TITAS 2:14 - Lai (Hakha) Common Language Bible 2006

¹⁴ Kannih cu ṭhat lonak chungin chanh awkah le amah ta a simi mithiang si awkah le ṭhatnak tuah a duhmi siter awkah, kan caah a nunnak kha a pek.

Laibaibal Thiang (BSI)

¹⁴ Amah nih nawlbuarnâk vialte chungin a kan tlanh khawh nâkhnga, Amah caah thiantermi, a hlei khun in Amah mi si in, rianṭha ṭuan i â zuammi kan si khawh nâkhnga Amah hrimhrim kha kan caah â pe.

TITAS 2:14 ပူးပေါင်းရင်းမြစ်များ

GENESIS 48:16

Harnak phun zakip chungin a ka chuahtu vancungmi nih thluachuah pe ko hna seh. Keimah ka min le ka pu Abraham min le ka pa Isak min cu an chungah hin nung seh. Fa tampi ngei hna seh law bu nganpi ah i chuah hna seh,” a ti.

SALM 130:8

A mi Israel mi vialte kha an sualnak chungin a khamh hna lai.

SALM 135:4

Jakob cu amah minung si awkah amah nih aa thim, Israel mi cu amah mi si awkah amah nih aa thim hna.

EXODUS 15:16

Ṭihnak le thinphannak kha an cungah a tlung. Na ṭhawnnak a lianhngan ruangah, lung bantukin cang loin an dir, maw Bawipa, na mi hna an lanh dih hlantiang, nangmah na mi hrimhrim an lanh dih hlantiang an dir.

EZEKIEL 36:25

Nan cungah ti thiang kan theh hna lai i nannih an thurhhnawmhtertu hna thil vialte khan kan thianh hna lai; nan siasal biaknak thurhhnawmhnak vialte khan kan thianh dih hna lai.

EZEKIEL 37:23

An siasal hna le an tuahmi thil fihnung hna le zumhawktlak loin an rak umnak vialte khan an i thurhhnawmh ti lai lo; sualnak chung i an kir ṭhan tawnnak khan ka chuah hna lai i ka thianh hna lai. Cuticun annih cu ka mi ah an cang lai i kei cu an Pathian ah ka cang lai.

LEVITIKAS 25:41

cun nangmah sinin amah he a fale he an chuak lai i amah innchungkhar sinah khan an kir lai i a pupa hna covo ah khan a kir lai.

MALAKHI 3:3

Levi mi kha a thianh hna lai i ngun le sui an ṭawl hna bantukin a ṭawl hna lai i cucaah Bawipa sin i laksawng a rak putu dingah khan an i tlak lai.

NAMBAR 25:13

mah cucu amah ca le a hnu i a tefa hna caah dong lo tlangbawi sinak biakamnak a si lai, zeicahtiah a Pathian kha a ṭanh i Israel mi caah remnak a ser,’ tiah va chim tuah,” tiah a ti.

NAMBAR 7:15

khangh thawinak ca i cawtum no pakhat, tuukawng pakhat, tuufa a pa kum khat a timi pakhat;

MATTHAI 1:21

Fapa a hrin lai i a min ah Jesuh na sak lai — zeicahtiah a mi kha an sualnak chungin a khamh hna lai,” tiah a ti.

MATTHAI 20:28

Cuticun pei Mi Fapa hi a si cu, rian ṭuanpiak dingah ka rat ṭung lo, mi tampi an rian ṭuanpiak awk le annih tlanhnak ca i ka nunnak pek awkah pei ka rat cu,” tiah a ti hna.

MATTHAI 3:12

A kut in facang zahnak sisiap cu aa put i rawl cu a zah dih hna lai; a fang cu buk ah a rawn hna lai i a hi cu a mit lomi mei in a khangh hna lai,” tiah a ti.

JOHAN 6:51

Vancung in a rung ṭummi nunnak changreu cu keimah hi ka si. Hi changreu a eimi paoh cu zungzal in an nung lai. Ka pekmi hna changreu cu ka sa hi a si, cucu zeicahdah ka pek hna ti ahcun, vawlei hi a nun nakhnga caah a si,” tiah a ti.

LAMKALTU 15:14

Simon nih, zeitluk in dah Pathian nih Jentail mi kha an zawn a ruah hna ti cu a kan chimh cang i cu a langhnak cu anmah lakin amah min putu dingah mi aa thimmi hna hi a si.

