DÂN PAHNINA 11:1 - Pathien Lekhabu Inthieng (BSI)

¹ “Chuleiin, Lalpa in Pathien chu in hmangaiin a thuruothai, a dânhai, a rorêlhai, a thupêkhai chu in zâwm rawp ding a nih.

DÂN PAHNINA 11:1 ပူးပေါင်းရင်းမြစ်များ

INPÂKNA HLABU 105:45

A thuruothai chu an zâwm thei a, A dânhai chu an vawngṭhat theina dingin. Lalpa chu inpâk ro.

INPÂKNA HLABU 116:1

Lalpa chu ka hmangai a nih, ka râwl le Lunginsiet ka hninahai chu a ngai leiin.

EZEKIEL 20:19

Lalpa in Pathien chu kei ka na, ka thuruothai chu hraw unla, ka rorêlhai chu pawm unla, thaw ro;

LEVI DÂN 18:30

Chuleiin, hieng an thil chîng tirdakumhai hi in chîng ve nawna dingin, thupêk hi in zâwm ding a nih; chuong thilhai chun insukpawrche ngai dêr naw ro: Kei hi Lalpa in Pathien chu ka nih,’ ti rawh,” tiin.

LEVI DÂN 22:9

Chuleiin, ka thupêk chu an pawm ding a nih, chuong naw chun suol maw chu phurin, anni insukpawrchein thi pal rawi an tih: Kei hi Lalpa anni sukthiengtu chu ka nih.

LEVI DÂN 8:35

Intuokna puon in kawtkhâr bula chun ni sari, sûn le zân um zing in ta, in thi nawna dingin Lalpa thupêk chu in zâwm ding a nih, chuong anga thu pêk chu ka nih,” a ta.

ZEKARIA 3:7

“Sipaihai Lalpa chun hieng ang hin a ti a nih, ka lampuihaiah i fe a, ka iphût chu i thaw bawk chun, ka insûng ro rêl i ta, ka in inhuonna tuollaihai chu vawng ṭha bawk i tih. Chun, hitaka ngirhai lai hin um ve theina pêng ka ti che.

DÂN PAHNINA 10:12

“Khai le, Israel mihai, nangnia inthawka Lalpa in Pathienin a phût chu ieng dang khawm a ni naw a, in ṭhatna dinga Lalpa in Pathien in ṭi a, a lampui po po chu hraw a, ama hmangai a, in lungril po po le in lungvar po poa Lalpa in Pathien rawng bâwl a,

DÂN PAHNINA 11:13

“Chun, Lalpa in Pathien chu hmangai ding le in lungril po po le in lungvar po poa a rawngbâwl dinga ka thupêk tuta ka pêk cheu hi ṭhahnemngaitaka in zâwm chun,

DÂN PAHNINA 11:22

“Lalpa in Pathien chu hmangai ding le, a lampui po po hraw ding le ama chel tlat dinga ṭhahnemngaitaka hieng thu ka pêk cheu thupêk po po hi in zâwm phawt chun,

DÂN PAHNINA 13:4

Lalpa in Pathien chu zui in ta, ama chu ṭîng in ta, a rawng dâm bâwl in ta, ama chu in chel tlat ding a nih.

DÂN PAHNINA 27:10

Chuleiin, Lalpa in Pathien thu chu in awi ding a nih; vawisûna thu ka ipêk cheua thupêkhai le dânhai chu in zâwm ding a nih,” tiin.

DÂN PAHNINA 30:6

In hring theina dinga Lalpa in Pathien chu in lungril po po le in lungvar po poa in hmangai theina dingin Lalpa in Pathienin in lungril le in thlahai lungril ser chu tanpêk a ti cheu a.

DÂN PAHNINA 4:1

“Khai le, Israel mihai, Lalpa in pi le puhai Pathienin ram a pêk cheu chu dama in hluo theina dinga in pawm dinga ka închûktir hlak cheu dânhai le rorêlhai chu lo ngai ta u.

DÂN PAHNINA 4:40

Kumkhuoa dinga Lalpa in Pathienin a pêk cheu rama chun nangni le in thlahai ta dinga ṭha le in chêng sâwt theina dinga thuruothai le thupêkhai, tuta ka pêk cheu hi in zâwm ding a nih,” ti hi.

DÂN PAHNINA 4:5

Ngai ta u, in va hluo ding rama khawm in zâwm pei dingin Lalpa ka Pathienin thu a mi pêk ang takin dânhai le rorêlhai chu kân chûktir cheu a.

DÂN PAHNINA 5:1

Chun, Mosiein Israelhai po po chu a ko khâwm a, an kuomah, “Aw Israel mihai, in inchûka in pawm dinga dânhai, thuruothai, in na hrieta vawisûna ka hril hi lo ngai ro.

DÂN PAHNINA 5:29

Chuong ang lungril chu put hlak hai sien chu aw, mi ṭîng an ta, ka thupêkhai chu zâwm rawp an ta, anni le an nauhai khawm kumkhawtluongin an tluongtlung hle ding bah!

DÂN PAHNINA 6:1

“Chun, hluo dinga in va kaina rama in zâwm dinga Lalpa in Pathienin nangni inchûktir dinga thu a mi pêk, thupêk dâm, thuruot dâm, rorêl dâm chu hieng hi an nih;

DÂN PAHNINA 6:5

Lalpa in Pathien chu in lungril po poin, in lungvar po poin, in hrâtna po poin in hmangai ding a nih.