JEREMIAH 7:20 - Lai (Hakha) Common Language Bible 2006

²⁰ Cucaah Bawipa Pathian nih hi bangin a ti: Zohhmanh u, hi hmun cungah hin, minung cung le saṭil cungah, lo chung thingkung hna le vawlei theitlai cungah, ka thinhunnak ka bungh lai; a kang lai i a mit ti lai lo.

JEREMIAH 7:20 ပူးပေါင်းရင်းမြစ်များ

2 SIANGPAHRANG 22:17

annih nih an ka hlawt i pathian dang hna sinah khan zihmui an khangh i annih nih ka thinphawhnak caah an kut in hi rian vialte kha an tuah caah hi hmun cungah hin ka thinhunnak cu a alh lai i a mit lai lo.

ISAIAH 10:17

Israel ceunak Pathian cu, mei ah cun a cang lai. Israel Pathian thiang cu meizik ah cun a cang lai i ni khat chungah zeizong vialte kha a kangh dih hna lai, hling le so hmanh kha a kangh dih hna lai.

ISAIAH 42:25

Cucaah cun a thinhun ṭhawnnak kha a kan inter i ral hremnak kha a kan tuarter. Israel mi hna lakah a thinhunnak cu mei alh in a alh, sihmanhsehlaw zei thil dah a um ti kha kan hngal lo, kan i cawn khawhmi zong zeihmanh a um fawn lo.

ISAIAH 66:24

“An chuah pah ah a ka dohtu hna an ruak kha an hmuh lai. An sa a eitu tholung kha zeitikhmanh ah an thi lai lo i a kanghtu hna mei kha zeitikhmanh ah a mit lai lo. Annih cu an hmuh hna tikah mi vialte cu an luak a chuak lai.”

JEREMIAH 11:16

Hlan ah cun Bawipa nih, ‘Oliv thingkung, a hnah hring dildel tein a um i aa dawhmi,’ tiah a rak in ti. Sihmanhsehlaw atu cu puak cukmak in fahnak na in lai; mei nih na hnah cu a kangh hna lai i na nge cu a hrem dih hna lai.

JEREMIAH 12:4

Zei can dah kan ram hi car remrum in a um lai i A ram hring hna hi rocar in an um lai? A chung mi hna kha an ṭhat lo tuk ca le, ‘Kan tuahmi kha Pathian nih a hmu lai lo,’ tiah an ti caah, Va si hna seh, saram si hna seh, a tangmi zeihmanh an um lo.

JEREMIAH 14:16

Cun annih nih an chimhmi hna zong cu an nupile he an fapale hna he an fanule hna he; vainam le mangṭam ruangah cun phumtu hmanh ngei loin Jerusalem khua chung lam hna ah cun hlonh an si lai. An hmuh awk hnga a simi ṭhat lonak kha an cungah ka toih hna lai.

JEREMIAH 17:27

Sihmanhsehlaw sabbath ni kha thiang tein ulh awk le sabbath ni ah thil phorh lo le Jerusalem kutka ah luhpi lo awk i ka bia kha nan ngaih lo ahcun, hi kutka hna cu mei in ka khangh hna lai; Jerusalem khua i siangpahrang inn hna kha a kangh hna lai i a mit lai lo,” tiah a ti.

JEREMIAH 17:4

Kan pekmi hna nan ro kha nan sung lai. Nan hngalh lomi ram chungah nan ral kha nan rianh hna lai, zeicahtiah ka thinhunnak cu a alhmi mei a si i zungzal in a alh ko lai.

JEREMIAH 18:23

Asi, Maw Bawipa, nangmah nih keimah thahnak ding caah an timhmi vialte cu na hngalh dih ko; An ṭhat lonak kha hlohpiak hna hlah law, an sualnak kha hnawhpiak hna hlah. Ril cuahmah in na hmaiah chuahpi an si tikah, Na thinhun ni ah an cungah cun ṭuan ko.

JEREMIAH 42:18

Hi bangin Ralkapbu Bawipa, Israel Pathian nih a ti: Ka thinhunnak le ka thinlinhnak cu Jerusalem khuami hna cungah bungh a si bantuk khan Izipt ram i nan kal ahcun nan cungah bungh a si ve lai. Nannih cu vawlhpamhmi, tuksapur, holh chia tlenghnak le thangchiatmi nan si lai. Hi hmun hi zeitikhmanh ah nan hmu ti lai lo, tiah a ti hna.

JEREMIAH 44:6

Cucaah Judah ram chung khua hna le Jerusalem khuachung lampi hna ah khan ka thinhunnak cu mei bantukin a kang i nihin i ṭiaotakmi hnawmpon an simi ah hin an cang.

