Kolose 2:7 - Buk Niu In Hida Balu nol Dehet deng Apan-kloma ki in Dadi ka

⁷ Eta mi nuil butu-kil nol Un ela lam, mi banansila el kai ina man dil dididi taplaeng nga, lole un klaput ta dolo tama blatas tene. Nol mi banansila el um in kuat ta, undeng bangun-pii ne netes in kuat dapa. Mi kuat-tes tutungus se mi in parsai ka dalen, banansila el mi in tui net son na. Nang le mi dalen nas inu nol in nodan mamo, undeng totoang dais man Ama Lamtua Allah in tao bel mi son nas.

Kolose 2:7 ပူးပေါင်းရင်းမြစ်များ

Lukas 6:48

atuil in le bangun-pii um in kuat. Un kali bolo netes sa bana-banan mulai deng dale boa, didiin haup baut telas. Hidim un daek netes sa se baut na dapa, halas-sam un bangun-pii uma la. Eta ui baa maa kam, um na heheon lo, undeng un netes sa dil didi son.

Roma 16:25

Naka Ama Lamtua Allah! Ta Un man muik kuasa le tao mi daid kuat-tes. Un Dehet Dais Banan na tek ela, nol auk kon tui atuli las ela, se oras auk in nahdehes deng Yesus Kristus sa. Ama Lamtua man tek puting totoang dasi-dais in deng Kristus sas bel kit son, man hmunan nu atuli tanas lo, undeng buni-napang nabale.

Korintus mesa la 1:8

Kristus man bel mi in kuat-tes, halin mi tahang napiut didiin Un pait maa se apan-kloma kia. Nini ela lam, mi nahim lo, nol muik atuli in hutun kula-sala ka bel mia lo.

Korintus mesa la 15:58

Tiata kaka-pail in namnau me! Tahang dididi! Boel hutluul deken! Mi in lako-daek taung Ama Lamtua ka, musti banan tapnaeng nol mamo keko lako. Ta mi taan son noan, mi in daek hiti-late bel kit Lamtuan na ka, parsum tuun lo.

Korintus dua la 1:21

Ama Lamtua man huil mia nol kami. Un man nikit kita, le daid Un atulin. Un kon man tao kit le tahang nal napiut.

Efesus 3:17

Undeng mi in parsai napiut se Una ka, tiata auk nodan le Yesus Kristus nuli se mi dalen nas. Nol auk kon kohe-kanas le mi nuil butu-kil dididi nol Un in namnau ka, banansila el kai man kuat taplaeng, undeng klaput ta dolo tama blatas sa.

Efesus 4:21

Lole asa man mi in tui son deng Yesus Kristus sa, meman in tui man toma. Taon elola ko mi ming son!

Efesus 5:20

Ta Yesus Kristus daid kit Lamtuan, nol Ama Lamtua Allah tao dasi mamo bel kit son. Undeng na le kit nodan mamo tutungus se Una.

Kolose 1:23

Tiata, mi musti tahang napiut se mi in parsai ka. Parsai dididi le heheon deken! Boel hoen-nodat deng Dehet Dais Banan na deken, man mi simun nol ming son se hmunan nua ka. Atuli li laok tek Dehet Dais Banan na son se ola-ola se apan-kloma kia. Nol Ama Lamtua nutus au, Paulus, le auk laok tek Dehet Dais Banan na kon.

Kolose 3:17

Mi niam, daid Yesus Kristus atulin son. Tiata nangan, ta totoang mi in aa ngas, kil Un ngala ka. Nol totoang mi in tao ngas, kon kil Un ngala ka. Hidim asa man mi in tao ngas totoang, nadidingun deken le “nini ngaal” deng mi Lamtuan, Yesus Kristus. Nol nodan mamo tutungus se Ama Lamtua Allah, Un Ama ka.

Tesalonika mesa la 5:18

Se oras susa tamlom dael kolo ko, mi musti nodan mamo se Ama Lamtua. Ta na man Ama Lamtua Allah in kom taung, totoang atuil man in muid Yesus Kristus sa ngas.

Ibrani 13:15

Undeng Yesus mate le daid in sui-nahat kita son, tiata kit parlu kil hmukit in tunu-dadung pait le bel Un lo ka. Mo muik in bele didang pait, man musti kit kilan tutungus bel Ama Lamtua Allah, na ka, in naka-nahalit le nikit sakeng Un ngala ka lapa-lapa.

Ibrani 13:9

Tiata, mi mudi-muid tuun nol in tui kula ngas deken. Ta Ama Lamtua Allah tao teken mi dalen nas, undeng Un tulu Un dalen banan na bel kit son. Na undeng kit daek muid atorang in kaa-ninu ka lo, ta atorang in ela ka muik nahin lo.

Petrus mesa la 5:10

Mo nangan, ta Ama Lamtua Allah kom in tulu Un dalen banan na bel kita. Un man huil nal mi son le daid Un atulin, undeng mi in sium Kristus son na. Tiata Un le nikit mi lapa-lapa, le halin mi haup in nuli napiut nol Una. Mo eta mi haup susa se apan-kloma kia lam, nanapat tuun nam, Ama Lamtua tao mi le banan pait. Un bel mi kuat-tes le halin nam mi tahang nala. Se netes in kuat ta dapa, Ama Lamtua pii mia.

Yudas 1:12

Eta atuil in taam son ne mi hlala ngas nakbuan nol mia, le nangan Ama Lamtua in neka-namnau ka, se oras mi in kaa leo-leo ka lam, oen mae taan lo nol oen in kom naseke ka. Tiata, mi musti doha-doha loo! Ta oen nam mo, banansila el baut alo in ne tasi dalen nua, man tao dudus nal kapal la. Oen kon banansila el nopen mitang, mo nahu tahan ulan beas mes lo kon na. Oen suma bahan nas tuan tukun, mo tao sa-saa in banan nas lo. Oen banansila el kai ina man muik ambak lo ka. Eta oras in isin nam, un puting tahan isin beas mes lo kon, undeng un holbodos son lako huud klaput-klaput tas.

Yudas 1:20

Mo kaka-pail in namnau me! Mi musti bangun-pii mi in nuli ka se netes in parsai man in niu ka dapa. Nol eta mi kohe-kanas sam, muid asa man Koo Niu ka in tulu bel mia ka.

Yudas 1:24

Eta elam, kit nikit sakeng in naka-nahalit bel Ama Lamtua Allah! Ta Un man doh nal mia, le halin mi nahim deken. Nol Un man leo-leo nol mia, le halin mi dil nal se Ama Lamtua sila, ta Un man tao mi le daid niu, nol hmomos pait lo ka. Mi maam nol dalen kolo, undeng Un nam muun isi!