JEREMIA 14:22 - Pathien Lekhabu Inthieng (BSI)

²² Khawhri be mihai teplohai lai chun ruo insûrtir thei hrim an um am? Annawleh, vânhai chun ruohai chu a pêk thei am a nih? Aw Lalpa kan Pathien, nang chu ama chu i ni a ni naw maw? Chuleiin, nangma chu nghâk zing kan ti che, hieng thilhai po po hi i siem si a.

JEREMIA 14:22 ပူးပေါင်းရင်းမြစ်များ

1 LALHAI 17:1

Tisbe khuo, Gilead rama Tisbe khuoa mi Elija chun Ahab kuoma chun, “Lalpa, a hmaa ka ngîrna hlak, Israelhai Pathien hringna sâlin ka hril a nih; kum ieng zât amani sûng chu ka thu naw chun ruo le dâidaw tla hrim hrim naw nih,” a ta.

1 LALHAI 17:14

Lalpa Israelhai Pathien chun hieng ang hin a ti a nih, ‘Lalpain hnuoi chunga hin ruo a hung insûrtir hmakhat chun bei phit bêl chu ruok chuong naw ni a, sahriek bûr khawm kang naw nih,’ tiin,” a ta.

1 LALHAI 18:1

Chun, ni tamtak hnunga chun, a kum thum kuma chun Lalpa thu chu Elija kuomah a hung tlung a, “Va fe la, Ahab kuomah vân lang rawh; chuongchun, hnuoi chunga hin ruo hung insûrtir ka tih,” tiin.

1 LALHAI 8:36

nangin vâna inthawkin lo ngai la, i siehlawhai le i mi Israelhai suolna hi ngaidam la, an fena ding lampui ṭha khîkhmu pei la, chun, i mihai an rochan dinga i pêk rama hin ruo hung insûrtir bawk la.

JOB LEKHABU (THE BOOK OF JOB) 28:26

Chu lai chun ruo ta ding chun bi a ruotpêkin, Vâninrûm, kâwlinlep ta ding khawma lampui a siempêk bawk a.

JOB LEKHABU (THE BOOK OF JOB) 5:10

Ama chun hnuoi chungah ruo a hung pêk a; Loahai chun tuihai chu a hung tir bawk a:

INPÂKNA HLABU 130:5

Lalpa chu ka nghâk zing a, ka hringna hin a nghâk zing a, A thu khawm ka beisei a nih.

INPÂKNA HLABU 135:7

Ama chun sûmhai chu kâwlkila inthawkhai chun ân lâwntir hlak a, Kâwlinlep dâm ruo dingin a siem hlak, A sum ina inthawkhai chun thli a lâk suok hlak.

INPÂKNA HLABU 147:8

Ama chun vân khi sûm ân zâm hlietir a, Leihnuoi ta dingin ruo a buotsai a, Tlângahai chun hlobet ân mâwngtir hlak.

INPÂKNA HLABU 25:21

Lungril ṭhatna le indiknain mi vawng ṭha zing raw se. Ka nghâk zing si che a.

INPÂKNA HLABU 25:3

Anih, nangma nghâktu hrim hrim chu tukhawm muolphoin um naw ni hai, A san um lova vervêktaka thawtuhai ruok chu muolphoin um an tih.

INPÂKNA HLABU 27:14

Lalpa chu nghâk zing rawh, Hrâttakin um la, i lungril chu insukhuoi raw se; Anih, Lalpa chu nghâk zing rawh.

ISAI 30:18

Chuleiin, Lalpa chun a lunginsiet theina ding cheuin, nghâk a ta, chuleiin, a lainat theina ding cheuin chawimawiin um a tih; Lalpa chu rorêl felna Pathien a ni si a; ama nghâktuhai po po chu an hamṭha ie.

ISAI 30:23

Chuongchun, ama chun in bu chi hnuoia in tu ding ta ding chun ruotui chu pêng a ta; hnuoia thil mâwnghai chu bu dingin pêng a tih; chu chu ṭhatak, hlâwktak nîng a ta, chu nia chun in ranhai chu ran tlatna hmun lientakahai chun tlâng an tih.

ISAI 41:29

En ta u, an rêngin, an sinthawhai chu iengkhawm ni lo a na, thil umlo el a nih, an milim sunghai khawm chu thli le boruok el a nih.

