ZEKARIA 1:3 - Pathien Lekhabu Inthieng (BSI)

³ Chuleiin, nangin an kuomah, Lalpa chun, hieng hin a tih tiin hril rawh: Sipaihai Lalpa chun, ka kuomah hung kîr ro, a tih; chuongchun, in kuomah hung kîr vêng ka tih, sipaihai Lalpa chun a tih.

ZEKARIA 1:3 ပူးပေါင်းရင်းမြစ်များ

2 CHANCHIN SUINA 15:2

Asa chu tuok dingin a va fe suok a, a kuoma chun, “Nangni Asa le Benjamin le Juda ram po pohai, mi lo ngai ta u; a kuoma in um sûng po chun Lalpa chu in kuomah a um a; chun, ama chu in zawng chun in ihmuin um a ta; amiruokchu, ama chu in nghatsan chun nghatsan vêng a ti cheu.

2 CHANCHIN SUINA 15:4

amiruokchu, an rimsiknaa chun Israel Pathien Lalpa kuom tieng chun an kîr nâwk a, ama chu an zawng a, an hmu a ni kha.

NEHEMIA 9:28

Nisienlakhawm, râlmuonga an hung um hnung chun i mithmuah thil ṭha naw an thaw nâwk el a: chuleiin, an hmêlmahai kutah i pêk a; chuongchun, an chungah thu an nei a; nisienlakhawm, an hung inleta an ko lai che khan vâna inthawkin i lo ngai a; vawi tamtak i zainêmna chun i sansuok a.

JOB LEKHABU (THE BOOK OF JOB) 22:23

Iengkimthawthei kuomah i kîr nâwk chun, tung ding nîng i ta, I puon inhaia inthawka fel nawna chu hlatakah i sie hmang phawt chun.

ISAI 31:6

“Aw Israel thlahai, nasataka in helsan tieng chu ngha nâwk ta ro.

ISAI 44:22

In bawsietnahai chu sûm sâmup sukboin ka sukbo ta a, in suolhai chu sûm sukbo angin ka sukbo ta bawk a; ka kuomah hung kîr nâwk ro, kân tlan ta si cheu a.

JEREMIA 12:15

Anni ka hmalthlâk hnunga chun hung kîr nâwk ka ta, an chungah lunginsietna nei ka tih; chun, mi tin chu mâni rochan senga chun hung ṭhuoi nâwk ka ta, mi tin chu mâni ram senga chun.

JEREMIA 25:5

‘Mi tin el chu tuhin in thilthaw indik nawhaia inthawk le, mâni lampui suola inthawk chun kîr seng unla; nangni le in thlatuhai kuoma inhma le kumkhuoa dinga, Lalpain ram a pêk cheua chun chêng ro;

JEREMIA 3:1

“Mîn a nuhmei a mâk a, amanu chun a suoksan a, pasal dang nuhmei a hung ni ta chun, ama chu, chu nu kuoma chun a kîr nâwk ding am a nih? Chuong a ni chun chu ram chu nasataka sukpawrche a ni naw ding maw? Nang khawm chu, ngaizâwng tamtakhai le chun nawchizawr angin i lo khawsa ta a, ka kuomah i la hung kîr rawp ding a ni? Lalpa chun a tih.

JEREMIA 3:22

“Hnungtawl thlahai, hung kîr ro; in hnungtawlnahai chu lo sukdampêk ka ti cheu.” “Ngai ta, i kuoma chun kan hung ie, nang chu Lalpa kan Pathien chu i ni si a;

JEREMIA 35:15

Chun, zîngkâra thoa anni hung tirin, ‘Mi tin chu mâni lampui suola inthawk chun hung kîr unla, in thilthawhai chu siemṭha unla, pathien danghai chu an rawng bâwl dingin zui bawk naw ro, chuongchun, nangni le in thlatuhai kuoma ram ka ipêk cheua hin chêng in tih,’ tiin, ka siehlaw zâwlneihai po po chu in kuomah ka hung tir a; nisienlakhawm, in nâ khawm in sit naw a, ngai khawm in mi ngai naw kha.

JEREMIA 4:1

“Aw Israel, i hung kîr chun, Lalpa Pathien chun a tih: ka kuomah i hung kîr ding a nih; i tirdakumnahai chu ka mithmua inthawka i sie hmang chun nang chu sukchângin um naw ti nih;

EZEKIEL 18:19

Amiruokchu, nang chun, iengdinga naupa chun pa suolna chu a phur nâwm a na? i ti a ni thei a. Naupa chun dân ang le thil indik chu a thaw pha chun, ka thuruothai chu a pawm bawk a, a thaw bawk chun, hring ngei a tih.

EZEKIEL 18:31

In bawsietnahai po po, in lo bawsiet tahai chu, nangnia inthawkin peihâwn unla, thlarau thar le lungril thar insiempêk unla, aw Israel sûngkuo, iengdingin am thîng in ta?

EZEKIEL 18:32

Mi thinaa chun lâwmna ka nei si naw a, Lalpa Pathien chun a tih, chuleiin, hung kîr unla, hring ro,” tiin.

EZEKIEL 33:11

An kuoma chun, ‘Ka hring zing angin, Lalpa Pathien chun hieng hin a tih; mi rilo thinaa chun lâwmna ka nei naw a; mi rilo chu a um dân a bânsan a, a hring ruok chun lâwmna ka nei a; hung kîr ro, in lampui suola inthawk chun hung kîr ro; aw Israel sûngkuo, iengdingin am thîng in ta?’ ti rawh.

HOSEA 14:1

Aw Israel, Lalpa i Pathien tienga chun kîr nâwk rawh, I rîtlona lei ngei chun i tlu ta hi.

HOSEA 14:4

An hnungtawlna hi sukdam ka ta, Annia inthawka ka lunginsenna chu ân kieng ta leiin, Anni chu ka hmangai hrim hrim ding a nih.

HOSEA 6:1

“Hung ta u, Lalpa kuomah kîr ei tiu, A mi kei nâwi taa chu a mi lo sukdam nâwk ding a ni si a, A mi lo vuok ta nâka chu a mi tuom nâwk ding a ni si a;

JOEL 2:12

Lalpa chun, “Chuong sa khawmin tuhin in lungril po poin, bu ngheiin, ṭapin, lungngaiin keia tieng hung ngha unla;

MALAKI 3:7

“In thlatuhai hunhaia inthawkin ka thupêkhaia inthawk chun in inher hmang a, in lo pawm ta naw a. Ka kuomah hung kîr unla, kei khawm in kuomah hung kîr ka tih, sipaihai Lalpa chun a tih. Nangni hlak chun, ‘khâwtieng am hung kîr kan ta?’ in ti lem a.