JEREMIA 21:7 - Pathien Lekhabu Inthieng (BSI)

⁷ Chu hnunga chun, Lalpa chun a tih: Juda lal Zedekia le, a siehlawhai le, mipuihai, hi khawpuia hripuia inthawka hlaa la umhai, kâwlhnâm le ṭâma inthawka la hlaa umhai chu Babulon lal Nebukadnezzar kuta dâm, an hmêlmahai kuta dâm, an hringna lâk tumtuhai kuta dâm chun pêng ka tih; chun, ama chun kâwlhnâm ngeiin that a ta; anni chu hla naw ni a, lunginsiet bawk naw ni a, zângaina nei bawk naw ni.

JEREMIA 21:7 ပူးပေါင်းရင်းမြစ်များ

ISAI 27:11

A kauhai chu a vuoi pha chun thliekin um a ta, nuhmeihai hung an ta, raw el an tih; hriet theina hrim hrim nei naw mihai an ni si a; chuleiin, anni siemtu chun anni chu lunginsiet naw ni a, anni inngîrtu chun anni chu a ditin ditsak hrim hrim bawk naw nih.

ISAI 47:6

Ka mihai chungah ka lunginsen a, ka rochan chu ka sukpawrche a, i kutah pêng ka ti che a, nang chun an chungah lunginsietna hrim hrim în langtir naw a, tarhai chung chena khawm i rîngkawl riktak chu în nghat a.

JEREMIA 13:14

Anni chu inbawtuotir ka ta, pahai le an naupasalhai ngei chu inbawtuong an tih, Lalpa chun a tih; lunginsiet naw ning a, hla naw ning a, hmangaina khawm nei naw ning a, anni chu ka sukbohmang nawna dingin, iengkhawmin mi dâl naw ni.

JEREMIA 14:12

Bu an nghei pha khawm, an khêkri chu ngai naw ning a; inthâwina le pumrawhmang thilinhlân an inhlân pha khawm pawmpêk naw ningah; amiruokchu, anni chu kâwlhnâm le, ṭâm le hripuiin sukbohmang lem ka tih” a ta.

JEREMIA 15:5

Aw Jerusalem, tuin am i chungah lunginsietna nei a ta? Tuin am an sûn ding che a ni leh? Annawleh, i hamṭhatna ding thu hni dingin tu am hnungkîr an ta?

JEREMIA 15:9

Nau pasari neitunu chu a chau ta a, a chau let dêr a; sûn a ni lai chun a nisa chu a tla ta a; ama chu ân zakin a hamhai a; chun, anni a la mahlahai chu an hmêlmahai kuomah kâwlhnâmah pêng ka tih,” Lalpa chun a tih.

JEREMIA 19:7

Chun, hi hmuna hin Juda ram le Jerusalem thurawt chu inthlâwntir ka ta; an hringna zawngtuhai le, an hmêlmahai hmaa chun kâwlhnâmah intlûktir ka tih; chun, an ruonghai chu chunglêng vatehai le, hnuoia ramsahai ta dingin bu dingin pêng ka tih.

JEREMIA 20:4

Lalpa chun hieng hin a ti si a: Ngai ta, i ruolhai le nangma ngei ta dingin ṭiumah ka siem ding che a nih; chun, an hmêlmahai kâwlhnâma ngei chun tlûng an ta, chu chu i mit ngeiin hmûng i tih; chun, Juda ram po po chu Babulon lal kutah pêng ka ta, ama chun Babulon tieng salah ṭhuoi a ta, kâwlhnâmin anni chu that a tih.

JEREMIA 22:25

chun, nangma hringna zawngtuhai kuta le, i ṭi Babulon lal Nebukadnezzar le Kaldaihai kuta chun pêng ka ti che.

JEREMIA 27:6

Tuhin chuong ramhai po po chu ka siehlaw Nebukadnezzar, Babulon lal kuoma chun ka pêk tah a nih, ramhnuoia ramsahai khawm chu ama rawng bâwl dingin ka pêk a nih.

