MIKA 6:4 - Pathien Lekhabu Inthieng (BSI)

⁴ Aigupta rama inthawk chun ka ṭhuoi suok cheu a, suoka inthawkin kân tlansuok cheu a, in hmaah Mosie hai le, Aron hai le Miriam hai ka hung tir kha.

MIKA 6:4 ပူးပေါင်းရင်းမြစ်များ

2 SAMUEL 7:23

Aigupta rama inthawk le hnam tin le an pathienhaia inthawka i ta dinga în tlansuok, i mihai hmaa i ta dinga thil ropuitak le i ram ta dinga thil ṭiumtak thaw ding le ama hming ropuitak siem dinga Pathienin ama mihai ni dinga a hung intlansuok i mi Israelhai ang hrim hrim hi khawvêla hin hnam dang tu am an um a?

INPÂKNA HLABU 77:20

Mosie le Aron kutin, I mihai chu berâm ruol angin i ṭhuoi hlak.

FESUOKNA 12:51

Chu ni ngei chun Lalpa chun Israel mihai chu an pâwl ruol ang peiin Aigupta rama inthawk a ṭhuoi suok ta a.

FESUOKNA 20:2

“Lalpa in Pathien, Aigupta ram, suok in nina ina inthawka ṭhuoi suoktu cheu ka nih.

FESUOKNA 3:10

Chuleiin, hung ta, Israel mihai chu Aiguptaa inthawka i hung ṭhuoi suok theina dingin Pharao kuomah tir ka ti che,” a ti a.

FESUOKNA 4:10

Mosie chun Lalpa kuomah, “Tuhin le a hma khawmin, i siehlaw kuomah thu i hung hril chena khawm, mi danginnâl ka ni naw a, ṭawng muongtak le danginâwk ka ni si a,” a ti a.

FESUOKNA 4:16

Ama chu i ta dingin mipuihai kuoma thuhriltu nîng a tih; ama chu i ta dingin bau nîng a ta, nang chu a ta dingin Pathien ang nîng i tih.

FESUOKNA 6:27

Hi Aron le hi Mosie hi an nih Aigupta lal Pharao kuoma Israel mihai Aiguptaa inthawka ṭhuoi suok dinga hriltuhai chu.

JEREMIA 32:21

Aigupta rama inthawkin i mi Israelhai chu inchiknahai dâm, thilmakhai dâm, kut hrât dâm le, bân phar dâm le ṭium nasatak leh i hung ṭhuoi suok a;

AMOS 2:10

Amor mihai ram chu nei dingin Aigupta rama inthawkin ka ṭhuoi suok cheu a, thlalêra khan kum sâwmli sûngin ka ṭhuoi cheu a.

NAMBAR 12:1

Miriam le Aron chun Mosiein Kus mi nuhmeia a nei leiin an hrilsiet a; Kus mi chu a nei ngei si a.

NAMBAR 33:1

Mosie le Aron inrawina hnuoia Israel mihai Aigupta rama inthawka a pâwl pâwla an suok a, an fe pei dân chu hieng ang hin a nih.

THILTHAWHAI 7:36

Ama chun Aiguptaa dâm, Tuipui Sena dâm, thlalêra dâm chun kum sâwmli sûngin thilmak le inchiknahai inhmutirin anni a ṭhuoi suok ta a.

DÂN PAHNINA 15:15

Aigupta rama khan suok in ni ta a, Lalpa in Pathienin ân tlan cheu ti kha in hriet zing ding a nih; chu lei chun a nih, hieng thu hi tuhin ka pêk cheu chu.

DÂN PAHNINA 24:18

Nangni khawm Aiguptaa khan suok in ni ta a, Lalpa in Pathienin chutaka inthawk chu ân tlan cheu a nih ti in hriet zing ding a nih; chuong lei chun a nih hieng thil hi thaw dinga thu ka pêk cheu chu.

DÂN PAHNINA 4:20

Lalpa chun a mihai, a ro ni dinga thîr rawtuinaa inthawk, Aigupta rama inthawk chun a ṭhuoi suok lem cheu a ni kha, tuta in ni ang hin.

DÂN PAHNINA 4:34

Hnam dang laia inthawka fiena dâm, inchikna dâm, thilmak dâm, indona dâm, kut hrâttak dâm, bân phar dâm, thil râpthlâkhaia Lalpa in Pathienin in mithmua Aigupta rama a thaw hlak ang po poa hnam ṭhuoi suok ngam pathien an um hlak am chu?

DÂN PAHNINA 5:6

“Kei hi Lalpa i Pathien, Aigupta rama inthawka ṭhuoi suoktu che ka nih,.

DÂN PAHNINA 7:8

Lalpain a hmangai cheu a, in pi le puhai kuoma ṭawng a lo inkhâm chu hlen a nuom leiin a nih, Lalpa kut hrâttakin suoka in umna Aigupta ram lal Pharao kuta inthawka ân tlan suok cheu chu.

DÂN PAHNINA 9:26

Chun, Lalpa kuoma chun ka ṭawngṭai a, ‘Aw Lalpa PATHIEN, i ropuinaa în tlan, kut hrâttaka Aiguptaa inthawka în tlansuok, i mihai le i rochanhai chu sukbohmang naw rawh.

1 SAMUEL 12:6

Chun, Samuel chun mipui kuoma chun, “Mosie le Aron ruottu le Aigupta rama inthawka in puhai ṭhuoi suoktu Lalpa chu a nih in sawnnaw.