Roma 12:3 - Buk Niu In Hida Balu nol Dehet deng Apan-kloma ki in Dadi ka

³ Undeng Ama Lamtua nutus auk son, nol tulu Un dalen banan na bel auk son, tiata auk tek mi elia: sukat mi apan nas nini lalan in toma! Nikit-nikit apan nas dui deng in toma ka deken. Sukat nini in muik peke lo ka deken. Atuli li mesa-mesam musti nukleka, le nangan taan karunya man Ama Lamtua belen son, undeng un in parsai se Kristus sa.

Roma 12:3 ပူးပေါင်းရင်းမြစ်များ

Lukas 18:11

Lius se um in kohe-kanas sa kon, atuling Farisi nga sii dil le kohe-kanas noan, ‘Nodan mamo Ama Lamtua, ta auk niam atuil banan. Auk daat el atuil tenga las lo. Auk daid atuil in nako lo. Auk kom naseke lo. Auk laok kula nol bihaat lo. Nodan mamo Ama Lamtua, ta auk kon daat el atuling in sium bea ni lo.

Yuhanis 3:34

Atuling man Ama Lamtua in niung maa ka, Un tek deng Ama Lamtua Allah in hida ka. Undeng Ama Lamtua bel Un Koo la son, nol muik tahan in pesa lo.

Roma 1:5

Yesus tulu Un dalen banan na bel au, ta Un huil nal auk le daid Un atulin in nutus, le laok tek Un in hida ka se ola-ola. Ta Un in koma ka le, atuil Yahudi lo ngas kon parsai se Una, nol nuil muid Un in koma ka. Auk kon in koma ka le atuil deng bangsa lias totoang, parsai se Kristus nol nuil muid Un in koma ka.

Roma 11:20

Na toma. Mo nadidingun deken, ta Ama Lamtua dait soleng bangong nas son, undeng oen parsai se Kristus lo. Nol mi seda one, undeng mi parsai se Kristus. Tiata koaok deken! Banan dui ka, mi doha-doh tuun, nol tao dahu-dahut deken!

Roma 11:25

Kaka-pail in se Roma me! Mi musti nangan taan dais nia, man hmunan nu daid dais in buni. Ta eta mi nangan tanan son nam, mi koaok noan mi atuil in tana deken. Ta elia: halas ni atuil Yahudi deeh dalen didi, le dai parsai se Kristus lo. Mo mam oen tao ela napiut lo. Ta eta totoang atuil Yahudi lo man Ama Lamtua hulis son nas parsai se Kristus sam, mam atuil Yahudi las kon parsai se Una.

Roma 12:16

Nuil namnau apa nol dalen mesa. Boel koaok deken. Molam tao mi apan nas deng dadale, le nakbua nol atuil in biaas tuun nas kon. Boel nikit-nikit apan le nangan noan, suma ku sii man taan dui deken.

Korintus mesa la 15:10

Mo Ama Lamtua Allah tulu Un dalen banan na bel au. Hidim Un man tao auk le halas ni auk daid banansila eli nia. Dedeng Un tao dais banan bel au ka, Un soleng oras parsum tuun lo. Lole auk man nuklek le daek mumuun dui deng atuil tenga las totoang! Molota na auk in dake lo, molam Ama Lamtua dalen banan na, man daek ne auk in nuli kia.

Korintus mesa la 3:10

Ama Lamtua tulu Un dalen banan na bel auk son. Undeng na le, auk banansila el tulu deng atuil in daek uma ngas. Hidim Ama Lamtua tulung auk le tui mi deng dasi-dais peke ngas muna, le halin bangun-pii netes in kuat se mi in nuli ka. Hidi halas-sam atuil didang kon tui mia, le oen bangun-pii tapnaeng se netes man auk in daek son na. Molam atuil nias totoang musti daek babanan, le bangun-pii kam toma.

Korintus mesa la 7:17

Dedeng Ama Lamtua haman mi le daid Un atulin na, mi in nuli ka elola lam, nuil napiut ela. Seda deken tia, ta Ama Lamtua man mana-koet ela son. Auk tui atorang ni se jemaat tas totoang.

Korintus dua la 10:13

Molota, eta muik peke lo kam, kaim esan bahan tuan lo. Kaim suma aa deng os man Ama Lamtua in bel kaim son na. Asa man kaim in tao son bel mia ka, suma muid asa man Ama Lamtua in tadu kaim le dake ka. Kaim daek likun deng na lo.

Korintus dua la 12:13

Mo komali deken ne! Suma muik dasi mes sii man auk daken se mia la lo, man atuil didang daken ne jemaat tenga luas. Na ka, auk nodan le mi baen bel auk lo.

Korintus dua la 12:7

Dudui pait ta, Ama Lamtua tulu bel auk dais in muun isi mamo son. Mo auk kon tom susa, le halin nam auk koaok deken. Ta uikjale kas laih tuan na nutus un ima-ii mesa, le taan in poe-pet au si-sii, banansila el duli mes hai auk apang ngi tutungus. Auk bosor isi!

Galatia 6:3

Eta muik atuli in naka-naka apa ka noan, un dui hihidi deng atuil didang ngas, molota ela lo kam, un nole-lilung bali apa ka esa son na.

Efesus 3:2

Mi kon tana noan, Ama Lamtua Allah nutus au, undeng Un le tulu Un dalen banan na bel mia.

