NEHEMIAH 13:21 - Lai (Hakha) Common Language Bible 2006

²¹ Sihmanhsehlaw ralrinnak ka pek hna i, “Zeicahdah kulhnak vampang hmaiah khan nan riah? Cu bantukin nan tuah ṭhan ahcun kan tlaih hna lai,” tiah ka ti hna. Cucaah cu thawk cun sabbath ni ah cun an ra ti lo.

NEHEMIAH 13:21 ပူးပေါင်းရင်းမြစ်များ

EZRA 7:26

Cun na Pathian phungbia le siangpahrang nawlbia a ngai lomi paoh cu thah awk siseh, ram chungin ṭhawl awk siseh, a thil chuh awk siseh, thong thlak awk siseh, a cungah biakhiahnak kha fek tein tuah a si lai,” tiah a ti.

NEHEMIAH 10:32

Cun kan Pathian inn rian ṭuannak ca le hun camcinmi changreu ca le pekchanh camcinmi changvut thawinak ca le pekchanh camcinmi khangh thawinak ca le sabbath hna ca le thla thar hna ca le caan a ngeimi puai hna ca le thil thiang hna ca le Israel mi hna ca i remnak tuahnak ca i sual thawinak ca le kan Pathian inn rian ṭuannak dihlak ca i kumfate in shekel cheu thum cheu khat thawh awk zong kha, atu hin kan thawh lai, tiah kan ti.

NEHEMIAH 13:15

Khi caan ah khan Judah ram chungah sabbath ni i mitsur hang an nen i rawl kha tam piin an rak phorh i laa cung i an chuan hna kha ka hmuh; cun mitsur hang le mitsur thei le theipi le thilrit a phunphun, Jerusalem i sabbath ni i an rak phorh zong kha ka hmuh fawn; cun rawl an zuar ni ah cun ralrinnak ka pek hna.

NEHEMIAH 13:20

Khi tikah chawdawr hna le thil phun kip a zuarmi hna kha Jerusalem khua lengah cun voi khat voi hnih cu an riak.

1 PETER 2:14

ṭhat lonak a tuahtu hna dantat awkah le ṭhatnak a tuahtu hna thangṭhatnak pek awkah a thlahmi bawi hna zong kha an nawl ngai ko hna u.