LAMKALTU 15:9

Kannih le annih karlak ah zeihmanh thleidannak a tuah lo; annih nih an zumh caah an lungthin kha a thianter ve ko hna.

LAMKALTU 20:28

Nanmah lila kha i veng u law nan zohkhenh awkah Thiang Thlarau nih an pekmi hna tuurun kha ṭha tein va zohkhenh hna u. Pathian nih amah Fapa thihnak thawngin amah ta ah aa sermi khrihfabu tuukhal kha si ko u.

LAMKALTU 9:36

Cun Joppa khua ah hin Jesuh zummi nu pakhat a min Tabitha a simi a um, (amah cu Grik holh cun Dorkas ti a si i a sullam cu sazuk tinak a si.) ṭhatnak tuah le sifak bawmh ah khan a caan vialte cu a hman dih tawn.

GALATI 1:4

Atu chan, chan ṭhalo chung hin kannih cu luatter awkah, Pathian kan Pa duhnak zulh in, Khrih cu kan sualnak caah aa pe.

GALATI 2:20

cucaah a nungmi cu keimah kha ka si ti lo, ka chung i a ummi Khrih tu hi a si deuh. Atu i ka nunmi nunning hi, a ka daw i ka ca i a nunnak a pemi Pathian Fapa zumhnak thawngin ka nung.

GALATI 3:13

Sihmanhsehlaw Nawlbia nih a chuahpimi chiatsernak chung khan Khrih nih a kan tlanh cang, cu a kan tlanhnak cu kan ca i chiatserhmi i a cannak thawng khan a si i chiatserhmi a hung i can cu, Cathiang nih, “Thingkung cung i thlaimi paoh cu Pathian chiatserhmi an si,” a ti caah khan a si.

EFESA 1:11

Zeizong vialte hi Pathian khuakhanning le tinhning in an kal ko; Khrih he kan i pehtlaihnak thawngin Pathian nih amah mi si ding i a kan thim cu amah nih a rak i tinhmi a si ko i a hramthawk tein tuah awkah a rak i khiah ciami a si.

EFESA 2:10

Kannih cu Pathian kutchuak kan si i Pathian nih thil ṭha tuah dingah a rak kan tinh bantukin Khrih he kan i pehtlaihnak thawngin thil ṭha cu kan tuah khawhnak hnga a kan ser ṭhanmi kan si.

EFESA 5:2

Khrih nih a kan dawt i a nunnak kha kan caah a pek bantukin, kannih zong kan nunnak cu dawtnak nih a uk ve awk a si. Khrih nih kan ca i a pekmi a nunnak cu Pathian duhmi raithawinak le pekchanhmi rimhmui cu a si.

DEUTERONOMI 14:2

Zeitintiah nannih cu Bawipa nan Pathian ca i a thiangmi miphun nan si i Bawipa nih nannih cu amah ta hrimhrim si awkah, vawlei cung i a ummi miphun vialte hna lakin an thim hna.

DEUTERONOMI 26:18

Cun Bawipa nih nihin ah nannih kongah hi bangin a thanh cang: ‘Bia kan kam cang hna bantukin nannih cu keimah ca hrimhrim i miphun nan si, cun ka nawlbia vialte kha nan ulh awk a si,

DEUTERONOMI 4:20

sihmanhsehlaw nannih cu Bawipa nih thir titnak meiphu, Izipt ram cun, amah miphun hrimhrim si awkah, atu i nan si bang hin, an chuahpi hna.

DEUTERONOMI 7:6

“Zeitintiah nannih cu Bawipa nan Pathian caah miphun thiang nan si; Bawipa nan Pathian nih vawlei cung i a ummi miphun vialte chungin nannih cu amah ro caah an thim cang hna.

1TIMOTE 1:15

Khrih Jesuh cu misual mi hna khamh awkah vawlei ah a rung ṭum, timi hi ahmaanmi le cohlan awk a tlakmi le zumh awk bia a si. Keimah cu an lakah a sual bik ka si ko,

1TIMOTE 2:10

Biaknak a ṭanhmi nu nih an tuah tawn bantukin ziaza ṭha tu in i thuam hna seh.

1TIMOTE 2:6

amah cu mi vialte tlanhnak caah a lu aa pemi a si. Cu nih cun, caan a tlin tikah Pathian nih mi vialte kha khamh a duh hna ti kha a langhter i

1TIMOTE 6:18

Ṭhatnak tuah le thil ṭha tuahnak i rum le nunsian le thil ṭhenh sian kha na chimh hna lai.

