LEVITIKAS 10:17 - Lai (Hakha) Common Language Bible 2006

¹⁷ “Zeicahdah sual thawinak cu hmunthiang chungah nan ei lo? A thiang bik thil mi zapi ṭhat lonak phortu ding i Bawipa hmai i remnak serpiaknak ca i mah cucu nannih kha pekmi a si ṭung!

LEVITIKAS 10:17 ပူးပေါင်းရင်းမြစ်များ

EXODUS 28:38

Aaron nih khan cucu a cal ah a chiah lai i Israel mi nih Bawipa an pekchanhmi thawinak ah khan ṭhat lonak a um sual ahcun, cuticun cu ṭhat lonak cu ngaihthiam a si lai. Cucu Aaron nih khan a cal ah aa ponh zungzal awk a si lai, zeicahtiah cu ti a tuahnak thawng cun Bawipa nih an pekchanhmi kha a cohlanpiak hna lai.

EXODUS 28:43

Aaron le a fapa hna nih khan pumhnak thlam chung i an luh fate le hmunthiang chung i tlangbawi rian ṭuan awkah biakṭheng an fuh fate, cu tawhrolhtawi cu an i hruk hrimhrim lai, zeicahtiah lang sual hna hlah seh law thah si hna hlah seh ti caah a si. Hihi Aaron le a fapa hna caah a hmunmi phunglam a si.

LEVITIKAS 16:22

Meheh nih cun an ṭhat lonak vialte cu hmunking ah a phorh lai i, meheh cu ramlak ah cun a thlah lai.

LEVITIKAS 21:22

A Pathian ta a simi changreu a ei ko lai, a thiang bik zong, a thiangmi thil zong,

LEVITIKAS 22:16

cu bantuk tuahnak in ṭhat lonak le mawhnak an thil thiang an ei hna thawngin an cungah i tlunhter hna hlah seh: zeitintiah keimah cu a thiantertu hna Bawipa cu ka si,” tiah a ti.

NAMBAR 18:1

Cucaah Bawipa nih Aaron cu a chawnh i, “Nangmah le na fapale hna le na phunhawi hna nih hmunthiang he a pehtlai in ṭhat lonak cu nan in lai; cun nangmah le na fapale hna nih tlangbawi nan sinak he aa pehtlai in ṭhat lonak cu nan in lai.

JOHAN 1:29

A thaizing ah Johan nih cun Jesuh cu a sin i a rat kha a rak hmuh i, “Zohhmanh u, Pathian Tuufa, vawlei sualnak a kalpitu khi!

2 KORIN 5:21

Khrih cu sualnak zeihmanh a ngei lo, sihmanhsehlaw kanmah ruangah Pathian nih kan sualnak kha a hrawmter i cucaah amah he kan i peh ahcun Pathian dinnak kha kan i hrawm ve lai.

HEBRU 9:28

Cu bantuk ṭhiamṭhiam in mi tampi sualnak lakpiak awkah Khrih cu voi khat raithawinak ah pek a si. Cun a hung lang ṭhan lai i cu a hung langh ṭhan cu sualnak kongah si ti loin amah a hngakmi hna khamh awkah a si lai.

1 PETER 2:24

Khrih nih a pum hrimhrim in kan sualnak cu vailam tahnak ah khan a kalpi i cucaah kannih cu sualnak ah khan kan thi cang i dinnak ah kan nung cang. A hma in nan dam cang.