DANIEL 7:14 - Pathien Lekhabu Inthieng (BSI)

¹⁴ Chun, ama chu mi po po le hnam po po le ṭawng tinrêngin, A rawng an bâwl theina dingin a kuoma chun Rorêlna dâm, ropuina dâm, lalram dâm an pêk a, A lalram chu chatuon lalram bo ta ngailo ding le, A ram suksieta um ta ngailo ding chu a nih.

DANIEL 7:14 ပူးပေါင်းရင်းမြစ်များ

INPÂKNA HLABU 102:22

Lalpa rawngbâwl dinga, Mi tin le ram tin an inkhâwm pha chun.

INPÂKNA HLABU 103:19

Lalpa chun a lalṭhungpha chu vâna khin a sukdet a, A ram chun iengkim chungah ro a rêl a.

INPÂKNA HLABU 145:13

I ram chu chatuon ram ding a na, I thuneina chu suon um sûng po poin um zing a tih.

INPÂKNA HLABU 146:10

Lalpa chu kumkhawtluongin lalah ṭhung a ta, Aw Zion, i Pathien chu suon po po chenin lalah ṭhung a tih. Lalpa chu inpâk ro.

INPÂKNA HLABU 45:6

Aw Pathien, i lalṭhungpha chu chatuonin a um ding a nih, Thlierbîkna nei lona lalhmawl chu i ram lalhmawl chu a nih.

INPÂKNA HLABU 72:11

Anih, lal po po chu a hmaah bawkkhup an ta, Hnam tinrêngin a rawng bâwl an tih.

INPÂKNA HLABU 72:17

A hming chu kumkhawtluongin dei naw ni a. A hming chu ama a um sûng chu dei lovin um pei a ta, Mihai chu amaa chun malsâwmin um an ta, Hnam tinrêngin ama chu hamṭha tîng an tih,

INPÂKNA HLABU 8:6

I kutsuokhai chunga hin thu în neitir a; A ke hnuoiahai iengkim i sie a:

ISAI 16:5

Chuongchun, lalṭhungpha chu lunginsietnaa sukdetin um a ta, chu chunga chun, David puon ina chun, mi pakhat, rorêlin, rorêlna fel zawngin, thil fel inhmâwtaka thaw nghâlin, titakzetin ṭhung a tih.

ISAI 60:12

I rawng bâwl nuom naw hnam le ram chu a bohmang âwm si a; anih, chuong hnamhai chu suksiet dêrin um an tih.

ISAI 9:6

Ei ta dingin naupang a hung pieng a, naupa pêkin ei um ta a; rorêlna chu a liengkoah chuong a ta, a hminga chun Remruottu Mak, Pathien Hrât, Chatuon Pa, Remna Lal an ti ding a ni si a.

ISAI 9:7

David lalṭhungpha chunga le a ram chungah a rorêlna pungzie le inremnain tâwpintai nei naw nih, sukdet ding le tuta inthawka chatuon chen khawma rorêlna le felnaa tungding dingin. Sipaihai Lalpa ṭhahnemngaina chun chuong chu thâwng a tih.

DANIEL 2:35

Chun, thîr dâm, pil dâm, dârsen dâm, tangkaruo dâm le rângkachak dâm chu inang rawngin an innawi ta a; nipui laia hrizâwlhaia busi ang el an hung ni ta a; chun, anni ta ding hrimin hmun hmu a ni ta naw a, thli chun a lên hmang vawng ta a; chun, kha lung milim deltu kha tlâng ropuitak a hung na, khawvêl po po a hluo sip ta a.

DANIEL 2:37

Aw lalpa, nang chu lalhai lal, vâna Pathienin ram dâm, thilthawtheina dâm, hrâtna dâm le ropuina dâm a pêk che chu i nih;

DANIEL 2:44

Chun, chuong lalhai huna chun vâna Pathien chun suksieta um ta ngailo ding le, lal nina chu mi dang kuoma pêka um ta ngai lo ding ram pakhat hung siem suok a ta; chuongchun, chuong ramhai chu kawi tamtaka hung sukkawiin, hung kânghmang a ta, kumkhuoin ama chu um ta lem a tih.

DANIEL 3:4

Chun, tlângsam chu inringtakin a hung khêk a, “Aw mipui po pohai, hnam po pohai le, ṭawng po pohai, in kuomah hieng anga thupêk hi a nih:

DANIEL 4:3

Ân chiknahai chu a va ropui ngei de! A thilmakhai chun thil a va thaw thei ngei de! A ram chu chatuon ram a na, A rorêlna khawm chu ṭhanga inthawk ṭhang nâwksâwng chen a nih.

