haḡea!’ Take gisav hurira tehe.

Lalaḡova 20:32

“I kadogaha nam lin̄ kimiu ta aten muramura non God i gin avoana huri non hogoi, gabe vi lol kimiu giv mauri wasigi, i vi lai lalai kimiu vatavuha God mwa laia huri non sinombu.

Lalaḡova 24:25

Take mahavana be Pol mwa bev rahurahuinia, mwa avo alun haltavuha, i halan tomuai, i gubwen̄in maiana huri vevegi, kunia Vilikis mwa matagu mwa bevea be, “Nu tavuha be gov mwalue haḡea kadogaha. I nav siv uloi te muleinigo be vi dumwi.”

Ravrava non Pol lalai ata Rom 1:18

God mwa seserai lua non lol horo nin ute atamare lalai ira vui son̄son̄o duluai i hal lete be sinombu ram lolia. Mai nora vui son̄son̄o sibora be ram rahu maia ram dahuli mwasigi.

1 Korin 15:33

Gisav taltale tehe. “Mwemwearuv hantai vi lol bwarebware alen̄an mwemwearuva.”

1 Korin 15:50

Nam bevea kungeki ira tuaku, Rebehi i daga tanora sigai lol ute ratahigi non God. Rebehi be vi mate dumwi, si hav lai te dum rahuana be mosmosianana nu sigai. Take gitae! Nav vev ginau dahuligi geki lalainigo: Tasav maturu te n̄oto lol mateana, take tav leahi n̄oto.

1 Korin 3:16

Matuke gim hav iloe tehe be kimiu imwa tataro non God i be kunia Vui Sabuga non God mwa dogo alolomiu.

1 Korin 5:1

Mwasigi mwa beveana kunia be vuro lol davolamiu alun rebehi mai rebehi nu hav tavuha tehe, i ira len̄len̄aga ram hav lolia tehe kunia. Atatu vwate aia mwa lai mulei tasalan tamana.

1 Korin 5:10

Take nam hav vevea te gin binihiva be gosav bulbulu te maira be ata lol ureure geki be ram buroga rebehi mai rebehi, sage mai ira bugurana, sage susurana, sage maira be ram ḡogonai nun vatu. Be gomen mwalue ninira mwa du be gov lin̄ ureure geki.

1 Korin 5:11

Nam ravrava geki be namen vevea lalainigo be gosav bulbulu te maira be ram uloinira sibora be binihimwasigi lol Kraes take ram buroga lol rebehi mai rebehi, sage ram bugura, sage ram susura, sage ram ḡogonai nun vatu, sage ram sani atat dolua gin nora avoana, sage ram mwin wai taltale, sage ram ruruhi atat dodolua. Mwa du be gosav gan te ginau mai sinombu be kera kunia.

1 Korin 6:10

i kera gabe ram bugura i ram sura, i ram mwin wai taltale, i ram duli tenteneana vai la atat dodolua, sage ram sura atatu kera geki rasav haḡo te dum houn ute Ratahigi non God.

1 Korin 6:18

Haḡe kunia gov rov maragai nin bwatigoron rebehi mai rebehi. Bwatigoro dodolua duluai gabe sinombu mwa lolia kea dagai avare nin rebehi, take kera n̄an gabe ram buroga mai bwatigoron rebehi be nu hantai mai mwasin rebehira sibora.

1 Korin 6:19

Mwa du maragai be gov iloe be rebehimwa kea imwa tataro non Vui Sabuga gahena mwa dogo alolomwa. Gon lai Vui Sabuga huba nin God. Haḡe kunia giḡo gom hav mom bora te bilamwa sibomwa,

1 Korin 9:24

Gom iloe be lol taron rovoana, atatu n̄oto rav rovo take atatu n̄an gaituvwa be vi lai tabeana. Haḡe giv rovo huribe giv lai tabeana gea.

2 Korin 12:21

Nan hen matagu be batena be nam mai vai abemiu mulei, noḡu God vi lolia nai busbusi lol matamiu. Bisata nav ron̄ mwahantai ginia ivusi be ram lol bwatigoro bwatun be ram hav leahi te rahura sa be rai van burigai nin bwatigoro be ram bulu gin rebehira i ginau ivusi be ram lolia.

Kelesia 6:7

Gisav taltale tehe: Gisav saruruhi te dum God. Atatu ram lai mwasin hano n̄ano be ram rivua.

Kolosi 3:5

Giv tau kaburai ginau hantai duluai lol rahumiu: vuro lol alen̄ bwatigoro, lolian daltalei gom lin̄ binihiv taltale mwa domuainigo, gon doron ginau lete, i ginau ravravwega i bugurana (huribe bugurana kea dovon̄an gogonaiana lalai tagaro dodolua).

Hibru 12:14

Giv lol ron̄oe be giv togo lol tamwata lolmatan sinombu, i giv togo lol rahuan gogona. Be gosav haḡo te alen̄a geki, gosav gita te dum God.

Hibru 12:16

Giv gita ḡoro tavuhai be vwate nin kimiu sihav vora te kun Iso, be rahuna nu hav vavtutu tehe, i mwa hav vinihi te dum God mulei. I kea mwa salei non tanon tuagai mai non roso. Take volin non tanon tuagai mai roso duluai gina ganiana n̄an vuroi, be kea nu gania vatuvwa mamaha.

Hibru 13:4

I atatu duluai rai vinihi marahi silon lagiana, ira ahoai mai ira tasalai, giv togo bavtutu hurin silon lagiana gingin kimiu. God vi vevegi ihei tehe gabe ramuru sura be lagiana sigai, i ahoai mai tasalai be vwate mwa sura mai atatu dolua.

Jemes 1:16

Ira tuaku be nam dabe kimiu gisav vora te kun taltaleana huria.

1 Jon 3:7

Giv gitaḡoro be ata dodolua rasav saruruhi te kimiu. Ihei gabe mwa lalaḡo bavtutu, kun gabe Kraes kea atat vavtutu.

Visirai 21:8

Take nai vevea lalai kimiu huri havanau be vi loli lalai ihei tehe be ram matmatagu; i lalainira be ram lol salil silo, i lalai ira hei be ram lol alen̄ bibili, sage ram wehiwehi bonogai, sage hovita lol bwatigoro, ira hei gabe ram lalaḡoi mateana i mera, i lalai nira be ram ḡogonai nun vatu dodolua, i lalai ira tenteneana. I vi vohainira gea vai lol numbun wain gabi tabwalue mai salva, geki gairuan mateana.”

Visirai 22:15

Take atatu be ram lalaḡo hantai, ira vwiriu meto, gabwaleva i ira atat bwatigoro, i kera be ram gogonai nunu buhiga, maira duluai be ram doron be ramen tentene tagaro i ramen togo deḡeteḡe tagaro.