JEREMIA 10:12

A thilthawtheina chun hnuoi chu a siem a, a varna chun khawvêl chu a lo tungding ta a, a hrietthiemnahai chun vânhai khawm chu a lo keiphar ta a;

JEREMIA 10:13

a râwl a hung insuo pha chun vânhaia tuihai chu a hung phul a, leihnuoi tâwpnaa inthawk dâm chun tuihu chu ân kaitir a, ruo ta ding chun kâwlinlephai a siem a, a robâwmhaia inthawk chun thli chu a hung lâk suok a.

JEREMIA 10:15

Thil teplo, sinthaw nuizatum an nih; hrem an ni pha chun bohmang an tih.

JEREMIA 10:3

Hnamhai dânhai chu teplo mei mei an na; rama inthawkin thing an hang phûr thlûk a, themthiem mi chun a hreipuiin a chei a.

JEREMIA 16:19

Aw Lalpa, ka hrâtna le ka kulpui nghet le rinum nia ka himna; leihnuoi tâwphaia inthawk chun hnamhai chu i kuomah hung an ta, “Kan thlatuhai chun khêlhlip chau, teplo le, thil a hlâwkna um dêr lohai chau naw chu iengkhawm an lo rochung naw a,” hung tîng an tih.

JEREMIA 5:12

Lalpa chu an lo inphatsan a, “Ama a ni nawh; thil ṭha naw chu ei chungah hung tlung chuong naw ni; ṭâm amanih, kâwlhnâm amani khawm hmu chuong nâwm ei ni;

JEREMIA 5:24

An lungril khawma, “Lalpa ei Pathien, a huntaka ruo hmasa le nuhnung petu, ei ta dinga busîk hun haptahai mi ruotpêktu chu ṭing ei tiu,” khawm an ti dêr nawh.

JEREMIA 51:16

a râwl a hung insuo pha chun, vânhaia tuihai ân ri hum hum a; leihnuoi tâwphaia inthawk chun tuihu dâm chu ân zâmkaitir bawk a, ruo ta dingin kâwlinlephai chu a siem a, a robâwmhaia inthawk chun thlihai chu a hung lâk suok a.

HOSEA 2:7

Chun, a dit zâwnghai chu hnawt a ta, Hnawt phâk naw nih. Anni chu zawng a ta, hmu naw nih; Chuongchun, Ka pasal hmasa kuomah kîr nâwk ka tih. Tulai nêk hin kha hma kha ka ta dingin a ṭha lem si, tîng a tih.

JOEL 2:23

Nangni Zion nauhai, lâwm ro, Lalpa in Pathiena chun hlim ro; ruo hmasa chu inkhi chiein a pêk si cheu a, in ta dingin ruo ân sûrtir a, thla khatnaa ruo hmasa le ruo nuhnung chu.

AMOS 4:7

“Chun, bu sîk hun ding thla thum a la ni laiin in chunga ruo sûr ding khawm ka chel a, khawpui pakhat chungah kân sûrtir a, khawpui dang chungah kân sûrtir naw a; hmun khat chungah a sûr hlak a, a sûr nawna hmun chu a ṭâwl hlak.

MIKA 5:6

Assuria ram chu kâwlhnâmin suksieng an ta, Nimrod ram chu a lûtnaa chun sukse bawk an tih; chun, ama chun ei ramah Assuria mi a hung a, ei ram chu a hung sir pha chun, amaa inthawk chun mi sansuok a tih.

MIKA 7:7

Kei ruok chun chu Lalpa en ka ta; ka sandamna Pathien chu nghâk ka tih; ka Pathien chun a mi ngai ding a nih.

MATTHAI 5:45

in Pa vâna mi nauhai in ni theina dingin; ama chun mi suolhai le mi ṭhahai chunga chun a nisa ân suoktir a, mi fel le mi fel nawhai chunga khawm ruo ân sûrtir hlak a nih.

DÂN PAHNINA 28:12

Lalpa chun a huntaka in ram châwm ding ruotui pe ding cheu le, in kutsuok po po malsâwm dingin vân, a robâwm ṭha chu hawngpêk a ti cheu a; chuongchun, hnam tamtak inpûktir in ta, nangni ruok chun pûk naw ti niu.

DÂN PAHNINA 32:21

Pathien ni lo thilin ka thîkthu an chawktho a, An milimhaiin an mi suklungsen a; Chia hril khawp lohai leh inthîktir ka ta, Hnam invêthai hmangin suklungsen ka tih.