Ibrani 10:20 - Buk Niu In Hida Balu nol Dehet deng Apan-kloma ki in Dadi ka

²⁰ Nangan Maan in Niu Dudui blaan na! Se na, muik kitu tene mes man kele atuli lia, le oen boel taam laok saol Ama Lamtua Allah lo. Mo nini Yesus in mate ka, Un sai lalan balu, le atuli li haup in laok aa esan nol Ama Lamtua Allah son.

Ibrani 10:20 ပူးပေါင်းရင်းမြစ်များ

Matius 27:51

Se Um in Kohe-kanas Tene ka, muik kitu tene mes loen le kele Ama Lamtua Allah Kamar in Niu Dudui ka. Tom nol Yesus hngasa ka in nutus sa, kitu tene na sait bating dua deng dapa lako pes dale. Hidim lul-beko muun didiin baut tene kas hoen bating dua.

Markus 15:38

Se Um in Kohe-kanas Tene ka, muik kitu tene mes holtai kele Ama Lamtua Allah Kamar in Niu Dui ka. Tom nol Yesus hngasa ka in nutus sa, kitu tene na sait bating dua deng dapa lako pes dale'.

Yuhanis 10:7

Hidim Yesus tek tapnaeng oen noan, “Asa man Auk in tek mia ni baktetebes. Auk banansila el hnita deng lae-blai las okat ta.

Yuhanis 10:9

Hidim Auk banansila el hnita ka. Eta muik in le taam muid Au kam, Ama Lamtua Allah belen boa-blingin, deng un in kula-sala ngas. Na banansila el un tama lako el Ama Lamtua mana lu muid Au, man daid hnita taung una. Nol atuil man in taam muid Au ka, lako-pait se maan ol tuun, nol haup in kaa-ninu babanan.

Yuhanis 14:6

Kon Yesus tek noan, “Muik lalan didang, man kil nol atuli li lako bus el Ama in ne sorga ku lo. Suma muid Auk siing. Ta Auk niam, banansila el lalan na. Auk niam, man kil asa man in toma ka. Nol Auk niam, man bel atuli li in nuil toma.

Efesus 2:15

Ta hmunan nu, atuil Yahudi las nuting lalan le nuil babanan nol Ama Lamtua nini oen atorang agama las. Mo dedeng Yesus Kristus mate ka, Un tepat tele lalan blaan na le sai lalan balu, halin atuil deng bangsa Yahudi nol atuil deng bangsa didang ngas kon, haup in nuil babanan nol Ama Lamtua Allah. Nini ela lam, oen totoang butu-kil daid bangsa balu mes son, man nuil nol in dame.

Timutius mesa la 3:16

Hmunan nu muik dasi mes muun isi deng kit in parsai ka buni nabale, mo halas ni Ama Lamtua tek puting dais na son. Na ka: Kristus maa se apan-kloma ki son, nini atuli li hnika-tuladang. Ama Lamtua Koo la kon tulu bel noan, Yesus nam mo, Atuil in dalen lolo. Nol Ama Lamtua ima-ii in ne sorga nguas kon, ngat net Una. Ama Lamtua Allah nikit Un lako ne sorga son, hidim nikit sakeng Un ngala ka lapa-lapa. Un dehet ta holhising didiin lako papmes apan-kloma ki son. Se ola-ola, se apan-kloma kia, atuli li parsai Un son. Kit in parsai ka ela!

Ibrani 6:19

Nini ela lam, kit dalen ni hutluul lo son, banansila el lui mes man puti nal son deng len na, le lako nahlae se maan in nahu ka. Ta kit nahlae se Yesus Kristus man daid kit tulu agama in lapa dudui ka. Hmunan nu, tom nol atuil Yahudi las leol banan na, tulu agama in lapa dudui ka tama muid kitu tene in loen kele Kamar in Niu Dudui ka, le taam lako saol Ama Lamtua Allah se la.

Ibrani 9:3

Muik kitu bleha tene mes holtiu le kele kamar mes didang, man oen noken noan, Ama Lamtua Allah Kamar in Niu Dudui ka.

Ibrani 9:8

Ama Lamtua Allah nini Un Koo Niu ka son, le bel kit in nangan tana noan, eta kitu tene na kele lalan in taam laok bus el Kamar in Niu Dudui ka nabale lam, nahin na noan, atuli li haup in taam laok se Ama Lamtua sila ka lo bii, etan atorang blaan nas muik nabale.

Petrus mesa la 3:18

Ta Kristus mate oe mes sii, le kose soleng kit atuli li in kula-sala ngas. Un in nuli ka man lolo, nol mate son le seda kit in nuil hmomos sias. Un mate le halin mi babanan pait nol Ama Lamtua Allah. Kristus na mo, atuil banansila el kit kon, atuli tao tele Una, mo hidim Ama Lamtua Koo la bel Un nuli pait.

Yuhanis mesa la 4:2

Kit taan nal in hida baktetebes man maa deng Ama Lamtua Koo Niu ka ka, elia: Ama Lamtua Allah hid meman son deng lolo hmunan nua, le bel Un Ana ka maa se apan-kloma kia. Eta atuling in kil hida na hao noan, Yesus Kristus na mo, baktetebes Ama Lamtua Allah Ana, man in daid atuli son banansila el kita ka lam, in hida na meman maa deng Ama Lamtua.

Yuhanis dua la 1:7

Atuil in nole-lilung daat tas mamo laok papmes apan-kloma ki son. Oen tui noan, meman Yesus Kristus maa se apan-kloma kia, mo Un muik aap-sisin el atuil esa ki lo. Oen kon atuil in nole-lilung man labang nol Kristus, hidim dai sium lo noan, Yesus na mo Kristus man Ama Lamtua Allah hulin meman son, deng lolo hmunan nua ka lo.