ISAI 9:12 - Pathien Lekhabu Inthieng (BSI)

¹² Saktieng Suria mihai, thlangtieng Philistin mihai chun bau kain Israelhai chu fa zo an tih. Chuong ang lâwma a thaw khawm chun a lunginsen chu a la bo chuong si naw a; a kut chu a lân let ta rawp a.

ISAI 9:12 ပူးပေါင်းရင်းမြစ်များ

2 LALHAI 16:6

Chuong lai chun Suria lal Rezin chun Elath khuo chu Suria rama dingin a lâk nâwk a, Judahai chu Elath khuoa inthawk chun a hnawtsuok a; chun, Suria mihai chun Elath khuo chu an va hluo a, tu chen hin an la um zing a nih.

2 CHANCHIN SUINA 28:18

Philistin mihai khawma Juda ram Simtienga phaia khawpuihai chu an hung rûn a, Beth-semes hai, Aijalon hai, Gederoth hai, Soko hai an khawperhai leh, Timna le a khawperhai leh, Gimzo le a khawperhai leh an lâk a, chuongahai chun an um a.

INPÂKNA HLABU 79:7

Jakobhai chu an fâk zo a, An umna chu an suk ram ta si a.

ISAI 10:4

Salhai hnuoiahai chun kûn an ta, thata umhai hnuoiahai chun tlûng an tih, chu chau chu an chan ni tâng a tih. Chuong ang lâwma a thaw khawm chun a lunginsen chu a la bo chuong si naw a, a kut chu a lân let ta rawp a.

ISAI 11:14

Chuongchun, annihai chu thlangtienga Philistin mihai liengkoa chun zuk vuongin zu fûng an ta; khawsak nauhai chu rawk hmunkhat an tih; Edom le Moab mihai chungah an kut thlâk an ta; Ammon thlahai chun an thu awi tâng an tih.

ISAI 31:1

Aigupta rama ṭhangpuina zawnga zu fe a, sakawrhai chunga ringna innghat a, a tam leia tawlailîrhai le an hrât êm leia sakawr chunga chuong mihai ring a, Israelhai Mi Inthieng tieng en si lova, Lalpa khawm râwn si lohai chu an chung a rik ie!

ISAI 5:25

Chuleiin, Lalpa lung chu a mihai chungah ân thawk a, a kut chu an chungah ân let a, a vuok a, chuongchun, tlânghai chu an inthin dur dur a, an ruonghai chu khawlai dungah hmunhnawk ang elin ân hlum rem rum a. Chuong lâwma a thaw khawm chun a lunginsen chu a la bo chuong naw a; a kut chu a lân let ta rawp a.

ISAI 9:17

Chuleiin, Lalpa chu an tlangvâlhai chungah lâwm naw ni a, an naufahrahai le hmeithaihai chu lunginsiet bawk naw nih; an rêngin Pathien inzâ naw mi le thil ṭha naw thawtu an ni vawng a, bau po po chun thu teplo a hril seng si a. Chuong ang lâwma a thaw khawm chun a lunginsen chu a la bo chuong si naw a, a kut chu a lân let ta rawp a.

ISAI 9:21

Manassehaiin Ephraimhai fâng an ta, Ephraimhaiin Manassehai fâng an tih; chun, an pahni chun Judahai do hmunkhat an tih. Chuong ang lâwma a thaw khawm chun a lunginsen chu a bo si naw a, a kut chu a lân let ta rawp a.

JEREMIA 10:25

Khawhri be mi, nang hre lohai chunga le, hnam nangma hming lam ngailohai chunga chun i ṭiumna chu bunthla la, Jakob chu an fâk zo si a; anih, ama chu an fâk zo a, an kânghmang dêr a, a umna khawm chu an suksiet a.

JEREMIA 15:7

Chu ram dai kawtkhârahai chun anni chu hmaizâpin ka zâp a; an nauhai chu ka lâk hmangpêk tâwl a; ka mihai chu ka suksiet ta a; an lampuihaia inthawk chun an lamlêt chuong nawh.

