2 Tesalonaika 1:8 - U Bulunagana U Niga

⁸ Ba nonei temi hahuna ranou romana u katuun tema atei sileri e Sunahan na nori has te hipus ner u Bulungana u Niga tere Iesu Kristo a Tsunono i tarara.

2 Tesalonaika 1:8 ပူးပေါင်းရင်းမြစ်များ

Matiu 25:41

“Ba lia te ranga meragou u katuun tara pal keruka i tar, ‘U katuun te hamalir e Sunahan, laba nemou lia ba limiou te la uamiou turu tula te ka nitöana, ti kato hahaloso bei e Satan na u angelo i tanen.

Matiu 25:46

Ti markato uaien teka ba u katuun teka tena lue riou u nihahuna te ka nitöana, ba u katuun u matskö tena lue riou a nitöatöa te ka nitöana.”

U Bulungana u Niga tere Iesu Kristo te kolotein e Jon 3:19

U kout e markato uana teka: u ualesala e la uama i puta. U ualesala teka e haharuei nena a niateina tara manka hamana tere Sunahan. Ba u katuun te ngiler u kuhil bate rama ner u ualesala, taraha nori ema ka meri ta markato ta niga.

U Bulungana u Niga tere Iesu Kristo te kolotein e Jon 8:19

Ba nori e poeier i tanen, “Ime te kana e tamamölö?” Be Iesu e poeiena, “Alimiou ema atei sile milia na limiou ema atei sil hasemi e Tamar. Tego atei sil memi limiou alia, alimiou e antunan atei sil hasemiou e Tamar.”

Aposol 6:7

U raranga tere Sunahan e tasata susul noahas. Na u hihase turu katunun tsitsilo i Jerusalem e para susul koru hamanasa tala, na para koru has a man pris turu Jiu i hengo koru talei u nihamana teka.

U pas te koloto menai e Pol turu kristenira i Rom 1:28

U katuun ima hakats nai e Sunahan na i raman ka mei a niatei a niga, ba nonei e töa rongaronga ranen tegi ka noahas menaien u hakats u omi na tegi kato homi has menaien a markato a omi.

U pas te koloto menai e Pol turu kristenira i Rom 1:5

E Iesu Kristo e hala railam a nitagala tego aposol uu lam i tanen, ba lam te hatei namen turu hun katuun hoboto tegi hamana uaien i tanen, bate hengo hanige ren.

U pas te koloto menai e Pol turu kristenira i Rom 10:16

Kaba u katuun hoboto ema hanigeri u Bulungana u Niga. Taraha e Aisaia a propet i manasa e pei hasi, “O Tsunono, e möa ta katuun ta para tega hamani u ranga i tarara.”

U pas te koloto menai e Pol turu kristenira i Rom 15:18

Alia ema hatei nagi a palaina toukui i tar, kaba lia ema matoutin hatei nagi a toukui te kato sila naia e Kristo i tar, tegi taguhu merai u katuun tema Jiu ri bate hengoeier e Sunahan. A toukui teka alia u kato meien u raranga na markato a niga, na u mirakol, na nitagala turu Namnamei tere Sunahan. Alia u taniaia i Jerusalem me la nitöa uagu i Ilirikum tu hatei lala naia lia a man ranga hoboto turu Bulungana u Niga tere Kristo.

U pas te koloto menai e Pol turu kristenira i Rom 16:26

Kaba i romana e butu halesalana i matar u katuun. Na u raranga ti kolotein u propet e halakasi a nimana tere Sunahan, a Sunahan te ka nitöana. E Sunahan e hakei u raranga u tagala tegi habulungana menai u raranga teka turu katuun hoboto, ba nori te tatei hamana ria i tanen bate hengo hase ren.

U pas te koloto menai e Pol turu kristenira i Rom 6:16

Alimiou go atei sil haseiam, te hengo mena milimiou a töa katuun, ba limiou te kui pinopino tuun moa i tanen. Na te kukute mia limiou a markato a omi, ba nonei te piata mera noi limiou tara tou mate. Kaba te hengoe mia limiou e Sunahan bate kukuteimen, a nikaka i tamilimiou e matskö nitöana i matanen.

1 Korin 15:34

La pouts muma turu hakhakats u haniga bate hanöa ba namiou a man markato a man omi taraha a palai ema atei sil noeri e Sunahan. Alia e ranga sila gia tara nimatsingolo i tamilimiou.

2 Korin 10:5

Alam e kato ba nem a mamanaka te hatu kap nena na te hipus nena tegi atei sil menai u katuun e Sunahan. Alam e palis hasem u hakhakats turu katuun te omi korur bate kukuteier u ranga tere Kristo.

