1 Txemohtyo 2:1 - Hixkaryána Novo Testamento

¹ Wahoro htxero onà wyaro àkehe, àton kom hoko. Khoryenkom yakoro hak nàrwonàmtxowà, anar kom hoko, omeroron kom hoko. Apa y, noro hoko ryhe kàrwonaha, ayakoro, katxow haka. Apa y, noro akoronomako nyhe, katxow haka. Apa y, noro txko ryhe mewakryeko. Ohxe xaxa manaha, katxow haka. Àro wyaro hak nàrwonàmtxowà, àton komo, anaro rha toto kom hoko,

1 Txemohtyo 2:1 ပူးပေါင်းရင်းမြစ်များ

2 Tesaroneka 1:3

Rowtà komo y, onà wyaro amna nkehe, Khoryenkomo wya, ohokonye. Ohxe xaxa natxow hatà, nyamoro. Ohxe xaxa manay hamà, àhokonye, kehe rye rma haxa amna, àwya, ohokonye. Àro wyaro tkahorye rma haxa naha, owyanye Kryestu hona rma haxa xenyàr ke, osoxe rma haxa oyesnàr kom ke xarha.

Txaku 5:16

Àro ke, meya rha oskarymatxoko, ayanhàn kom hoko. Khoryenkom yakoro orwonàmtxok xarha, ohokonye rma, àwya oyonyhoryetxho menye. Enyhoru kom hak nàrwonàmtxowà, Khoryenkom yakoro. Eyukhunuhnu me nàrwonatxhe, enyhoru komo. Àrwonàmrà kom ke ryhe, tahoxetà yonyhehe, Khoryenkomo.

Ehfesu 5:20

Apa y, ohxe amna meryan hamà, kanye ro me ehtxoko, Khoryenkomo wya, kyàmkomo wya. Àsok kom oyehtokony hana, àro hoko rma onà wyaro katxoko. Apa y, ohxe uro menyo, katxoko, àwya. Onà wyaro katxok xarha, àwya. Àro wyaro rma àkehe, Txesusu Kryestu yano me, Kohkom yano me, katxoko, àwya.

2 Txemohtyo 2:24

Kohkom yanoto me kehtoko ryhe, tosoyhoryehra tehxaha. Towahke haxa tehxorye tehxaha, toto kom hoko, omeroron kom hoko. Hananàhno ynye me tehxorye tehxaha. Hananàhno ytxoho hoko ryhe, tàywero tehxorye tehxaha. Towakàhkahporyehra tehxaha.

1 Txemohtyo 2:4

Toto komo yonyhoryenàr xe rma haxa naha. Omeroron komo yonyhoryenàr xe rma haxa naha. Àwyanye yaworon xaxa hutwanàr xe rma haxa naha, noro ha.

Feryepos 1:3

Ohutwahkahpàranye wehxaha. Rowya ohutwantokonye rma, ohokonye rma kàrwonaha, Khoryenkom yakoro. Ohokonye rorwonàmnàtoko rma, teryehorye roro rma haxa kàrwonaha. Onà wyaro àkehe xarha, Khoryenkomo wya, ohokonye. Apa y, ohxe rma haxa nyamoro meryatxow hamà, àkehe, àwya. Apa y, thenyehra rma haxa rakoronometxhe, rowya àrwo yonyhorunu yokarymatxho me, àkehe, àwya. Apa y, àro wyaro rma rakoronometxkonà, amnyehra, tàwyanye Kryestu yahosàtxhe rma. Amnye rma xarha rakoronometxhe rma. Apa y, rakoronomanye ro me nyamoro meryatxow hamà. Ohxe xaxa manay hamà, àkehe. Àro wyaro rma àkehe, Khoryenkomo wya, ohokonye.

Ekmàryewyana komo 6:11

Khoryenkom yomyawon hoko roro rma haxa atamohtxoko, awayehpàra ronye rma haka. Khoryenkomo wya oyowakryetxho kom hona ro manatxow hamà. Amnye oyowakryetxhe xaxa hampànà. Àwya oyowakryehra ronye rma haka, àhoko roro rma haxa ayatamoknyàr komo xe wehxaha,

Txetu 3:2

Wàràhyakano yhera ro mak ehtxoko, kasko, àwyanye. Osoyhera ro mak ehtxoko. Towahke roro ehtxoko, kasko. Toto kom hoko, omeroron kom hoko rma, towahke roro rma haxa ehtxoko, kasko, Kryestu mryenon komo wya.

Txetu 2:11

Àro wyaro ohxe roro tehxorye natxhe, tanotomaxemà ro komo. Àsok tawro hana. Omeroron komo yonyhoryenàr horà ryhe, towahkem me xaxa nosonyhoy hamà, Khoryenkomo, ehonomnà komo rma yonyhoryenàr horà, norohnàtho komo xarha yonyhoryenàr horà.