JEREMIA 35:11

Amiruokchu, Babulon lal Nebukadnezzar chu hi rama hin a hung lai khan, ‘Thaw ro, Kaldai sipaihai ṭi lei le, Suria sipaihai ṭi leiin, Jerusalemah hang fêng ei tiu,’ kan ti a; chuongchun, Jerusalema chun kan hang chêng ta a,” tiin.

JEREMIA 4:8

Hi hi lei hin saiip puon dierkei unla, sûn unla, ṭap inrûm ro; Lalpa lunginsenna ṭium chu einia inthawkin a hnungkîr si naw a.

EZEKIEL 16:27

Chuleichun, ngai ta, i chungah ka kut kân let a, i bu pângngai chu ka suktlâwm ding a nih, chun, Philistin naunuhai, i lampui tirdakum inzapuituhai, nangma theidatuhai duthusâmah pe suok ka ti che.

EZEKIEL 6:14

Chun, an chunga chun ka kut chu inlet ka ta, thlalêra inthawka Dibla tieng, an hluona sûng po po chu, ram chu râusana siemin suksieng ka tih; chun, Lalpa chu ka ni ti mi hre tâng an tih,” tiin.

HOSEA 7:10

Israel chapona chun ama thiemnawzie ân hriettir a, Nisienlakhawm, hieng po poa khawm hin, Lalpa an Pathien tieng chu an ngha naw a, Ama chu an zawng bawk nawh,

AMOS 4:10

“Aigupta ram angin nangni lai hripui ka tir a, kâwlhnâmin in tlangvâlhai chu ka that ta a, in sakawrhai ka ṭhuoi hmang tah a nih; chun, in sipai hmun rimsie chu hnâra innam khawpin kân umtir a, chuong khawm chun ka kuomah in hung kîr nawh,” Lalpa chun a tih.

AMOS 4:11

“Sodom le Gomorra khuo chu Pathienin a sukchim lai angin nangni lai mi ṭhenkhat ka sukchim a, thing kâng ût lâk suok ang in na; chuong khawm chun ka kuomah in hung kîr nawh,” Lalpa chun a tih.

AMOS 4:6

“Chun, kei khawma in khawpui po pohaia ha faina le in hmun po pohaia tlâksamna ka pêk cheu a, chuong sa khawm chun ka kuomah in hung kîr naw a,” Lalpa chun a tih.

AMOS 4:8

Chuongchun, khawpui pahni amanih, pathum amani chu khawpui pakhatah tui dâwn dingin an invâk a, an khawp naw a, chuong sa khawm chun ka kuomah an hung kîr nawh,” Lalpa chun a tih.

AMOS 4:9

“Ṭâwlna le apnain ka hrem cheu a, in huonhai, in grêp huonhai, in theichang kûnghai, in oliv thinghai zozai chu thingnge tuktulung chun a fâk zo vawng tah a nih; chuong khawm chun ka kuomah in hung kîr nawh,” Lalpain a tih.

ZEPHANIA 1:6

Lalpa zuinaa hnungkîrtuhai le, Lalpa chu zawng ngai lo a, ama chanchin khawm indawn ngai lohai chu sukbohmang ka tih.”

ZEPHANIA 3:2

Ama chun râwl chu a pawisa naw a, sukdikna chu a pawm naw a, Lalpa khawm chu a ring naw a; a Pathien khawm chu a hung hnai bawk naw a.

DÂN PAHNINA 31:17

Chu pha chun an chungah ka lung chawk a ta, nghatsan ka ta, inbîksan ka tih, bohmang an ta, thil ṭha naw le lunginzîngna tamtak an chungah tlung a tih; chuongchun, chu ni chun, ‘Ei Pathien eini lai a um naw leiin hieng thil ṭha naw ei chungah a hung tlung a ni naw am a nih?’ tîng an tih,