NAMBAR 22:38 - Pathien Lekhabu Inthieng (BSI)

³⁸ Balaam chun Balak kuomah, “Ngai ta, hi ka hung ta a, nuom nuom hril theina ka nei am a nih? Pathienin ka bâua thu a sie chau ka hril ding a nih,” a ta.

NAMBAR 22:38 ပူးပေါင်းရင်းမြစ်များ

1 LALHAI 22:14

Mikaia ruok chun, “Lalpa hringna sâlin ka hril a nih, Lalpain ka kuoma a hril chu a nih ka hang hril ding chu,” a ta.

1 LALHAI 22:16

Chun, lal chun a kuomah, “Thutak ngawt naw chu Lalpa hminga ka kuoma hril lo dingin vawi iengzât rau am ṭawng kân khâmtir ding che a ni leh?” a ta.

2 CHANCHIN SUINA 18:13

Mikaia chun, “Lalpa chu a hring zing a, ka Pathienin a hril chu, chu chu ngei chu hril ka tih,” a ta.

INPÂKNA HLABU 33:10

Lalpain hnam tin remruot chu iengkhawm ni lovah ân changtir a, Mi tin ngaituohai chu iengkhawm ṭhathnemna nei lovin a siem hlak.

INPÂKNA HLABU 76:10

Matheilovin mihriem lunginsenna hin la hung inpâk ngei a ti che, Lunginsenna mahla chun inkhit i tih.

THUVARHAI 19:21

Mihriem lungrila chun remruotna tamtak a um a, Amiruokchu, Lalpa thurâwn chau chu ngîrsuok a tih.

ISAI 44:25

Kei hi khêlhliphai inchiknahai chu teplova siem a, aisânthiemhai invêta siemtu, mi varhai innghat kîrtir a, an hrietna invêtthlâka siemtu,

ISAI 46:10

keiin a tâwp ding chu a tira inthawk hrimin ka hril hlak a, thil la thaw nawhai chu tienlaia inthawk khan ka hril ta hlak; “Ka remruot chu ngîrsuok a ta, ka dit zâwng po po chu thaw vawng ka tih,” ka ti a,

ISAI 47:12

În vêngna le i dâwi hmangna, i naupangtea inthawka în suksâwl hlaknahai chu ngîrpui ta la; i ṭhathnempui thei ding phawt a, i hnepui thei ding phawt chun.

NAMBAR 22:18

Balaam ruok chun Balak mihai chu a dawn a, an kuomah, “Balak chun a in tangka le rângkachaka sip hi mi pe ding ni sienkhawm, ieng iengkhawm Lalpa ka Pathien thu bawsein ka thaw thei nawh.

NAMBAR 22:37

Balak chun Balaam kuomah, “Ṭhahnemngaitakin ko ding chein mi ka hung tir a ni naw am a nih? Ieng dinga ka kuomah hung nuom lo am i na? Mi ropui takah ka siem thei che a ni naw am a nih?” a ta.

NAMBAR 22:39

Chuongchun, Balaam chu Balak kuoma chun a fe ta a; Kiriath-buzoth an va tlung ta a.

NAMBAR 22:8

Ama chun an kuomah, “Vawizân chu hitaka hin riek unla, Lalpain a mi hril ang angin in kuomah thu hung intlun ka tih,” a ta: chuongchun, Moab mi lienhai chu Balaam kuoma chun an riek ta a.

NAMBAR 23:16

Chun, Lalpain Balaam chu a lo intuokpui a, a bâua chun thu a sie a, Balak kuoma chun kîr nâwk ta la, a kuomah va hril sâwng rawh, a ta.

NAMBAR 23:26

Nisienlakhawm, Balaam chun a dawn a, Balak kuomah, “Lalpain a hril po po chu ka thaw ngei ding a nih, tiin ka hril che a ni naw am a nih?” a ta.

NAMBAR 24:13

‘Balak hin a in chu tangka le rângkachaka sipin mi pe ding ni sien khawm, a ṭha tieng amanih, a se tieng amanih, keia lungril puoksuok chun Lalpa thu bâk chu iengkhawm ka thaw thei nawh; Lalpain a hril ta phawt chu hril ka tih,’ tiin.