Yakobus 1:2 - Buk Niu In Hida Balu nol Dehet deng Apan-kloma ki in Dadi ka

² Kaka-pali me! Auk le tek elia: eta mi tom in susa-daat bili-ngala kam, mi in makoe ka senet deken. Simun nol dael kolo tuun, ta mam mi in hapu ka banan.

Yakobus 1:2 ပူးပေါင်းရင်းမြစ်များ

Dehet deng Aan in Nutus sas 5:41

Kon nam aan in nutus nas putis lakos nang soleng maan in nehan dasi ka. Oen nangan noan, oen ngalan nas daat son, undeng in muid Lamtua Yesus, mo oen dalen kolo, lole Ama Lamtua Allah tana noan, eta oen haup in susa ela lam, toma. Undeng na, tiata oen dalen kolo isi.

Roma 5:3

Kit haup susa-daat bili-ngala elol kon no, kit dalen kolo tutungus. Ta kit tana noan, kit tui deng in susa ka, le halin kit tahang nal nol muun dui pait.

Filipi 1:29

Ta Ama Lamtua Allah sai lalan son, le mi parsai nal se Kristus, nol daid Un atulin. Molam suma parsai tuun lo, ta in dudui pait ta, Un kon bel dola le mi haup in susa, undeng mi muid Una.

Filipi 2:17

Mo eta noan muik in keo tele au, le daid in sui-nahat halin mi in parsai ka tes taplaeng, le lako-daek Ama Lamtua osa la lam, auk sium nol dael kolo. [Na banansila el tulu agama la in doan ui anggor se mija in tunu-dadung nga le todan-lahing se Ama Lamtua ka]. Nini ela lam, kit dalen kolo leo-leo, undeng in sui-nahat na, parsum lo.

Kolose 1:24

Dedeng Kristus nuli se apan-kloma kia ka, Un haup susa-daat mamo. Nol halas ni auk kon lepa-haal susa-daat bili-ngala. Ela kon no, auk daleng ngi kolo tutungus. Eta muik atuli in haup susa-daat tam, nang le auk man lepa-haal in susa-daat na bel one, banansila el Kristus lepa-haal susa-daat bel Un atulin nas sa. Lole Un atulin nas, daid banansila el Un apa ka.

Ibrani 10:34

Mi dalen kasiang nol namnau atuil man tom in pasang tamang lakos se bui dalen nas. Eta atuil in nako ngas, naok lail-niin mi sa-saa las sam, mi sium nol dalen banan tuun, undeng mi taan son noan, mam mi sium seda sa-saa man in banan dui, man atuli li naok lail-niin nalan lo.

Yakobus 1:12

Ama Lamtua bel hangun se atuil in tahang didiin, puti nal deng in sukat-soba ngas. Hidim oen sium in nuli, man Ama Lamtua hid meman son le belen se atuil in namnau Una ngas. Oen sium in nuli na banansila el atuil in nala, sium piala ka.

Yakobus 1:16

Kaka-pail in namnau me! Tom in nole deng nias totoang deken.

Yakobus 1:19

Kaka-pail in namnau me! Nangan ni babanan: atuli li aa kam, aa dadahut tuun deken. Molam in banan dui ka, eta atuil didang aa dais banan nas sam, oen tidi hngilan le hii babanan muna! Nol boel komali hlapat deken.

Yakobus 5:11

Eta muik atuli in keeh nal se susa dalen nam, kit kom in nikit-nikit atuling na ngala ka. Tuladang el upung Ayub. Un haup susa-daat bili-ngala, mo un tahang nala. Kon nam Ama Lamtua namnau una, hidim daek banan nas totoang bel Ayub. Ama Lamtua daek ela, undeng Un dalen na banan, hidim inu nol in namnau.

Petrus dua la 2:9

Dehet nas totoang tulu bel noan, Ama Lamtua Allah taan lalan in bel slamat atuil man hii-ming se Una, nol tahang nal se in sukat-soba dalen nas. Un kon niung hukung ngele, bel atuil man in nuli ka tom lo ngas. Un tao napiut ela, didiin oras Un in nutus totoang atuli li dasi las sa.

Apan-kloma Hnika Balu 2:10

Tiata hii babanan ne. Eta mi haup in susa nabale lam, lii deken. Sadi mi taan tukun, uikjale kas laih tuan na le nuting mia, le daek tamang mi tenga las lakom bui dalen, didiin lelo hngulu. Un in koma ka le mi bali kudi nang soleng Au. Oen keo tele mi kon no, mi nadidingun Auk deken. Ta asii man tahang le muid Auk didiin un mate kam, mam Auk baen un in daek ela ka, le halin un nuli leo-leo nol Auk tutungus.