Efesus 3:4

Eta mi les hidi son, halas-sam mi kon nangan taan deng asa man Ama Lamtua Allah in kom taung Yesus Kristus sa.

Efesus 4:16

Nol kit niam, banansila el Un apa ka. Etan atuli li ima-iin nol ilu-bahan, daek hulung apa muid osa las mesa-mesa kam, un apa ka kuat-tes tapnaeng. Kristus atulin nas ela kon. Eta kit namnau apa nol hulung apa kam, kit totoang kon daid kuat-tes tapnaeng.

Filipi 2:13

Undeng Ama Lamtua Allah esa man daek ne mi dalen nas. Un man sai lalan le mi hii-ming se Una. Nol Un man bel kuasa le mi tade in dake, halin tao Un dalen kolo.

Kolose 1:29

Undeng na le, auk dil dididi le daek mumuun bel mia. Auk dil dididi le daek mumuun nal bel mi ela, undeng Kristus in kuasa ka, man tao auk kuat-tes. Nol Un in kuasa ka, muun isi!

Kolose 2:13

Hmunan nu, mi tuladang el in maet son na, undeng mi in kula-sala ka bili-ngala, nol mi tamam daid Ama Lamtua Allah atulin lo bii. Mo ela kon no, Un kose soleng mi in kula-sala ngas totoang, le bel mi in nuli balu, banansila el Un bel Kristus in nuli pait ta.

Timutius mesa la 2:15

Ela kon no, bihata li haup boa-blingin nabale, undeng oen hua ana. Oen kon haup boa-blingin, sadi oen parsai baktetebes se Kristus, nuil nol in namnau, nuil nol dalen niu, hidim nuil nol in toma.

Timutius mesa la 2:9

Auk kon in koma ka le bihata las mana apan nas babanan, nol pake kai-baut in toma. Naleko mi apan nas nini in tao klangan bili-ngala nol pake kai-baut osa-osa man tom lo ngas deken. Tamlom naleko lai-liis mi apan nas nini in pake lil-mea, lil-muti tamlom mutiara, le halin nam atuli ngat mia deken. Ta in tao bihata las le leko ka, oen dalen man in niu ka, nol oen in daek banan tutungus sa. Na man tom taung bihaat man in todan-lahing se Ama Lamtua Allah ngas.

Titus 2:12

Undeng na, kit musti hutun soleng in nuli man tom lo ka, nol totoang in kom dadaat ne kit dalen nia ngas. Kit in nuil ne apan-kloma hahalas nia ngias, musti tahang taan apan, nuil niu, nol muid napiut se Ama Lamtua Allah.

Titus 2:2

Tek bikloeb in blalan son nas, le nuil muid atorang ngas, doh oen ngalan banan na, hidim oen musti nangan blatas nol nangan tetesa. Oen musti kil napiut nol dil dididi, le muid in tui man toma ngas. Oen kon musti namnau atuil didang.

Titus 2:4

Nini ela lam, oen tui bihata-bihaat in muda dui ngas, le not se one, halin nam oen namnau taan oen sapan nas nol oen anan nas.

Titus 2:6

Ela kon, tui-tek bikloeb in muda dui ngas, le halin oen nulis nol babanan.

Yakobus 4:6

In dudui pait ta, Ama Lamtua Allah kon kom nabael le bel Un dalen banan na. Ta Buk Niu ka dul noan: “Ama Lamtua labang nol atuil in koaok daat tas, mo Un tulu Un dalen banan na bel atuil man dalen deng dadale ngas.”

Petrus mesa la 1:13

Tiata mi musti mana apan le nangan taan dais nias totoang nol babanan. Doh babanan le mi in nangan na lolo. Mana apan le parsai napiut se Yesus Kristus didiin Un pait maa. Ta oras na Ama Lamtua le tulu Un dalen banan na bel mia.

Petrus mesa la 4:11

Tuladang el: eta haup karunya le tui atuli lam, nangan ta mi musti tui atuli las nini in Teka-teka, deng Ama Lamtua ngas siis. Eta haup karunya le lii-lau atuli lam, lii-laus nini in muun-tes man Ama Lamtua in bele ka. Nini ela lam, totoang atuli li neta, noan, mi niam mo, Yesus Kristus atulin. Undeng na, oen nikit Ama Lamtua Allah ngala ka lapa-lapa. Ta Un nam, uhu isi! Un in kuasa ka, nol Un in kil prenta ka hidi nutus taan lo! Baktebes ela!

Petrus mesa la 4:7

Leol kiamat ta maa dadani son. Tiata mi musti nangan blatas, nol nangan tetesa, le kohe-kanas nal nol babanan.

Petrus mesa la 5:5

Atuil muda me! Mi kon musti hii-ming se tulu in kil jemaat tas. Mi totoang nikit apan deken. Ta Ama Lamtua Buk Niu ka dul noan, “Ama Lamtua labang atuil in nikit apan nas, mo Un kom in tulu Un dalen banan na bel atuil man tao dalen na deng dadale ka.”

Petrus mesa la 5:8

Doha-doha lo! Nangan blatas! Doh babanan ta kit musu las mo uikjale kas tuang nga, un le tao dudus mia. Un le hol mi tetema banansila el singa in koon-mali, man nuting hmukit le kaa ka.

Yuhanis tilu la 1:9

Hmunan nu, auk tunang surat bel jemaat in se ku mana lia ngas son, mo Diotrefes nikit apa ka el tuang nga. Nol un dai hii-ming auk lo.