JEREMIAH 50:19 - Lai (Hakha) Common Language Bible 2006

¹⁹ Israel cu a tlon tawnnak hmun ah khan ka kirpi ṭhan lai i Karmel le Bashan ah khan a tlong ṭhan lai; Efraim ram tlang hna le Gilead ram tlang hna cungah khan a paw khim tein rawl a ei lai.

JEREMIAH 50:19 ပူးပေါင်းရင်းမြစ်များ

EZRA 2:1

Babilon siangpahrang Nebukhadnezzar nih Babilonia ah sal ah a kalpimi hna lakin, sal cannak chungin a kir ṭhanmi Judah ram mi cu mah hna hi an si; annih cu Jerusalem le Judah ah khan an kir, anmah le an khua cio ah khan an kir.

SOLOMON HLA 6:5

Ka zoh hlah law nang mit nih ee tang koin ka tlai, Na sawm-ai nih Gilead tlang cungin a ṭum me runrual hna bang.

ISAIAH 33:9

Ram cu a um sawhsawh ko i mi nih an chuahtak. Lebanon tlang tupi cu an car i Sharon nelrawn cu thetse ram bantuk a si, cun Bashan ram le Karmel Tlang thingkung hna cu an hnah a ṭil dih.

ISAIAH 35:2

Thetse ram cu hla a sa lai i lawmhnak in a au lai; Lebanon Tlang bantukin aa dawh lai i Karmel Tlang le Sharon nelrawn lo bantukin a ṭha lai. Mi kip nih Bawipa sunparnak le kan Pathian a lianhngannak le a ṭhawnnak kha an mit in an hmuh lai.

JEREMIAH 23:3

Ka tuu a tangmi hna cu ka dawinak hna ram kip khan keimah hrimhrim nih ka pumh ṭhan hna lai. Anmah le an inn cio ah ka ṭinpi ṭhan hna lai i an pungzam lai i an karhcho lai.

JEREMIAH 3:18

Khi tikah cun Judah chungkhar le Israel chungkhar cu an i fon lai i Hmun khat ah chaklei ram khan, ro caah an pupa ka pekmi hna ram ah khan an ra ṭi lai.

JEREMIAH 30:10

“Cucaah cun ṭih hlah maw Jakob, ka sal; Maw Israel, lungdong in um hlah, tiah Bawipa nih a ti. Zeicahtiah ram hlapi khan kan ratpi ṭhan lai i na tefa hna cu sal i an tannak hmun khan ka kirpi ṭhan hna lai; Cun Jakob cu hnangam tein a um ṭhan lai i thluachuak le lungdai in a um lai.

JEREMIAH 30:18

Bawipa nih hitin a ti: Zohhmanh, Jakob tefa hna cu an vanṭhatnak kha ka pek ṭhan hna lai i An umnak kip ah khan ka dawtnak kha ka hmuhsak hna lai. Khua cu an rawknak mual cungah khan sak an si ṭhan cio lai i Inn kip chungah khan a rak um tawnmi chungkhar kha an um ṭhan cio hna lai.

JEREMIAH 30:7

Ṭih a nungmi ni cu a ra lio; cu tluk ṭih a nungmi ni cu a um bal lo, Cu ni cu Jakob tefa hna caah harnak caan a si; Sihmanhsehlaw him tein an chuak ko lai,” tiah a ti.

JEREMIAH 31:14

Tlangbawi hna cu hi ram thau kha ka vuaiter hna lai i Ka mi hna cu ka ṭhatnak in an khim lai,” tiah Bawipa nih a ti.

JEREMIAH 31:25

A bami cu ka hrimhter ṭhan hna lai i rawlṭam in thazang a tlawmmi cu rawl khim tein ka pek hna lai.

JEREMIAH 31:6

Efraim tlang cung i ralveng hna nih, “Ra u law Zion ah hung kal u sih, Bawipa kan Pathian sinah cun hung kal u sih,” an ti caan kha a ra lio, tiah a ti.

