JEREMIA 3:17 - Pathien Lekhabu Inthieng (BSI)

¹⁷ Chu pha chun Jerusalem chu Lalpa lalṭhungpha tiin inbûk an ta, hnam po pohai chu chutaka chun kei khâwm nîng an ta, Lalpa hmingin Jerusalema chun, an lungril rilo ngarna ang chun fe khâwm nâwk ta ngai naw ni hai.

JEREMIA 3:17 ပူးပေါင်းရင်းမြစ်များ

INṬANNA 8:21

Chun, Lalpain riminhnik chu a hriet a; chun, Lalpa chun a lungrilin, “Hnuoi chu mihriem lei chun ṭawngsie inphur nâwk ta naw ning, mihriem lungril ngaituonahai chu an chîntea inthawkin a suol si a; tuta ka hrem ang hin thilsiem hringna nei tinrêng chu hrem nâwk ta ngai nâwng ka tih.

1 LALHAI 8:41

“I mi Israelhai ni lo hnam dang mi, nangma hming leia ram hla taka inthawka hunghai chungchâng thu khawm hi;

INPÂKNA HLABU 102:23

Ama chun lam kâra hin ka tha a sukṭhum a, Ka dam sûng hi a suktâwi a.

INPÂKNA HLABU 78:8

Le, an thlatuhai anga, Suon kâwmaw le hel hmang, Suon lungril siem diklo, Pathien kuoma lungril ringum naw puta an um nawna dingin.

INPÂKNA HLABU 87:3

Aw Pathien khawpui, I chungchâng thu ropuitakin an hril hlak a nih.

ISAI 26:8

Anih, Aw Lalpa, i rorêlna lampuia chun kan nghâk zing che a, kan hringna dit zâwng chu i hming tieng le i hriet zingna tieng hi a nih.

ISAI 56:6

Ram dang mi khawm, châwlni bawse lova, inser hlakhai le, ka thuthlung pawm tlat taphawt chu, Lalpa rawng bâwl ding le, Lalpa hming hmangai ding le, a siehlawahai um dinga Lalpa zâwm taphawthai;

ISAI 59:19

Chuongchun, Lalpa hming chu thlangtienga inthawkin ṭîng an ta, a ropuina chu nisa suoknaa inthawkin ṭi bawk an tih; ama chu tui lien thut, Lalpa thuoka mût luong vut vut angin a hung ding a ni si a.

ISAI 6:1

Lal Uzzia a thi kum khan Lalpa chu lalṭhungpha insângtaka chawisânga a ṭhung ka hmu a, a silfên hmawr infuol chun biekin chu a suksip ta vawng a.

ISAI 66:1

Lalpa chun hieng ang hin a tih, “Vân ka ṭhungpha a na, hnuoi ka ke innghatna a nih; in ieng ang am in mi bâwlpêk ding a na? Khâwlai hmun am a na ka châwlna ding chu?

ISAI 66:18

An thilthawhai le an ngaituohai chu ka hriet si a; hnam tinrêng le ṭawng tinrêng ka ṭhuoi khâwm hun a la hung tlung ding a nih; chuongchun, hung an ta, ka ropuina hmûng an tih.

ISAI 66:20

Israel thlahaiin an thilinhlân chu bûrlebêl inthiengtaka Lalpa ina an hung lâklût hlak ang hin, Lalpa kuoma thil inhlân dingin hnam tin laia inthawka in unauhai po po chu sakawr chunga dâm, tawlailîra dâm, zâwnnaa dâm, sabengtung lien chi chunga dâm, sanghâwngsei chunga dâm, Jerusalem ka tlâng inthienga chun hung ṭhuoi an tih; Lalpain a tih.

JEREMIA 11:8

Nisienlakhawm, an awi naw a, an na khawm an sit bawk naw a, amiruokchu, mi tin chu mâni lungril ngarna ang pei chun an fe lem a; chuleiin, an chunga chun hi thuthlung thuhai po po hi ka hung intlungtir a, chuong chu thaw dingin thu ka pêk a, nisienlakhawm, an thaw naw a,’ tiin.

JEREMIA 12:15

Anni ka hmalthlâk hnunga chun hung kîr nâwk ka ta, an chungah lunginsietna nei ka tih; chun, mi tin chu mâni rochan senga chun hung ṭhuoi nâwk ka ta, mi tin chu mâni ram senga chun.

JEREMIA 12:16

Chun, Baal kuoma ṭawng inkhâm dinga ka mihai an inchûktir anga, “Lalpa chu a hring zing angin,” tia, ka hminga ṭawng inkhâm dinga, ka mihai lampuihai chu taimataka an inchûk chun, ka mihai laia chun anni khawm chu siempuitling nîng an tih.

JEREMIA 14:21

Nangma hming leiin keini chu mi hmusit naw la, i ropuina lalṭhungpha chu sukhmaimâwk naw rawh; keini le i thuthlung kha hre zing la, sukse naw rawh.

JEREMIA 16:12

in thlatuhai nêk hman chun thil suol in thaw lem a, ngai ta u, mi tin el chu mâni lungril ngarna ang peia fein, keia thu chu in ngai ta naw a;

JEREMIA 16:19

Aw Lalpa, ka hrâtna le ka kulpui nghet le rinum nia ka himna; leihnuoi tâwphaia inthawk chun hnamhai chu i kuomah hung an ta, “Kan thlatuhai chun khêlhlip chau, teplo le, thil a hlâwkna um dêr lohai chau naw chu iengkhawm an lo rochung naw a,” hung tîng an tih.

