Timutius dua la 1:13 - Buk Niu In Hida Balu nol Dehet deng Apan-kloma ki in Dadi ka

¹³ Tiata, muid lalan in nuil toma, man auk tulu bel ku son na tia. Eta ku parsai napiut, nol namnau atuli las totoang ela lam, na daid tada noan, ku daid mes nol Yesus Kristus son.

Timutius dua la 1:13 ပူးပေါင်းရင်းမြစ်များ

Roma 2:20

Undeng mi kil dididi Ama Lamtua Atorang ngas, tiata mi nangan noan mi tanas totoang. Nol mi kon nangan noan mi kil totoang man in toma ngas, ta lo? Dadin nam mi nangan noan, mi tui nal atuil ngengo, nol tana-ana blutu man taan saa lo ngas.

Roma 6:17

Hmunan nu, mi nang kula ka le mana-koet mia, mo halas ni mi hii-ming asa man in ne mi dalen nas sa, le daek muid atuil sarani las in tui mia ka. Undeng na le, auk nodan mamo se Ama Lamtua.

Filipi 1:27

Mo taon elol kon, mi in nuli ka musti toma, ta mi niam, Ama Lamtua atulin. Tiata mi musti nuil toma, nol tao muid asa man Kristus Dehet Dais Banan na in tek mi son na. Hidim, eta auk daid in pait tia meo mia, tamlom suma ming deng atuil tuun noan, mi nuil babanan nam, auk daleng kolo. Ta auk tana noan, mi in nuli ka koo-dalen mesa, undeng mi butu-kil se Koo mesa. Nol auk kon tana noan, mi dil dididi nol nukleka, le lako-daek Lamtua Yesus Dehet Dais Banan na leo-leo, didiin atuil didang ngas kon parsai. Nol atuli li labang nol mi kon no, mi lii lo. Na daid taad bel mi musu las noan, Ama Lamtua Allah le kat soleng one. Nol daid taad kon noan, Un bel mi boa-blingin, le halin mam mi nulim napiut nol Una.

Filipi 4:9

Auk tui mi son muid Ama Lamtua lalan in nuli ka. Mi kon musti not auk in nuli kia, nol daek muid totoang asa man auk in aa nol tao net son nas. Eta mi tao muid ela lam, Ama Lamtua Allah tao kuat-tes mi dalen nas, le halin mi dalen nas tetesa, nol haup in nuil dame.

Kolose 1:4

Ta kaim ming dasi mamo deng mi in parsai Yesus Kristus sa son, nol deng mi in namnau ka, nol mi dalen in banan bel totoang atuil in parsai ngas sa.

Tesalonika mesa la 5:21

Ta mi musti tinang in teka na nol babanan, le maa deng Ama Lamtua tam lo ka. Etan baktebes maa deng Lamtua lam, daek mudin.

Timutius mesa la 1:10

Atorang nas kon dulas bel: atuil in nong dadahut daat tas, bikloeb in niin bali nol biklobe ngas, bihata mo niin nol bihatang ngas, in daek buni atuil didang halin nuting le haup duit tas, in liun-leo atuil daat tas, daid saksi in nole-lilung ngas, nol bel totoang atuil man labang nol in tui man toma ngas.

Timutius mesa la 6:3

Kit in tui man toma ka, daid peke deng lalan in nuli man tao Ama Lamtua dalen kolo. Mo atuil in tui didang deng nia ngas, hutun soleng Lamtua Yesus Kristus in tui man toma ngas.

Timutius dua la 1:1

Timutius man in banan! Surat ni deng au, Paulus. Ama Lamtua Allah esa huil nal auk son, le daid Yesus Kristus atulin in nutus. Hidim nutus auk le laok tek in nuil toma, man Ama Lamtua hid son le belen se totoang atuil man in parsai se Yesus Kristus sas. Timutius! Ku banansila el auk anang esa. Tiata auk kohe-kanas le nodan Ama Lamtua Allah, kit Aman na, nol Yesus Kristus, kit Lamtuan na, le namnau ku, tulu bel ku Un dalen banan na, nol bel ku le nuli titu-tema nol dame.

Timutius dua la 1:14

Ama Lamtua Allah tapa bel ku hmuki mes man osa isi ne ku imam ma son, na ka, in tui man toma ka. Tiata doha-tinang nol babanan ne! Pake Ama Lamtua Allah Koo Niu, man muik ne kit dalen nia ka, le halin nam Un hulung ku doha-tinang hmuik na nol babanan.

