Roma 6:3 - Buk Niu In Hida Balu nol Dehet deng Apan-kloma ki in Dadi ka

³ Bet mi nangan tanan lo, mo oras kit haup in sarani ka, na daid tada noan, kit nang soleng in nuli blaan na, le daid atuil balu man butu-kil nol Yesus Kristus. Na banansila el kit mateng leo-leo nol Un son.

Roma 6:3 ပူးပေါင်းရင်းမြစ်များ

Matius 28:19

Tiata, mi lakom se ola-ol tuun kon, mi musti tek totoang bangsa-bangsa in ne apan-kloma ki ngias deng Auk Dehet Dais Banan na. Mi musti tui oen babanan le halin oen daid Auk ima-iin. Nol mi kon musti sarain one, le halin daid tada noan, oen butu-kil nol Ama, Un Ana ka, nol Un Koo Niu ka.

Dehet deng Aan in Nutus sas 19:5

Ming ela kon, oen nodan Paulus le sarain one, halin oen tamas daid Lamtua Yesus atulin.

Dehet deng Aan in Nutus sas 2:38

Kon Petrus situs noan, “Mi mesa-mesam musti nang soleng mi in kula-sala ngas totoang, le muid se Ama Lamtua. Hidi na lam, mi musti nodan le haup in sarani, halin daid tada noan, mi bali muid Yesus Kristus Lalan in Nuli ka son. In sarani na kon daid tada noan, Ama Lamtua kose soleng mi in kula-kula ngas son. Hidim mi kon haup Ama Lamtua Allah Koo Niu ka.

Roma 6:16

Auk kat kleta deng tuang nol ata. Eta mi sao mi apan nas le daek bel atuli mesa lam, mi musti hii-ming se una, nol daek muid un in koma ka. Lole un nam, mi tuang. Mo mi niam, un ata. Tiata mi huil le muid se ola? Eta mi huil le lako-daek muid in kula ka lam, mi daid ata deng in kula ka. Nol eta mi huil ela lam, na tao mi apan nas le bakisan deng Ama Lamtua Allah. Tamlom mi huil le lako-daek in toma ka, halin daid ata in lako-daek muid asa man Ama Lamtua in lok mia ka la? Eta mi huil ela lam, mi haup in babanan nol Una!

Roma 6:8

Tiata eta kit parsai noan, na tuladang el kit mateng son leo-leo nol Kristus sam, mam kit kon nuling napiut nol Una.

Roma 7:1

Kaka-pali me! Auk tek mi in nangan taan deng atorang hukung ngas. Elia: eta mi nulim nabale lam, atorang deng hukung nga man mana-koet mia. Mo eta mi matem son nam, atorang hukung nga muik hak in mana-koet mia pait lo son.

Korintus mesa la 10:2

Tasi ka nol nopen na, daid kleta mesa. Ta kit upu kia-kaon nas parsai upung Musa, le daid tulu taung one, tiata oen laok muid nopen na, le taam lakos tasi na dalen leo-leo nol una. Na banansila el kit in parsai se Kristus sias le haup in sarani, halin daid tada noan, kit daid Un atulin, nol kit hii-ming se Una.

Korintus mesa la 12:13

Kit totoang butu-kil nol Koo mes sii. Tiata dedeng kit haup in sarani ka, kit daid banansila el bangsa mesa. Kit atuil Yahudi tam atuil Yahudi lo, ata tam ata lo kon no, Ama Lamtua Allah bel kit totoang Koo mes sii. Na tuladang el kit totoang niun ui in nuli, deng ui mata mes sii.

Korintus mesa la 15:29

Muik atuli kom le haup in sarani seda atuil in maet son, mo sarain lo bii ngas. Mo eta atuil in mate ngas nulis pait lo kam, tasao le oen kom in haup sarani seda atuil in maet son nas sia?

Korintus mesa la 3:16

Mi musti tana noan, mi kon banansila el Ama Lamtua um in kohe-kanas mesa, man Un Koo la nuli ne dalen.

Korintus mesa la 5:6

Etan mi bahan tuan nam banan lo! Nadidingun deken, ta kit kutang bibit ruti bubuit tuun kon, tao hus nal tarigu la. Bibit ruti na banansila el atuli li in daat ta. Ta eta nang le un daek dadaat se mi hlala ka lam, mam atuil in sarani tenga las kon daek dadaat muid ela.

Korintus mesa la 6:19

Ku aap-inam ma, banansila el Ama Lamtua Koo Niu ka um in kohe-kanas sa. Un Koo la, man nuli ne mi dalen nas, lole Ama Lamtua Allah esa man bel mi Un Koo la. Undeng na, mi muik hak le daid tuang, taung mi apan nas esan pait lo son. Tiata tasao le mi in nuli ka tuladang el noan, mi taan dais nias lo kia?

Korintus mesa la 6:9

Mi hnika el noan nangan taan dais nias lo! Molota atuil in kom le daek dais banan lo ngas, taon elola ko oen haup in tamas le daid Ama Lamtua Allah nenan lo. Doh mi apan nas le tom in nole halin tao kula deken! Banansila el atuil in len-langan nol atuil didang man un sapa lo, in hui-langus daat, in laok kula nol atuil dadahut, el biklobe niin bali nol biklobe, hidim bihata niin nol bihata,

Korintus mesa la 9:13

Olan mi nangan ne! Tulu agama man tutan-lau se atuil Yahudi las Um in Kohe-Kanas Tene ka ngas, oen nulis deng sa-saa in todan-lahing, man atuli li in kila ngas. Nol atuil in tutan-lau se mija in tunu-dadung ngas, oen boel kaa siis deng hmukit man atuli li in kil lako ngas.

Korintus mesa la 9:24

Auk bel kleta deng sukat in lali. Muik atuli mamo muid sukat in lali, mo in nala ka suma at mes sii. Tiata, ku musti lail mumuun le halin nal taung Ama Lamtua.

Korintus dua la 13:5

Pres mi dalen nas esan le taan haup noan, mi parsai se Kristus baktetebes, tamlom lo ka. Un in kuasa ka muik ne mi in nuli ka, tam lo ka? Sukat mi apan nas esan ela. Ta eta Un butu-kil nol mi lo kam, mi daid Un atulin lo.

Galatia 3:27

Mi totoang haup in sarani son, le daid Un atulin, man butu-kil didi nol Una.

Yakobus 4:4

Meman mi niam atuil in daek muid napiut lo! Mi banansila el bihata-bikloeb in saap son, mo nuil napiut nol apa lo, hidim nong nol atuil didang sapa ka. Etan mi but mi apan nas nol apan-kloma ki in koma-koma ngas sam, na mi tao mi apan nas le mus nol Ama Lamtua Allah. Ela son na!

Petrus mesa la 3:21

Ui in baa tene na ka, daid kleta mesa, man banansila el oras mi in haup sarani ka. In sarani na tulu bel noan, Ama Lamtua sas-sao mi deng mi in kula-sala ngas, undeng Yesus Kristus nuli pait son. Dedeng oen sarain mia ka, oen diu mi le tao niu mi apan nas lo. Ta in toma ka, mo mi in hid nol Ama Lamtua, le tao niu mi dalen nas sa. Nini ela lam, mi nulim, nol daek nal in toma ka.