Galesia 3:1

Alimiou u katunura i Galesia alimiou u katuun u tutu. Alam u hatara hakapa rai limiou e Iesu Kristo, te mate uaien tara kuruse tego luba menaien a man markato a man omi.

Galesia 4:8

I manasa alimiou ima atei silemi e Sunahan bate hererami u katunun kui tara man got gamogamo.

Hibru 10:27

Aragi matout lasi u Kout tere Sunahan na u tula te ats hahiski nitöana tena ats ria romana u katuun te omier e Sunahan.

Hibru 10:30

Ara e atei silera e Sunahan e mar ranga uu teka, “Alia tena hipou gou romana. Na lia noahas tena palise gouen romana.” Na nonei e pei hasi, “A Tsunono noahas tena ona ranou u katuun i tanen.”

Hibru 11:8

Te hamana menai e Abraham e Sunahan me hengoena te ngö menaien tega la uaien tara han tena hala nanouen, temar ranga uu e Sunahan. Be Abraham e laba nena han i tanen, kaba nonei ema atei sile ii ime tega la uaien.

Hibru 12:29

Taraha, e Sunahan i tarara e here nei u pan nen u tula te ats koruna.

Hibru 2:3

Kaba u raranga tere Iesu e pan bala nena u raranga turu angelo, na ra e möa koru tegi bus ba menai a nihahuna te totone rara a markato a niga koru teka, te lu pouts mera neira e Sunahan. A Tsunono e Iesu noahas te habulungana mamin a maroro teka te lu pouts mera nei e Sunahan u katuun, na u katuun ti hengoeien i haröto raira u raranga teka e manana.

Hibru 5:9

Be Sunahan e katoe neien a pris te niga saluhe koru. Ba nonei te taguhu rena u katuun hoboto ti hengoeien bate hala raneien a nitöatöa te ka nitöana.

1 Pita 1:2

E Sunahan e Tamarara e atei sil hakapa raiou limiou me hopö kap mera nei limiou i tanen ba u Namnamei i tanen e kato ranei limiou u katuun u göagono i tanen. Tara markato ti maniata memien limiou, ba limiou te galus raroui u rahatsing tere Iesu Kristo. E Sunahan ega hala rai limiou a nitaatagi na masalohana pan koru.

1 Pita 3:6

E Sara e markato has uu teka. Nonei e hengo korui a tson i tanen e Abraham me ngöe neien “A tsunono i tar.” Na te kato haniga moua limiou ba tema matoutemi ta ka, alimiou e here hamanasa talemi a galapien touhaliou tere Sara.

1 Pita 4:17

A pöata tega hatanian ona merai e Sunahan u katuun e butu hakapa, na nonei e ona mam ranou u katuun i tanen. Na te hatania nen romana i tarara, ga ime tena mar kapa uanoen romana turu katuun te hipus ner u Bulungana u Niga i tanen?

2 Pita 3:7

Ba turu töa u mar raranga noahas u kolö na u puta e hahaloser a pöata tega kato homi lel meraien u tula. A han i puta na i kolö e hahaloser a pöata te kout mera noi e Sunahan u katuun u omi bate kato hataia ranen.

U pas te kolotein e Jut 1:7

Alimiou e atei sil hase miou a taun i Sodom na i Gomora na palair u taun has i rehiren. U katuun ti kaia tara man han teka i kato hohomi koru mei a peisaren ti hiakaka gono pouts u a pal tson na touhaliou has. Na ka teka e haröto nena ime temar hahuna mera neien romana, u katuun u omi turu tula te kulupu nitöana.

Revelesin 20:10

Be Satan, te gamo raien, te lapo töatöa naroua iahana kiou pan te saputena u pannen tula u ahiin tuun. Tara makum teka e lapo mam raroua a ka a omi a töatöa na propet a gamogamo, be muriren be Satan te töan lapo naier. Ba nori te kamits homi korur romana tara lan na bong tara mamana pöata i murimuri.

Revelesin 21:8

Kaba u pata bulbulu, na pala te hahamanar, na u katuun te hakats homir, na u hihipuli, na u tsiktsikolo na u lulu tson, na u matmatuna, na u gamogamo na u katuun te hatsunoner u kesa, a han i taren e kana romana iahana kiou pan te kulupuna u tula u ahiin u hiski koru. A ka teka nonei a hahuoluna tou mate.”

Revelesin 6:10

Ba nori e ku hapanir me poeier, “O Tsunono, alö te pan korum tara mamanaka, na lö a göagono na lö hamana. I hangisa balö te hakapem a niomi turu katuun i puta bate katoeiem a hipou i taren ti atung hamate meraien lam?”