RUTH 4:11 - Lai (Hakha) Common Language Bible 2006

¹¹ Cun hauka ah a ummi vialte le upa hna nih khan, “Hngaltu kan si. Na inn chungah a ra ding minu cu, Rachel le Leah, Israel innchungkhar a dirhtu pahnih hna bantuk ah khan Bawipa nih ser ko seh. Efrathah ah hin khua awng tong law, Bethlehem ah na min thang ko seh;

RUTH 4:11 ပူးပေါင်းရင်းမြစ်များ

GENESIS 23:10

Efron zong cu Hit mi hna sinah pumhnak hmun khua hauka ah khan a ṭhu ko i cuka i a ummi vialte theih ah cun,

GENESIS 24:60

Cun Rebekah cu thluachuah an pek i, “Kan farnu, nang cu mi thong tampi nu ah va cang law, Na tefa hna nih khan an ral hna khuapi kha tei hna seh,” an ti.

GENESIS 29:16

Laban nih cun fanu pahnih a ngeih hna i a upa deuh cu a min ah Leah a si i a ngakchia deuh cu Rachel a si.

GENESIS 29:25

A thaizing ah cun Jakob nih Leah a si kha a hngalh. Laban cu a thawh i, “Zeicahdah hi bantukin ka cungah na tuah? Rachel pek dingin pei na rian cu ka ṭuan cu, zeicahdah na ka hlen kun?” a ti.

GENESIS 29:32

Leah cu fa a pawi i fapa a hrin. Aa thawh i, “Bawipa nih ka harnak kha a ka hmuhpiak cang, atu cu ka va nih a ka dawt cang lai,” a ti; cucaah a min ah Reuben a sak.

GENESIS 35:23

Leah fa ah Reuben, Jakob fapa upa bik, Simeon, Levi, Judah, Isakhar le Zebulun an si.

GENESIS 35:24

Rachel fa ah Josef le Benjamin an si.

1 SIANGPAHRANG 21:8

Cucaah Ahab min in ca a ṭial i a min khenhnak in a khenh hna i cu ca cu Naboth he a khua i a um ṭimi upa hna le bawi hna sinah khan a kuat.

1 CHANRELNAK 2:51

Bethlehem pa Salma, le Beth-gader pa Haref;

SALM 132:6

Bethlehem khua ah biakamnak kuang kong kha kan theih i Jaar lo lakah khan cu kuang cu kan hmuh.

PHUNGTHLÛKBIA 14:1

Nu fim nih an inn kha an sak, sihmanhsehlaw nu hrut nih anmah kut lila in an ṭheh dih hna.

PHUNGTHLÛKBIA 31:23

A va cu ram chung upa hna sinah a ṭhut tikah, hauka ah khan theihhngalhmi a si.

JEREMIAH 32:10

Hnatlaknak ca cu ka min ka thut i min khenhnak in ka khenh i tehte kha ka hngalhpi u ka ti hna i tangka kha a thlainak ah ka thlai.

MIKAH 5:2

Sihmanhsehlaw Bethlehem Efrath, nangmah cu Judah ram chungah a hme bik khua hna lakah naa tel ve nain, Nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si.

MATTHAI 2:6

Judea ram ummi Bethlehem khua, Nangmah cu Judah ram khuapi hna lakah a hme bik na si naisai lo; Zeicahtiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai,” a ti.

DEUTERONOMI 25:7

Cun mipa nih cun a unau nupi kha lak a duh lo ahcun, a unau nupi nih khan hauka ah upa hna sinah a hung kal lai i, ‘Ka va unau nih amah unau pa min Israel chungah nunter kha a duh lo; vale unau rian kha ka cungah tuah a duh lo,’ tiah a ti lai.

DEUTERONOMI 25:9

a unau nupi nih khan upa hna hmaiah cun a hun kalhnawh lai i, a ke i a kedan kha a phawih lai i a hmaiah a cil a chak lai, cun nu nih cun, ‘A unau inn a sa duh lomipa cungah cun hi bantukin si seh,’ tiin a chim lai.

RUTH 1:2

Cu mipa a min cu Elimelek a si, a nupi min cu Naomi a si i a fapa pahnih hna min cu Mahlon le Khilion an si; Judah ram chung Bethlehem khua i Efrath mi an si. Moab ram ah cun an va kal i khika ah an va um.