JEREMIA 32:4

Juda ram lal Zedekia khawm chu Kaldaihai kuta inthawk chun suokthleng naw ni a; amiruokchu, Babulon lal kuta chun matheilovin pêk ni lem a tih, ama chu bau le bau inphâkin bieng a ta, a mithai chun ama mithai chu hmu bawk a tih;

JEREMIA 34:3

nang khawm a kuta inthawk chun suok naw ti ni a, ṭhuoi ni ngei ngei i ta, a kuta pêk i ni ding a nih: Babulon lal mithai chu nanga mithai ngei chun hmûng a ta, ama chun bau inphâkin i kuomah thu hril a tih; chun, nang chu Babulonah fe bawk i tih.

JEREMIA 36:29

Chun, Juda ram lal Jehoiakim chungthua chun hieng ang hin hril i tih; ‘Lalpa chun hieng hin a tih: Babulon lal chu hung a ta, hi ram hi hung sukse ngei a ta, chutaka inthawk chun ramsa le mihriem khawm sukchavai a tih, tia, iengdinga hitaka hi ziek am in ni a?’ tiin, hi lekhabu zuol hi i raw ta chu a na.

JEREMIA 37:17

chun, lal Zedekia chun mi a tir a, a hung ṭhuoi a, a ina chun lal chun a rûkin ân dawn a, a kuomah, “Lalpa kuoma inthawkin thu a um?” a ti a. Chun, Jeremia chun “A um”, a ti a. “Babulon lal kutah pêkin i um ding a nih,” a ti bawk a.

JEREMIA 50:17

“Israel chu berâm indar a nih: sakeibakneihai chun ama chu an lo hnawt hmang ta a; a hmasatak chun Assuria lal chun anni chu a fâkzo a; a tâwpah Babulon lal Nebukadnezzar hin a ruhai chu a sukthliek ta a.

ṬAP HLA 2:20

En ta, Aw Lalpa, ngai ta, hienga an kuoma i thawnahai hi! Nuhmeihai chun an rîla ra, naupanghai, kuta tâwma umhai chu, an fâk el ding maw? Lalpa hmun inthienga chun zâwlnei le thiempu chu that an ni el ding maw?

ṬAP HLA 2:22

Inkhâwmpui hunbi neihai nia angin, “Ka lunginsenna chu kil tinah,” tiin nang chu i khêk a, Lalpa lunginsenna nia chun a pumpel amanih, a um zing amanih tukhawm an um nawh: Ka tâwm a, ka dawn tleihai chu ka hmêlma chun a sukbohmang zo ta a.

EZEKIEL 23:28

Hieng hin Lalpa Pathien chun a ti si a: Ngai ta, i theidahai kuta le, i lungrilin a hransanhai kuta chun ka pêk suok ding che a nih;

EZEKIEL 7:9

Ka mit chun hla naw ni, lunginsietna nei bawk naw ning; i um dânhai ang peiin i chungah hung intlungtir ka ta; i tirdakumnahai chu nangmaah a um si a; chun, kei Lalpa hin ka hrem che a nih ti hre tâng i tih.

EZEKIEL 8:18

Chuleiin, kei khawma lunginsenin thaw vêng ka ta, ka mitin anni chu hla naw ni a, lunginsietna nei bawk naw ning; ka naa chun râwl inringtakin hung khêk hai sien khawm, anni chu lo ngai naw ning,” tiin.

EZEKIEL 9:10

Chuongchun, keia ta ding khawma, ka mitin hla naw ni a, lunginsietna nei bawk naw ning, amiruokchu, an suol man chu an lu chungah innghat lem ka tih,” a ta.

DÂN PAHNINA 28:50

upahai khawm pawisa lo le ṭhalaihai khawm ditsak chuong lo hnam nunrâwngtak el chu.