TITAS 2:7

Cun nangmah hrimhrim zong, thil ṭha tuahnak lei paohpaoh ah, an i zohchun awk tlak na si lai. Na cawnpiak hna tikah lungtak te le biatak tein cawnpiak hna.

TITAS 3:8

Hi bia hi biatak a si. Hi bia hi biapi in na rak lak hna awkah ka duh. Pathian a biami nih cun hmaizah awk tlak a simi rian kha ṭuan hna seh law, cu rian cu anmah caah hmaizah awk tlakmi rian a si ti lawng si loin an minung hawi ca zong i a ṭhahnemmi rian a simi kha si hna seh.

HEBRU 1:3

Amah cu Pathian sunparnak in a ceu i Pathian he aa lo taktakmi kha a si; cun van le vawlei kha, ṭhawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a ṭhu.

HEBRU 10:24

Pakhat le pakhat kan i dawt khawh nakhnga le thil ṭha kan i tuahpiak khawh nakhnga, i bawm tliahmah u sih.

HEBRU 9:14

Cu hmanh nih cu bantukin a tuah khawh ahcun, Khrih thisen nih cun, zeitluk in dah a tuah khawh chinchin lai! Zungzal hmunmi Thlarau in a tlingmi raithawinak bantukin Pathian sinah amah le amah cu aa pe. Kannih nih Pathian nung kha kan biak khawh nakhnga santlai lomi rian kan tuah tawnmi kan chiaṭha thleidannak chung i a cammi kha a thi in a kan thianhpiak lai.

JEIM 4:8

Pathian cu naih u law an naih ve hna lai. Misual mi hna, nan kut kha i ṭawl u. Miziathiam hna, nan lung kha i thianh u.

1 PETER 1:18

Nan pupa nih an in rohmi hna santlailo phunglam hna chungin an luattertu hna cu zeidah a si kha nan hngalh, a rawk khomi thil sui le ngun bantuk si loin

1 PETER 1:22

Biatak nih an fialmi hna nan zulhnak thawngin nanmah cu nan i thianh cang i zumhnak ah nan unau a simi hna cungah khan dawtnak taktak nan ngeih caah, pakhat le pakhat i daw tuah u.

1 PETER 2:12

Nan ziaza kha lawkihmi hmanh nih a ṭha an timi si seh law, atu ah cun miṭhalo tiah an in ti ko hna lai nain, nuncan ṭha in nan nun kha anmah hrimhrim nih an hmuh lai i Pathian cu mi vialte biaceih awk i a rat Ni ah cun an thangṭhat lai.

1 PETER 2:9

Sihmanhsehlaw nannih cu thimmi miphun, Siangpahrang tlangbawi, miphun thiang, Pathian miphun hrimhrim nan si. Muihnak chungin amah ceunak chungah an kotu hna Pathian nih khuaruahharmi thil a tuahmi thanh awkah nannih cu an thimmi hna nan si.

1 PETER 3:18

zeicahtiah Khrih hrimhrim zong kha nanmah caah a thi i sualnak ruangah khan voi khat ah za lakin a thi; nannih cu Pathian sin i kalpi awk caah khan, miṭha cu miṭhalo mi hna ruangah a thi. Pum cun thihnak a huat, sihmanhsehlaw thlarau cun a nung i

1JOHAN 1:7

Sihmanhsehlaw ceunak chung i a um bantukin kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thianh.

1JOHAN 1:9

Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai.

1JOHAN 3:2

Ka dawtmi ka fale hna, atu hin kannih cu Pathian fa kan si cang, asinain zei kan lawh lai cu a fiang rih lo. Sihmanhsehlaw Khrih a langh tikah, amah Khrih bantuk cu kan si lai ti kha kan hngalh, zeicahtiah a sining taktak tein kan hmuh lai.

BIAPHUAN 1:5

Jesuh Khrih cu zumh awk a tlakmi tehte, hrin hmasa bikmi Fapa, thihnak in thawhter a simi a si i vawlei cung siangpahrang hna a uktu zong a si fawn. Kannih cu a kan dawt i a thihnak thawngin kan sualnak chung khan a kan chuah i

BIAPHUAN 5:9

Hla thar kha an sa i: “Nangmah cu cazual kha lak awk le a khuhnak kha phoih awkah naa tlak. Zeicahtiah an in thah i na thihnak thawngin, Hrin kip le chung kip le holh kip le phun kip chungin, Minung cu Pathian sinah na phakpi hna.