JEREMIA 17:12

A tira inthawka lalṭhungpha ropui chungtienga inṭhuta um chu, chu chu ei hmun inthieng hmun chu a nih.

JEREMIA 18:12

“Nisienlakhawm, ‘Beiseina hrim a um nawh, mi tin mâni ngairuotna ang seng ei hraw ding a na, eini mi tin chun mâni lungril rilo ngarzie ang peiin ei thaw el ding a nih,’ an ta.

JEREMIA 3:19

“Kei chun, ‘hnamhai laia chun sie cheuin, ram inhawitak chu pe cheuin, hnamhai sipai pâwlhai rochan ṭhataka chun sie cheu ka lo lungril hlak a; chun, nangin, Pa, mi hung tîng i ta, i mi zuinaa inthawk hin fe hmang ta naw ti ni’ ka lo ti hlak a.

JEREMIA 31:23

Sipaihai Lalpa, Israel Pathien chun hieng hin a tih: An sal intângna ka hung lâk kîr nâwk pha chun Juda rama le chutaka khawpuihaia chun hi ṭawngbau hi la hmang nâwk an tih: “Aw indikna chêngna, Lalpa chun mal sâwm raw se che,” ti dâm le, “Aw inthiengna tlâng,” ti dâm hi.

JEREMIA 33:9

Chun, hnuoi chunga hnam po pohai, an chunga thil ṭha ka thaw po po hretuhai le, thil ṭha po po le thlamuongna po po a ta dinga kân neitir hretuhai ṭiin inthin an tih; ka ta dingin hi khawpui hi hlimna hming le, inpâkna ding le ropuina ding hung nîng a tih.

JEREMIA 4:2

chuongchun, nang chun, ‘Lalpa chu a hring zing angin, thudikah, rorêlnaah, felnaah, hnamhai chu amaa chun engthâwl an ta, amaa chun chawimawiin um an tih,’ tiin ṭawng inkhâm i ta.”

JEREMIA 7:24

Nisienlakhawm, an ngai naw a, an na khawm an sit bawk naw a, amiruokchu, anni remruotnaa le, an lungril rilo kâwmâwna chu hrawin, hmatiengah ni lovin an kîr nâwk ta lem a.

JEREMIA 9:14

nisienlakhawm, an lungril ngarna ang pei chu an hraw lem a, Baal hnung chu an zui a, an thlatuhaiin anni an lo inchûktir ta ang khan;

EZEKIEL 1:26

An luhai chunga, vân chunga chun, lalṭhungpha ang, sapphir lung anga inlang a um a; lalṭhungpha angtak chunga chun mihriem anga inlang a um a.

EZEKIEL 43:7

ka kuoma chun, “Mihriem naupa, hi hi ka lalṭhungpha hmun le ka kehai innghatna hmun, Israel thlahai kuoma chatuona ka chêngna ding chu a ni hi. Israel sûngkuo chun ka hming inthieng chu sukpawrche ta naw ni hai a, anni khawmin, an lalhai khawm, an hurnain amani, an bâwlhmunhaia an lalhai ruonghai khawmin amanih sukpawrche naw ni hai,

EZEKIEL 48:35

A vêl chun tawng sîng khat sâng riet nîng a ta; chu khawpui hming chu chu nia inthawk chun, “Jehova Samma nîng a tih,” tiin.

ZEKARIA 2:11

Chun, chu nia chun hnam tamtakhai chu Lalpa tieng hung kawp an ta, ka mihai an hung ni ding a nih; chun, kei chu nangmaa chun chêng ka ta, chuongchun, sipaihai Lalpa chun i kuomah a mi hung tir a nih ti hre tâng i tih.

ZEKARIA 8:8

anni chu hung ṭhuoi ka ta, Jerusalem sûnga chun chêng an tih; chun, anni chu ka mihai nîng an ta, kei chu, felna le indiknain an Pathien nîng ka tih,” tiin.

NAMBAR 15:39

chu rei chu in en hlak a, Lalpa thupêk po po in hriet zinga in zâwmna ding le nawchizawra in um hlak anga in lungril dit zâwng le in mit la zâwng hnawta in um nawna dingin le,

ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 1:21

Pathien hre zing siin Pathien angin an chawimawi naw a, lâwmthu khawm an hril bawk si nawh. Teplo mei mei an ngaituo lem ta a, an lungril invêt chu a hung inthim ta a.

ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 6:14

Suolnain in chungah thu a nei ta naw ding a ni si a, Dân rorêla um in ni naw a, lunginsietna rorêla um in ni lem si a.

GALATI 4:26

Chungtieng Jerusalem ruok chu suok a ni naw a, chu ngei chu eini nu a nih.

DÂN PAHNINA 29:29

Thil inthuphai chu Lalpa ei Pathien ta a na, thil suklanga umhai ruok chu hi dân thuhai po po hi ei zâwm theina dingin eini le ei thlahai ta ding a nih.

RORELTUHAI 2:19

Nisienlakhawm, rorêltu chu a thi phingleh an hnungtawl nâwkin, pathien danghai rawng bâwla chibai bûk dinga zui thuah an thlatuhai nêkin an thaw ṭha naw nâwkzuol a, an thil thaw hlakhai le an lûlulna khawm an bân chuong naw a.