1 Txemohtyo 5:5

Anar komo ryhe, enyonkaxemo komo rma, ewakryehnà ro me natxow hamà. Àyanamra mak natxow hamà. Àro ke, Khoryenkom hona ro rma haxa wehxaha, kanye ro me xaxa natxhe, nyamoro ha. Khoryenkom yakoro tàrwonyemà ro me xaxa natxow hamà. Kohsaya xarha, awasnaw xarha, tàrwonyemà ro me natxow hamà. Apa y, uro nyhe txko ewakryeko, kanye ro me natxow hamà, àwya.

1 Koryentu 15:3

Ronenytxatxhàrà rma wekarymaye, owyanye. Onà wyaro katxho komo ryhe wekarymaye, Kryestu wayehye, tàwya kanhànàthàyamo yowtoho me, katxho rma, àmenhosahonhàr yawo ro rma wayehye, katxho xarha,

Txesusu Nànyaketxho ro komo 17:30

Khoryenkom hutwahra nehxatxkonà, toto komo, amnyehra, kekon hatà. Atxke manatxhe, rohutwahra oyesnàr komo ke, kahra mak nehxakonà, àwyanye. Onà wyar haxa nkehe, amnye rma, kàwyanye, omeroron komo wya, anaro rha owto hon komo wya. Anar me harha ayanhànàthàyamo xenytxoko, kehe, kekon hatà, Pawru.

1 Tesaroneka 3:12

Ohokonye rma haxa amna nàrwonaha xarha. Osoxe rma haxa txetxoko, kehe amna, ohokonye, Kohkomo wya. Toto komo xe rma haxa txetxok xarha. Omeroron komo xe rma haxa txetxoko, kehe amna. Àro wyaro rma rha oxenye rma haxa amna naha.

Homa 6:17

Amnyehra, ayanhàn kom yanoto me rma haxa mehxatxkon hamà. Amnye rma haxa, yaworon xaxa yonytxanyenhàr me harha manatxow hamà. Yaworo xaxa àhananàhsah me harha manatxow hamà. Yaworon xaxa yoyuknye me harha manatxow hamà, ohnawonye ohxe harha oyehutwanàr kom ke. Ayanhàn kom yanoto mehra harha manatxow hamà. Khoryenkom yanoto me harha manatxow hamà, noro nenyhoryetxho me oyesnàr kom ke. Àro ke, onà wyaro àkehe, Khoryenkomo wya, ohokonye. Apa y, ohxe xaxa manaha, nyamoro hoko, àkehe, àwya.

Homa 1:8

Onà wyaro htxero àkehe, owyanye. Oyokaytà komo yonytxatxownà, toto komo, omeroro. Txesusu Kryestu hona rma haxa nenyatxhe, nyamoro ha, ketxhe, ohokonye. Àro ke, onà wyaro àkehe, Khoryenkomo wya, ohokonye, Txesusu Kryestu yano me mak ha. Apa y, ohxe xaxa manaha, àhokonye, àkehe, àwya.

2 Koryentu 8:6

Àro ke, onà wyaro àkeknano, Txetu wya. Koryentu hon kom wawo oyehtoko, nyamoro màhananàhyatxkonà rma, ànyahpàn komo yowakryenàr hoko, àkeknano, àwya. Nyamoro rma nàmyatxkonà, tàtxenyerun kom hoye. Tàmtàhkahra rma natxhe. Àro ke, àhyakany harha àtok hampànà, owya tàmtàhkany me txetxoho menye, àkeknano, Txetu wya, ohokonye.

Ehfesu 3:13

Àro ke, onà wyaro àkehe, owyanye. Towankaryhe rma ehtxoko. Teryewhamnohsom me wehxan hamà, rowya ahananàhrà kom ke, rowya Xuknewyanahnà komo rma hananàhrà ke. Teryewhamnohsom me ryehtxoho hoye ro, anatoko oyowankaranatxow hana. Ewankaramra ro mak ehtxoko. Àsok tawro hana. Ryeryewhamnohtoho hoye ro ryhe, ohxe roro rma haxa oyeryatxhe, Khoryenkomo.

Ehfesu 6:18

Orwonàmtxoko roro, Khoryenkom yakoro. Noro yokato yohà rma, orwonàmtxoko roro, akoro. Àsok oyesnàr komo xe oyehtokony hana, àro hoko rma orwonàmtxoko. Thona ro rma haxa ehtxoko, orwonàmrà kom horà. Amotohpàra ro mak ehtxoko. Kryestu mryenon kom hoko xarha orwonàmtxoko, omeroron kom hoko rma.

Feryepos 4:6

Oseryehokahra ro mak ehtxoko. Khoryenkom yakoro haxa orwonàmtxoko. Àsok oyesnàr komo xe oyehtokony hana, àro hoko rma orwonàmtxoko. Eten komo xe oyehtokony hana, àro hoko rma, apa y, tàmko nyhe rowya, katxoko. Àro wyaro orwonàmnàtokonye rma, onà wyaro katxok xarha, àwya. Apa y, ohxe xaxa manay hamà, rohoko, katxok xarha, àwya.