Dehet deng Aan in Nutus sas 18:1 - Buk Niu In Hida Balu nol Dehet deng Apan-kloma ki in Dadi ka

^1-3 Dedeng na, muik lahing tene mes deng pamarenta Roma, ngala Klaudius. Un komali nol atuil Yahudi las, ta un nulut puting oen deng kota Roma, ne propinsi Italia. Kon nam oen lalis holhising lakos se ola-ola. Atuling Yahudi mes ngala Akila, nol un sapa ka ngala Priskila. Oen duas kon lail putis deng propinsi Italia, le lakos se kota mesa, ngala Korintus. Akila niam deng propinsi Pontus. Un osa la, atuil in daek sa-saa deng hmukit bulang. Dedeng na, Paulus kon nang soleng kota Atena, le lako se kota Korintus. Se na, Paulus nol Akila duas sapa Priskila taan apa. Paulus nam kon atuil in daek sa-saa deng hmukit bulang. Tiata oen daad buan se mana mesa, le daek leo-leo.

Dehet deng Aan in Nutus sas 18:1 ပူးပေါင်းရင်းမြစ်များ

Dehet deng Aan in Nutus sas 17:15

Atuil nas kolang nol Paulus lakos lius se kota mes ngala Atena. Hidim oen nang un se la, le oen pait lakos Bereas, nol kil in hida deng Paulus, halin tek Silas duas Timutius le hlalapat pait lakos nakbuan nol una.

Dehet deng Aan in Nutus sas 17:16

Dedeng Paulus natang-natang Silas nol Timutius in maa se Atena ka, un dalen ili, undeng un ngat tam muik maan in hui-langus ne ola-ola papmes kota na.

Dehet deng Aan in Nutus sas 18:8

Nesang lo kon, tulu in kil um in kohe-kanas sa parsai se Lamtua Yesus, un ngala Krispus. Un uma isin nas totoang kon parsai, leo-leo nol atuil Korintus man hii-ming se Paulus sas. Hidi kon, Paulus ator le sarain oen totoang.

Dehet deng Aan in Nutus sas 19:1

Apolos bii se kota Korintus ne propinsi Akaya kam, Paulus laok papmes ingu-iung in se leten nas. Kon nam un lako lius se kota Efesus. Se na, un tutnaal atuli at ila lo man parsai se Lamtua Yesus son.

Korintus mesa la 1:2

Auk dul surat ni bel mia, man daid Ama Lamtua Allah atulin in parsai se kota Korintus. Un huil nal mi son, le daid Un atulin in niu, undeng mi parsai se Yesus Kristus son. Un kon tao mi le daid niu banansila el totoang atuil in parsai tenga las. Ta oen kon nodan tulung son, se kit Lamtuan Yesus Kristus, man Ama Lamtua Allah hid meman son, lolo hmunan nua, le belen maa ka. Hidim Un daid Lamtua, taung kit nol one.

Korintus dua la 1:1

Surat ni deng au, Paulus. Ama Lamtua Allah nutus auk lakong se ola-ola son, le tek atuli las deng Yesus Kristus, man Ama Lamtua tulu meman son deng hmunan nua ka. Kit palin Timutius ne ia, un kon tunang boa-blingin bel mia. Auk dul surat ni bel totoang atuil in parsai ngas, man tao lam nakbua tutungus se kota Korintus nol propinsi Akaya.

Korintus dua la 1:23

Auk nodan le Ama Lamtua esa man daid saksi se auk in aa nia. Ta Un taan auk daleng ngia. Un taan noan tasao le auk daid in tia kota Korintus lo bii kia. Auk kom in tao nahmaeng mia lo, dadin nam, auk tia lo bii ka.

Korintus dua la 6:11

Kaim aa langa-langa nol mi in ne kota Korintus sias. Kaim kon namnau mi isi baktebes.

Timutius dua la 4:20

Erastus daad ne kota Korintus. Lelon na, auk nang Trofimus ne kota Miletus, lole dedeng na un heda ngele isi.