INṬANNA 26:4 - Pathien Lekhabu Inthieng (BSI)

⁴ Vâna arasi zâtin i thlahai chu la sukpung ka ta, hieng ram po po hi i thlahai kuomah la pe bawk ka tih; chun, i thlaa chun khawvêla chi tin la thawveng an tih:

INṬANNA 26:4 ပူးပေါင်းရင်းမြစ်များ

INṬANNA 13:16

Chun, i thlahai chu hnuoia pilvut ang elin la siem ka tih: chuongchun, mîn hnuoia pilvut hi an tiem sêng chun i thlahai khawm chu tiem sêng ni bawk an tih.

INṬANNA 15:18

Chu ni chun Lalpa chun, “Hi ram hi Aigupta vadunga inthawka vadung lientak (Euphrates vadung) chenin i thlahai kuomah ka pêk tah.

INṬANNA 15:5

Chun, ama chu tuolah a ṭhuoi suok a, “Vân tieng khi en la, arasihai khi i tiem thei chun tiem ta khai,” a ta. Chun, ama bawkin, “I thlahai chu khieng zât khi la nîng an tih,” a ta.

INṬANNA 18:18

Abraham hi chi ropui le thilthawtheitak a la hung ni ngei ding a ni si a, amaa chun khawvêla chi tin an la thawveng ding a ni si a.

INṬANNA 26:24

Chu zân ngei chun Lalpa chu a kuomah a hung inlâr a, “Kei hi i pa Abraham Pathien chu ka nih, ṭi naw rawh, i kuomah ka um annâwm, mal sâwm ka ti che a, ka siehlaw Abraham leiin i thlahai chu ka la sukpung ding a nih,” a ti a.

INṬANNA 28:14

i thlahai chu hnuoia pilvut zâtin la um an ta, thlangtieng dâm, saktieng dâm, hmârtieng dâm, simtieng dâm indar lien i ta, nangma le i thlahaia chun khawvêla hnam tin la thawveng an tih.

INṬANNA 28:3

Pathien Iengkimthawthei chun mal sâwm chein, hnam tamtak um khâwm hung ni dingin chi tamtak inthlatir chein, sukpung raw se che.

INṬANNA 35:12

Abraham le Isak kuoma ram ka pêkhai hi i kuomah pêng ka ti che, i um naw hnunga i thlahai kuoma khawm ram hi pe pei ka tih,” a ti a.

INṬANNA 47:27

Chuongchun, Israelhai chun Aigupta rama Gosen rama chun umhmun an khuor ta a; chutaka chun an insukmuk a, chi tamtak an thla a, nasatakin an pung ta a.

1 CHANCHIN SUINA 27:23

Nisienlakhawm, David chun kum sâwmhni le a hnuoi tieng chu an nizât a lâk naw a; Lalpa chun Israel chu vâna arasi zâtin a sukpung ding a nih ti a lo hril ta lei khan.

INPÂKNA HLABU 72:17

A hming chu kumkhawtluongin dei naw ni a. A hming chu ama a um sûng chu dei lovin um pei a ta, Mihai chu amaa chun malsâwmin um an ta, Hnam tinrêngin ama chu hamṭha tîng an tih,

FESUOKNA 32:13

I siehlawhai Abraham, Isak le Israel kuoma nangma le nangma inkhâma, ‘I thlahai chu vâna arasihai angin sukpung ka ta; hi ram po po ka hril ta hi in thlahai kuomah pêng ka ta, kumkhuoin hluong an tih,’ tia i hril kha hre zing rawh,” a ta.

FESUOKNA 6:4

Khuolchâm anga an umna ram, Kanaan ram chu anni pe dingin an kuomah thuthlung ka siem bawk a.

THILTHAWHAI 3:25

Nangni hi zâwlneihai le thuthlung nauhai in nih, Pathienin Abraham kuomah, “ ‘I thlahai leiin khawvêla hnam tin thawveng an tih,’ tiin in thlatuhai kuomah a tiem kha.

GALATI 3:16

Chun, Abraham kuomah a nih thu chu tiema a lo um chu, a chithla kuoma khawm. Mi tamtak chungthu hril angin, “Chithlahai kuoma khawm,” a ti naw a, mi pakhat chungthu hril angin, “I chithla kuoma khawm,” a ti lem a nih, chu chu Krista chu a nih.

GALATI 3:8

Pathien Lekha thu chun, Pathienin ringna leiin Jentailhai thiem ân changtir ding a nih ti hre lâwkin, “Nangmaa chun hnam tin malsâwmpêkin um an tih,” tiin Abraham kuomah Chanchin Ṭha chu a hril lâwk kha.

DÂN PAHNINA 13:17

Râllâk sum chu a ieng ieng khawm in tâwk ding a ni nawh, Lalpa chun a lungsenna nasatak chu inlêt a ta, zângaina inhmutir a ti cheu a, lunginsiet a ti cheu a, a sukpung ding cheu a nih; in pi le puhai kuoma ṭawng a lo inkhâm ta ang khan;

DÂN PAHNINA 9:5

In fel leiin amanih, in lungril indik leiin amanih an ram chu in hluo ding a ni naw a, hieng hnamhai suol lei le Lalpa in pu Abraham hai, Isak hai, Jakob hai kuoma ân khâmna thu suknghet dingin Lalpa in Pathienin anni chu a hnawt suokpêk ding cheu a ni lem.

HEBRAIHAI 11:2

Chutaka chun upahai khan inpâk an hlaw si a.