JEREMIAH 6:11

Bawipa, na thinhunnak cu ka chungah a khat, A in in ka ing kho ti lo,” ka ti. Cu tikah Bawipa nih a ka thawh i, “Ka thinhunnak cu khua lak i aa chawkmi ngakchia hna cungah le Aa pummi tlangval hna cungah khan bung ko kun. Pasal si hna seh, nupi si hna seh, cu chungah cun an i tel ve lai i A tar ngaingaimi ṭuakparmi hna zong kha an i tel ve ko lai.

JEREMIAH 6:12

An inn hna cu midang pek an si lai, An lo hna le an nupile hna zong; Zeicahtiah hi ram chung i a ummi hna hi dan ka tat hna lai,” tiah a ti.

JEREMIAH 8:13

An rawl ṭuanpiak kha ka duh ko hna, Sihmanhsehlaw mitsur ruang ah mitsur tlai a um lo i Theipi kung ah thei zong a um lo; An hnah hmanh kha an car dih, tiah Bawipa nih a ti.

ṬAHNAK HLA 4:11

Bawipa nih diriam in a thinlinhnak kha a chuah i a thinhunnak kha a bungh; Zion ah mei a kau i a hram kha a kangh dih.

EZEKIEL 22:22

Nannih cu thir titnak um chungah ngun an tit bantukin kan tit hna lai i nan cungah Bawipa nih ka thinhunnak ka langh kha nannih nih nan hngalh lai,” a ti.

EZEKIEL 7:12

Caan cu a tlung cang, cu ni cu a phan cang; cawtu zong i lawmh awk a si lo, zuartu zong i ngaihchih awk a si hlei lo, zeicahtiah an i tuai le an i hmalnak cungah khan a dihlak in ka thin a hung.

EZEKIEL 7:14

Muko cu an tum cang, zeizong vialte timh a si dih cang, sihmanhsehlaw ahohmanh ral dohnak ah an kal lo.

DANIEL 9:11

Israel mi vialte nih na phunglam kha kan buar i nangmah kha na bia kan in ngai lo, cucaah chiatser thaltanh in na sal Moses sinah na pekmi phungbia chung i a ummi chiatserhnak cu kan cungah ruah sur in a sur; zeicahtiah nangmah cungah cun kan rak sual cang.

LEVITIKAS 26:28

keimah zong thinhun in nanmah ralchanh in ka kal ve lai i keimah hrimhrim nih nan sualnak caah khan a let sarih in kan chimhhrin hna lai.

NAHUM 1:6

Ahodah a thinhunnak hmaika ah cun a dir kho lai? Aho nih dah a thinlinhnak cu an dawnh khawh lai? A thinhunnak cu mei tiva bantukin a luang i a hmaiah lung hna cu an ti dih.

ZEFANIAH 1:2

Vawlei cung i a ummi thil vialte cu thiang tein ka phiah hna lai, tiah Bawipa nih a ti.

ZEFANIAH 1:3

Minung he saram he ka phiah hna lai, Van i a zuangmi va hna le rili chung i a ummi nga hna cu ka phiah hna lai. Miṭhalo cu ka hrawh hna lai i minung cu vawlei cungin ka hloh lai, ti hi Bawipa bia hrimhrim a si.

ZEKHARIAH 7:12

An lungthin cu lung bantukin a hak: hlanlio profet hna thawngin a thlarau in ralkapbu Bawipa nih a cawnpiaknak hna kha i lak an duh lo; cucaah ralkapbu Bawipa thinhunnak ruangah cun fahnak kha an in.

MALAKHI 4:1

A vaam huammammi somei bantukin cu ni cu a ra; miporhlaw vialte hna le ṭhat lonak a tuahmi vialte hna cu favai an si lai, cun cu ni cu a rat tikah, cu ni nih cun annih cu a alhter hna lai i an hram le an nge zong tang loin a kangh dih hna lai, tiah ralkapbu Bawipa nih a ti.

MATTHAI 3:12

A kut in facang zahnak sisiap cu aa put i rawl cu a zah dih hna lai; a fang cu buk ah a rawn hna lai i a hi cu a mit lomi mei in a khangh hna lai,” tiah a ti.

BIAPHUAN 14:10

Pathian zu, a thinhunnak zu, a thinhunnak hrai chung i ti cawh hrimhrim loin thletmi kha an din lai. Cu a dingmi vialte cu vancungmi mithiang hna le Tuufa hmaiah, mei chung le kat chungah, hrem an si lai.