Timutius dua la 2:2

Hmunan nu, auk tui ku son se atuil hut mamo kas silan, deng Ama Lamtua lalan in nuli man lolo ka. Tiata halas ni, auk nodan le ku laok tui atuil man ku in parsai son nas, asa man ku in ming son deng au ngas. Hidim atuil nas kon musti laok tui bel atuil didang lolen.

Timutius dua la 3:14

Mo ku musti kil dididi in tui man ku in sium son nas. Nol muid napiut asa man ku in parsai son na. Ta na man toma! Ku taan baktetebes, asii man tui ku nas totoang son na, ta lo!? Ku bisa parsai se una!

Timutius dua la 4:3

Ta ola bingin dua kam, atuli li dai hii-ming in tui man toma ngas pait lo ka. Mam oen suma haman nakbua guru-guru man in aa muid oen in koma ngas, halin nam tao mingis oen hngilan nas tukun.

Titus 1:9

Oen musti kil dididi Ama Lamtua Allah Dehet-dasin man hmunan nu kaim in tui oen son na. Nini ela, halas-sam oen bisa tulu nal Ama Lamtua lalan lolo ka bel atuil didang, nol bisa tao titu in tui man tom lo ngas.

Titus 2:1

Mo Titus ku tao banansila el oen deken ne! Ku musti tadu nakeon atuli las, le halin oen nuil muid in tui man toma ka.

Titus 2:8

Eta ku tui atuli lam, ku musti pake peke in kuat, le halin nam atuli las ketan soba-naan ku deken. Nini ela lam, atuli-atuil in labang nol kita ngas mae bali apan, undeng oen muik peke in labang kita lo.

Ibrani 10:23

Maa le kit kon kil dididi totoang man kit in hao son deng Ama Lamtua Allah ngas. Nol kit kon musti nahlae se Una, nol in lii-tidu lo, ta taon elol ko Un daek muid Un in hida ka.

Ibrani 3:6

Lamtua Yesus kon daek muid Ama Lamtua Allah in koma ka, mo Un nam atuil in loka-loka banansila el upung Musa lo. Undeng Un nam, Kristus, Ama Lamtua Allah Ana, man Un hulin meman son deng lolo hmunan nua, le belen maa se apan-kloma kia. Nol Kristus taan baktetebes in mana-koet Un Ama ka uma isin nas. Tiata, eta kit kil dididi kit in parsai kia, nol kit nahlae napiut se Kristus sam, kit kon haup in tamang le daid Un uma isin.

Ibrani 4:14

Kit musti kil dididi kit in parsai ka, undeng Ama Lamtua Allah Ana Yesus, daid kit tulu agama man lapa dudui son. Ta Un ne Ama Lamtua Allah sila ku son, le bela kita.

Yudas 1:3

Kaka-pail in namnau me! Hmunan nu auk nangan le dul bel mi totoang deng Ama Lamtua Allah in bel boa-blingin kita ka. Mo halas ni muik dasi puti, tiata bole tam boel lo ko, auk dul didang. Ama Lamtua Allah bel kit lalan in nuil lolo ka son. Un bel lalan in nuli na oe mes sii, nol Un seda-seda pait lo ka. Un bel lalan in nuli na, taung Un atulin in parsai ngas. Tiata, auk nodan le mi tahang mumuun nol dil dididi, le halin nam atuli soba-naan le seda lalan in nuli, man deng Ama Lamtua na deken.

Apan-kloma Hnika Balu 2:25

sadi mi kil dididi mi in parsai ka didiin Auk pait maang.

Apan-kloma Hnika Balu 3:11

Nesang lo ka kam Auk pait maang. Tiata kil dididi Auk in tui-tikang man mi sium son lolo hmunan nua ngas. Ta tamlom muik in nuu lai-niin asa man Ama Lamtua in le bel mia ngas sa.

Apan-kloma Hnika Balu 3:3

Tiata nadidingun totoang in tui toma man mi ming son nol simus son deng lolo hmunan nua ka deken. Muid Ama Lamtua in koma ka baktetebes, nol nang soleng mi in kula-sala ngas le bali muid se Ama Lamtua. Eta mi hangum hlapat le tao ela lo kam, mam nahkiut tuun nam, Auk maang banansila el atuil in nako ka, man mi nataka taan un oras in maa ka lo.