THILTHAWHAI 7:5 - Pathien Lekhabu Inthieng (BSI)

⁵ Chun, hitaka hin chu iengkhawm hmun hluo ding, a ke innghatna khawp khawm a pêk naw a; nisienlakhawm, ama le a hnunga a thlahai chena ro dingin pêk a tiem a, nau a la nei hma ngei khawmin.

THILTHAWHAI 7:5 ပူးပေါင်းရင်းမြစ်များ

INṬANNA 12:7

Chun, Lalpa chu Abram kuomah ân lâr a, “Hi ram hi i thlahai kuomah la pêng ka tih,” a ti a; chuongchun, chutaka chun a kuoma inlâr Lalpa ta ding chun maichâm a siem a.

INṬANNA 13:15

i ram hmu po po hi i kuoma le i thlahai kuomah kumkhuoa dingin ka pêk ding che a nih.

INṬANNA 15:18

Chu ni chun Lalpa chun, “Hi ram hi Aigupta vadunga inthawka vadung lientak (Euphrates vadung) chenin i thlahai kuomah ka pêk tah.

INṬANNA 16:2

Chun, Sarai chun Abram kuomah, “Ngai ta khai, Lalpain nau a mîn neitir phal naw hi, lunginsiettakin ka suoknu hi pâwl el rawh; amaa inthawk chun nauhai ka nei duoiin,” a ti a. Chuongchun, Abram chun Sarai thu chu a zâwm ta a.

INṬANNA 17:8

Chun, i kuoma le i hnunga i thlahai kuoma chun, i khuolchâmna ram, Kanaan ram po po hi, kumkhaw ro dingin ka pêk ding cheu a nih; chun kei hi an Pathien nîng ka tih,” a ta.

INṬANNA 23:4

“Nangni lai mikhuol le inpêm el ka ni a; ka mithi ruong hi ka phûm hmang theina dingin nangni lai hin inphûmna hmun ding ram mi pe ro,” a ti a.

INṬANNA 26:3

Hi rama hin um hri phawt la, chuongchun, i kuomah um ka ta, mal ka sâwm ding che a nih: hieng ram po po hi i kuoma le i thlahai kuomah pein i pa Abraham kuoma kân khâmna kha ka sukdet ding a nih.

NEHEMIA 9:8

chun, a lungril chu i hmaa chun ringumin i hriet a; Kanaan mihai, Hit mihai, Amor mihai, Periz mihai, Jebus mihai, Girgas mihai ram chu ama kuoma pe dingin, a thlahai chena pe dingin thu i thlung a; chun, i thu chu i hlen bawk a, feltak i ni si a.

EZEKIEL 33:24

“Mihriem naupa, Israel rama hmun se tahai hluotuhai chun thu an hril a, ‘Abraham chu pakhat chau a na, ram chu a lo hluo ta a; eini hlak chu tamtak ei na, ram chu hluo dinga pêk ei ni tho a,’ tiin.

DÂN PAHNINA 10:11

Chun, Lalpain ka kuomah, ‘Tho la, mipuihai hma ṭhuoi rawh; anni pêk dinga an pi le puhai kuoma inkhâma ka tiem ram chu an hluo ding a nih,’ a ti a.

DÂN PAHNINA 11:9

nênetui le khuoizu luongna ram, in pi le puhai le an thlahai pêk dinga Lalpain ṭawng a lo inkhâmna tah rama chun in chêng sâwt theina dingin.

DÂN PAHNINA 2:5

Anni chu thaw naw ro. An ram chu a khâwlai khawm kephaa sir khawp chau khawm ka pêk naw ding cheu a nih; Seir tlâng chu ama chanpuol dingin Esau ka pêk tah a nih.

DÂN PAHNINA 34:4

Chun, Lalpain a kuomah, “Hi ram hi a nih, Abraham hai, Isak hai, Jakob hai kuoma, ‘In thlahai la pêng ka tih,’ tia inkhâma ka lo tiem kha; a hmu chu kân hmutir phawt che a na; nisienlakhawm, chutaka chun fe naw ti ni,” a ta.

DÂN PAHNINA 9:5

In fel leiin amanih, in lungril indik leiin amanih an ram chu in hluo ding a ni naw a, hieng hnamhai suol lei le Lalpa in pu Abraham hai, Isak hai, Jakob hai kuoma ân khâmna thu suknghet dingin Lalpa in Pathienin anni chu a hnawt suokpêk ding cheu a ni lem.