DANIEL 6:26

Thupêk chu ka siem a; ka ram leilunga mi po pohai chun Daniel Pathien chu ṭiin a hmaa chun inthin raw hai se. Ama chu Pathien hring, chatuona pângngai zing a ni si a, A ram khawm chu suksiet ni ngai naw ni a, A rorêlna chu chatuonin um zing lem a tih.

DANIEL 7:18

Nisienlakhawm, Achunghnungtak mi inthienghai chun ram chu chang an ta, chatuon, chatuon chenin ram chu nei an tih,’ tiin.

DANIEL 7:27

Chun, vânhnuoia ram le lalram le ram ropuinahai chu Achunghnungtak mi inthienghai hnam kuoma chun pêk nîng a ta, ama ram chu chatuon ram a na, ram po pohai chun a rawng bâwl an ta, ama thu awi an tih,’ tiin.

OBADIA 1:21

Zion tlânga chun Esau tlâng rêlpêk dinga sansuoktuhai hung an ta, chun ram chu Lalpa ta nîng a tih.

MIKA 4:7

kebai chu hlâbîkah siem ka ta, hlataka hnawt hmanga um chu hnam hrâttakah siem ka tih: tuta inthawk chu Zion tlângah kumkhuoin Lalpa chun an chungah ro rêl a tih.

MATTHAI 11:27

Ka pain thil iengkim a mîn kawltir tah; Pa naw chun Naupa hi tukhawmin an hriet nawh. Chun, Naupa le Naupain a puong nuomnahai chau naw chun tukhawmin Pa chu an hriet bawk nawh.

MATTHAI 28:18

Chuongchun Isu chu an kuomah a hung a, anni rawi chu a biek a, “Hnuoi le vâna thuneina po po ka kuomah pêk a ni tah.

LUKA 1:33

Jakob thlahai chungah chatuonin inlal a ta, a ramin tâwp ni nei naw ni,” a ta.

LUKA 10:22

Ka Pain iengkim a mîn kawltir tah, Naupa chu tû am a na, Pa naw chun tukhawmin an hriet nawh; Pa khawm chu tû am a ni Naupa le an kuomah Naupain a phuong nuomnahai chau naw chun tukhawmin an hriet nawh,” a ta.

JOHAN 12:34

Chun, mipui chun a kuomah, “Krista chu chatuonin a um zing ding a nih ti Dân Lekhabuah kan hriet ie, nangin, ‘Mihriem Naupa khaikângin a um ding a nih,’ ieng ti tia ti am i na? Chu Mihriem Naupa chu tu am a na?” an ta, an dawn a.

JOHAN 3:35

Pa chun Nau a hmangai a, a kutah iengkim a rêngin a pêk tah.

HEBRAIHAI 12:28

Chuongchun, ram sukhnîng ruol lo ei chang leiin, lâwmtakin um ei tiu, chu zâra chun inza le ṭidêk pumin Pathien lâwm zâwngin rawng ei bâwl thei ding a nih;

1 PETER 3:22

Isu Krista chu vâna fein, Pathien chang tieng a um a, vântirkohai dâm, thuneina dâm, thilthawtheina dâm, ama thu thua inumtirin a um.

THUPUONGSUO 1:6

khuoletui le a Pathien le a Pa tienga thiempua mi siemtu kuomah, anih, ama kuom ngeiah, ropuina le rorêlna chu chatuonin um raw se! Amen.

THUPUONGSUO 11:15

Chun, vântirko pasarina chun a hang mût a, chuongchun, “Khawvêl ram chu ei Lalpa le a Krista ram a hung ni tah, ama chun chatuonin ro rêl a tih,” tiin vâna chun rawl inringtakin a hung suok nghâl ta a.

THUPUONGSUO 17:14

Chuongchun, Berâmte chu do an ta, chun, Berâmte chu hotuhai Hotu le lalhai Lal a ni leiin anni chu hnêng a tih; chun, a kuoma um, kohai, thlanghai, ringumhai chun hne bawk an tih,” a ti a.

THUPUONGSUO 3:21

A hnetu taphawt chu ka lalṭhungphaah ka kuomah inṭhungtir ka tih; kei khawmin ka hne a, ka pa kuomah lalṭhungphaa ka ṭhung ang khan.