LUKA 8:24 - Lai (Hakha) Common Language Bible 2006

²⁴ A zultu hna cu Jesuh sinah khan an ra i an hlauh i, “Saya, saya, kan thi dengmang ko hih,” an ti. Jesuh cu a hung tho i thlitu le tilet cu a caak hna. Thlichia cu a dai i zeizong vialte cu dai zirziar in a um.

Laibaibal Thiang (BSI)

²⁴ Cun a sinah an va kal i an hun hlauh, “Cawnpiaktu, Cawnpiaktu, kan lotlau cuahmah ê!” tiah an ti. A tho i thli le tilet kha a sîk. Cuticun an ngol i dai tein a um.

LUKA 8:24 ပူးပေါင်းရင်းမြစ်များ

SALM 65:7

Rili thawng cu na daihter i tilet thawng cu na nemter; mi au thawng cu na daihter.

ISAIAH 50:2

Ka mi hna cu anmah khamh awk i ka hei fuh hna tikah khan, zeicahdah an ka leh duh lo? Ka auh hna tikah khan, zeicahdah an ka chawnh duh lo? Anmah khamhtu dingah ka der tuk maw? Ka bia in rili kha ka kaoter khawh i tiva kha thetse ram ah ka canter khawh hna; an chung i a ummi nga kha ti an hmuh lo caah an thi.

JEREMIAH 5:22

Nan ka ṭih lo maw? tiah Bawipa nih a ti; Ka hmaiah nan tha a ther lai lo maw? Rili caah thetse kha ramri ah a chia i A lonh khawh lo zungzalmi dawntu a caah a chiatu keimah hmaiah hin nan tha ther loin maw nan um ko lai? Rili tilet cu an tho ko lai, sihmanhsehlaw an lonh kho lo; Tilet cu an awn ko lai, sihmanhsehlaw an pah kho lo.

NAHUM 1:4

Rili kha a sik i a carter dih, tiva vialte kha a kaoter dih hna. Bashan le Karmel cu an uai i Lebanon i thing corh no hna cu an car.

MATTHAI 14:30

Sihmanhsehlaw thlitu a fah zia kha a vun hmuh tikah a thin a phang i ti chungah cun a pil cuahmah i, “Bawipa, ka khamh tuah,” tiah a au.

MATTHAI 8:25

A zultu cu a sinah khan an va kal i an ṭhangh i, “Bawipa, kan khamh tuah. Kan thi dih cang lai hi ta,” an ti.

MARKA 4:39

Jesuh cu a tho i thlitu cu, “Hrang ti hlah,” tiah nawl a pek i tilet cu, “Dai tuah,” tiah a ti. Thli cu a dai zuahmah i rili cu dai zirziar tein a um.

LUKA 4:35

Jesuh nih thlarau cu, “Dai tein um law, mipa chung khan chuak,” tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak.

LUKA 4:39

Jesuh cu a va kal i a ihkhun pawngah khan a dir i a zawtnak cu a sik. A taklin nih cun a thlah i chikkhatte ah a tho i a bultawl hna.

LUKA 5:5

Simon nih cun, “Bawipa, zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai,” tiah a ti.

LUKA 8:25

Cun a zultu hna cu a thawh hna i, “Khuazei ah dah nan zumhnak cu a um kun?” tiah a ti. Sihmanhsehlaw annih cu an khuaruah a har i an thin a phang i pakhat le pakhat cu, “Hi pa hi aho hen a si? Thlichia le tilet kha nawl a pek hna i an ngaih ko dahngai,” tiah an i ceih.