JEREMIAH 44:27 - Lai (Hakha) Common Language Bible 2006

²⁷ Nan cung i ṭhatnak tlunter awkah si loin ṭhat lonak tlunter dingah nannih cu ṭha tein kan zoh hna, cun Judah ram mi Izipt ram i a ummi vialte nih pakhat hmanh an taan lo tiangin vainam le mangṭam in an thi lai.

JEREMIAH 44:27 ပူးပေါင်းရင်းမြစ်များ

2 SIANGPAHRANG 21:14

Cun a tangmi ka ro hi ka hlonh lai i an ral hna kut chungah ka chanh hna lai i an ral hna caah ral tlaihmi le hranchaw an si lai,

JEREMIAH 1:10

Zohhmanh nihin ah hin nangmah cu miphun hna cung le pennak hna cungah, phawi awk le ṭheh awkah, hrawh awk le hral awkah, sak awk le phun awkah kan chiah cang,” tiah a ti.

JEREMIAH 21:10

Hi khua hi ka hmai ka thuhtak cang, an cung i ṭhatnak tuahnak ding caah si loin chiatnak tuahnak ding caah a si lai. Babilon siangpahrang sinah khan pek a si lai i mei in a khangh lai, tiah Bawipa nih a ti,” tiah a ti.

JEREMIAH 31:28

Annih cu ṭheh awk le phawi awk le chimh awk le hrawh awk le harnak pek awkah ka rak ngiat hna bantuk khan atu cu annih kha tun awk le thawh awkah ka zohkhenh cang hna lai, tiah Bawipa nih a ti.

JEREMIAH 39:16

“Va kal law, Ethiopia mi Ebedmelek cu, hi bangin Ralkapbu Bawipa, Israel Pathian nih a ti, tiah va chim: ‘Zohhmanh, hi khua kong i ka bia kha, ṭhatnak caah si loin chiatnak caah ka tlinter lai i khi ni a phak tikah cucu hmuh awkah khika ah na um lai.

JEREMIAH 42:16

nan ṭihmi vainam nih khan khika Izipt ram ah cun an dawi cuahmah ko hna lai i khika ah nan thi lai.

JEREMIAH 44:12

Izipt ram chung i um hmun khuar awkah kal aa tim pengmi cu Izipt ram ah cun an donghnak an phan dih lai. A cheu cu nam in an thi lai, a cheu cu mangṭam in an thi lai. A sang he a niam he aa khatrep in vainam in siseh, mangṭam in siseh, an thi lai i annih cu vawlhpamhmi, tuksapur, holhchia tlenghnak le thangchiatmi an si lai.

JEREMIAH 44:13

Jerusalem i a ummi kha dan ka tat hna bantukin Izipt ram chung i a ummi hna cu vainam le mangṭam le rai in dan ka tat ve hna lai.

JEREMIAH 44:14

Judah ram i a tangmi hna nih khan Judah ram ah kan kir ṭhan te lai i khika ah kan um ṭhan te lai ti ruahchannak in Izipt ram i um hmun khuar awkah an ra; sihmanhsehlaw an kir ṭhan ti lai lo, pakhat hmanh an nung lai lo, pakhat hmanh an luat lai lo.

JEREMIAH 44:18

Sihmanhsehlaw Vancung Khuazingnu sin i thawinak khangh kan ngol le thlet thawinak pekchanh kan ngol ri in zei paohpaoh kan chambau dih i vainam le mangṭam in kan thi lengmang,’ an ti.

JEREMIAH 9:15

Cucaah Ralkapbu Bawipa keimah Israel Pathian nih ka tuah laimi kha ngai hmanh. Ka mi hna hi ei awkah anfangkha ka pek hna lai i din awkah sivai cawhmi ti kha ka pek hna lai.

JEREMIAH 9:16

An pupa nih si hna seh, anmah nih si hna seh, an hngalh bal lomi miphun hna sinah ka ṭhek hna lai i ka lim cikcek hna hlantiang vainam kha ka thlahhnawh hna lai, tiah a ti.

EZEKIEL 5:12

Na mi cheu thum cheu khat cu na chungah rai le mangṭam in an thi lai; cheu thum cheu khat cu na pawngkam ram ah vainam in an thi lai; cun cheu thum cheu khat cu khuazakip ah ka ṭhek hna lai i phawi cia vainam he ka zulh hna lai.

EZEKIEL 7:6

Ram chung i a ummi hna, nan cungah khuacimuihnak ni a tlung cang; cu caan cu a phan dengmang cang, cu ni cu a nai cang, hnahnawhnak le khuari thawng he a ra lai.

DANIEL 9:14

Bawipa kan Pathian, nangmah nih na tuahmi thil vialte cu a hmaanmi a si i kannih cu nangmah bia a ngai lomi kan si caah nangmah nih kannih dantat awk kha naa tim i dan cu na kan tat taktak.

AMOS 9:8

Zohhmanh, Bawipa Pathian nih hi a sualmi pennak cungah hin ka mit ka chiah i, Vawlei cung hin ka hloh lai,” tiah a ti. Asinain Jakob tefa hna cu an ci an ruang in ka hlo hna lai lo, tiah Bawipa nih a ti.