Geki haḡea ginau dahuligi gea: be sivi Roroi Tavuha, ira Lolobon̄i rav bulu mai ira Jius lol vatavuha non God. Kera bilan rebehi n̄an gea, i ram bulbulu utegaituvwa lol tatauleo be God mwa lolia lol Kraes Jisas.
Rebehi duluai mwa du alun Kraes, i ira mavuvun rebehi duluai ram dari i ram bulbulu n̄an utegaituvwa. Vataha mavuvu duluai mwa lalaḡoi mwasin non rovoga be men lol rebehi duluai be vi mauri wasi mai lolotabetabe.”
Ram hav tu te wasi la Kraes, gabe bwatbwatuna. Kraes kea bwatun rebehi. Kraes kea mwa bwalao rebehi n̄oto. Mwa ban̄an rebehi i mwa haḡo bulbulua ute gaituvwa mai ira hui i ira wesi. Rebehi gea mwa mauri la halana be God mwa doronia be vi mauri.
Lol rahuan gara ginau vwate nu hav dolua tehe lol davolan ira Lolobon̄i mai ira Jius, kera gabe ran tav dovon̄ara i kera gabe ran hav tav te dovon̄ara, ira tausala sage ira len̄len̄aga, ira turi i ira mwaribwesi. Take Kraes kea lol ginau n̄oto, i Kraes mwa dogo lol ginau duluai.
Gov lin̄ tamwata gabe Kraes mwa laia vi vwalau binihimwa, bwatuna be nu uloi kimiu duluai vai lol rebehi gaituvwa be giv haḡo tamwata. Giv lai avkariana vataha mahavana.