ṬAP HLA 2:14 - Pathien Lekhabu Inthieng (BSI)

¹⁴ I zâwlneihai hlakin invêtna le teplo mei mei thilhmulâwkhai chu an hmupêk che a; I sal nina hung lakîr dingin, i suolna hlak an hmusuok thei si naw a. Nanga ta dingin hlêmna le, teplo thu mei mei chau chu an hmupêk che a.

ṬAP HLA 2:14 ပူးပေါင်းရင်းမြစ်များ

ISAI 58:1

“Inringtakin khêk rawh, indawi naw rawh, tawtawrâwt angin i râwl insuo tuor tuor la, ka mihai kuomah an bawsietna chu hril la, Jakob sûnghai kuoma chun an suolnahai chu hril bawk rawh.

JEREMIA 2:8

Thiempuhai khawm chun, “Lalpa kha khaw lai am a um a?” khawm an ti naw a; dân hmangtuhai hlak chun an mi hriet bawk nawh: rorêltuhai khawm chun ka chungah an bawsiet a, zâwlneihai khawm chun Baal hmangin thu an hril a, thil a hlâwkna um dêr lohai chu an hnawt ta lem a.

JEREMIA 20:6

Chun, nang Pashur le i ina chênghai po po chu sala ṭhuoiin um in ta; Babulona chun fêng i tih; chutaka chun thîng i ta, chutaka phûm chu nîng i ta, nang le i ruolhai po po an kuoma thu indik lotaka i lo hril hlakhai le chun,” tiin.

JEREMIA 23:22

Nisienlakhawm, ka rorêlnaa lo ngîr ta chu ni hai sienla, ka mihai chu ka thuhai chu inhriettir an ta, an thilthaw suolhaia inthawk le, an lampui suolhaia inthawk chun inkîrtir tâng an tih.

JEREMIA 23:36

Chuongchun, Lalpa phurrik chu hril ta ngai naw ti niu a, mi tin ta dingin ama thu ngei chu a phurrik a ni ding leiin; Pathien hring thuhai chu in lo fe kawipui ta si a, ei Pathien sipaihai Lalpa thu chu.

JEREMIA 28:15

Chun, zâwlnei Jeremia chun zâwlnei Hanania kuoma chun, “Hanania, tuhin lo ngai ta, Lalpa chun nang a tir naw che a, nisienlakhawm, hi mipui hi khêlthu chu în ringtir a ni hi.

JEREMIA 29:21

Ka hminga in kuoma thukhêl hriltu Maaseia naupa Zedekia chung thua le, Kolaia naupa Ahab chungthua chun Israel Pathien, sipaihai Lalpa chun hieng hin a tih: Ngai ta u, anni chu Babulon lal Nebukadnezzar kuta chun pe suok ka ta, ama chun in mithmuah anni chu that a tih;

JEREMIA 37:19

I zâwlneihai, ‘Babulon lal chun hi ram amanih, nang amani khawm hung do naw ni,’ tituhai kha khaw lai am an um a?

JEREMIA 5:31

zâwlneihai chun indik lotakin an lo hrillâwk a, thiempuhai hlak chun anni thu ang angin ro an lo rêl ta a, ka mihai hlak chun, chuong chu nei an lo châk bawk si a: a tâwpa chun ieng am thâw tâng i ta?

ṬAP HLA 4:13

A zâwlneihai suolnahai le a thiempuhai khawhlona, A sûnga mi fel thisen an insuona lei khan a nih.

EZEKIEL 13:22

Mi fel lungril ka suklungngai naw chu thukhêla in suklungzîng tâk leiin mi rilo kuthai khawm in lo sukhrât ta a, a lampui rilova inthawka a kîr nâwk nawna dingin hringna thu in tiem a;

EZEKIEL 22:25

Sakeibaknei inrûmin a sa fâk ding ân rûm khum angin, a sûnga chun a zâwlneihai chu phierrûkna a um a; mi tin hringin an fâk zo a, thil hluhai le thil rohai chu an lâk a, a sûnga chun hmeithai tamtak an siem a.

EZEKIEL 22:28

Chun, a zâwlneihai chun an kuoma aisân inkhêlhai le, teplohai chu hmuin anni ta ding chun chirhak sukhnâk lo chun an chârkhum a; Lalpain thu a hril naw sa khawma, Lalpa Pathien chun hieng hin a tih, an ti a.

EZEKIEL 23:36

Chu nawa khawm chun Lalpa chun ka kuomah a hril a, “Mihriem naupa, Ohola le Oholiba chungthu hi i rêl ding am? an tirdakumnahai chu anni hril la.

HOSEA 9:7

Hremna nihai chu a hung tlung a, Thungna nihai chu a hung tlung ie! Israel chun chu chu hrieng a ta; I rîtlona chu a tamin intaina a tam leiin. Zâwlnei chu ân vêt a, thlarau mi chu ân hâi a nih.

MIKA 2:11

Mumal neilo le indik nawtaka, “Uoin le zu chungchang thu i kuomah hril ka tih,” tia miin khêl a hril chun hieng mihai zâwlnei hi ni chau a tih.

MIKA 3:8

Nisienlakhawm, Jakobhai kuoma an bawsietna inhriettir dingin le, Israelhai kuoma an suolna inhriettir dingin Lalpa thlarau leia thilthawtheina dâm, rorêlna dâm le hrâtna dâm chun ka sip takzet a nih.

ZEPHANIA 3:4

A zâwlneihai khawm chu mi ngaisam le mi khawhlo an na, a thiempuhai hlak chun hmun inthieng chu an sukpawrche ta a, dâna chun inpâwngnêkna chu an hmang ta a nih.