JEREMIAH 32:37

Ka thin hun le ka thin linh le ka thin han in ka dawinak hna ram vialte chung khan ka pumh ṭhan hna lai i hi hmun ah hin ka ratpi ṭhan hna lai i ahohmanh nih hnahnawh lo tein ka umter hna lai.

JEREMIAH 46:27

“Sihmanhsehlaw maw ka sal Jakob, ṭih hlah, Maw Israel, na hnabei dong hlah; Zeicahtiah ram hlapi khan him tein kan kirpi ṭhan hna lai i Nan tefa hna cu sal i an tannak ram khan ka kirpi ṭhan hna lai. Jakob cu thadam tein a um ṭhan lai i Nunnuam le thinphang lo tein khua a sa ṭhan lai.

JEREMIAH 50:6

Ka mi cu tuu tlau an si cang, an tuukhal hna nih khan a pingah an kalter hna i tlang cungah khan an duhnak kip ah an vaihter hna; tlang pakhat in tlang dang pakhat ah an kal lengmang i an kawm kha an philh cang.

EZEKIEL 11:17

Miphun dang hna chung khan ka pumh ṭhan hna lai i ka ṭhek hnanak ram chung khan ka khawmh ṭhan hna lai, cun Israel vawlei cu ka pek ṭhan hna lai.

EZEKIEL 36:24

Miphun hna lak khan kan chuah hna lai i ram kip khan kan pumh hna lai i nanmah vawleite ah khan kan kalpi hna lai.

EZEKIEL 36:33

Mah hihi Bawipa Pathian bia cu an si: Nannih cu nan ṭhat lonak vialte in kan thianh hna tikah khua chungah cun mi ka umter ṭhan hna lai i siangpahrang inn hna cu remh ṭhan an si lai.

EZEKIEL 38:8

Ni tampi hnuah auh na si te lai; hmailei kum tampi hnuah khin, a rawk i remh ṭhanmi ram ah cun na lut ṭhan lai, cu ram cu a mi hna miphun tampi hna lakin kum saupi a ṭiao cangmi Israel ram tlang cung i pumh ṭhan a simi ram cu a si. Miphun hna lakin chuahpimi Israel mi hna cu ahohmanh nih hnahnawh lo tein khua an sa lai;

EZEKIEL 47:18

Nichuahlei ah cun Jordan kha Hauran le Damaskas, Gilead le Israel mi hna karlak ramri a si lai, cun ramri cu a vung kal lai i Nichuahlei Rili ah Tamar tiang a phan lai, cu vial cu nichuahlei ramri kongah cun a si lai.

MIKAH 7:14

Bawipa, na mi na thimmi hna hi nangmah nih khal hna. Annih cu anmah lawngin ramlak ah khan an um i ram hninghno nih khan a kulh hna. Hlan liopi ah an rak tuah bantuk khan Bashan le Gilead i a ummi ramhno lakah cun kalter hna law tlonter hna.

MIKAH 7:18

Bawipa, nangmah bantuk Pathian ahodah a um? Nang nih cun kan ṭhat lonak kha na kan ngaihthiam i na mi a tangmi hna kan sualnak kha na lanhtak, Na thinhunnak kha a zungzal in linhter loin, Aa thleng lomi na dawtnak tu kha na kan hmuhsak.

ZEKHARIAH 10:10

Khi tikah Izipt ram in ka lak hna lai i Assiria ram in ka pumh hna lai; Gilead ram le Lebanon ah ka luhpi hna lai, an ca i hmun a um ti lo tiangin.

NAMBAR 32:1

Reuben fapa hna le Gad fapa hna cu saṭil tampi an ngei. Jazer ram le Gilead ram cu an hmuh i zohhmanh, cu hmun cu saṭil ram a si.

NAMBAR 32:4

Bawipa nih Israel mibu hmaiah a teimi ram hi, saṭil ram a si, cun na salle hna nih hin saṭil kan ngei,” tiah an ti.

JOSHUA 17:15

Cun Joshua nih annih cu, “Nannih cu mi tampi nan si ahcun, tupi ah khin hung kal u law, Periz mi le Refaim mi hna ram ah lo hung vat ngat u, Efraim tlangram cu nan caah a bit tuk ṭung cu ta,” tiah a ti hna.