JEREMIAH 3:18 - Lai (Hakha) Common Language Bible 2006

¹⁸ Khi tikah cun Judah chungkhar le Israel chungkhar cu an i fon lai i Hmun khat ah chaklei ram khan, ro caah an pupa ka pekmi hna ram ah khan an ra ṭi lai.

JEREMIAH 3:18 ပူးပေါင်းရင်းမြစ်များ

GENESIS 12:7

Bawipa cu Abram sinah khan a lang i, “Hi ram hi na tefa ka pek hna laimi ram cu a si,” a ti. Cuka ah cun amah sin i a rung langmi Bawipa caah khan Abram nih biakṭheng pakhat a ser.

ISAIAH 43:5

Na thinphang hlah — na sinah ka um ko. A hlatmi nichuahlei ram le a hlat bik nitlaklei ram in, na mi cu inn ah ka tlunpi hna lai.

ISAIAH 43:6

Chaklei ram cu, thlah hna u, ka ti hna lai i thlanglei ram cu, tlai hna hlah u, ka ti hna lai. Ram hla pipi in ka mi cu kir hna seh law, vawlei cung khuazakip in kir hna seh.

JEREMIAH 16:15

‘Chaklei ram le ṭhek an sinak ram vialte hna chungin Israel mi a kirpitu hna Bawipa a nun bangin,’ tiin mi nih chiat an ser lai caan kha a ra lio; cun an pupa hna sinah ka rak pekmi anmah ramte ah khan ka kirpi ṭhan hna lai, tiah Bawipa nih a ti.

JEREMIAH 23:8

‘Israel tefa hna chaklei ram in le a ṭhawl hnanak ram kip chungin, anmah le an vawlei cio i khuasakter ṭhan awkah a ratpitu hna Bawipa a nun bangin,’ ti in chiatsernak an tuah lainak caan kha a ra lio,” tiah Bawipa nih a ti.

JEREMIAH 3:12

Va kal law hi bia hi chaklei ah va thanh law hitihin va ti: Zumhawktlak lo Israel, ra kir tuah, tiah Bawipa nih a ti; Nangmah cu thinhunnak in kan zoh ti lai lo, Zeicahtiah kei cu zaangfah thiammi ka si, tiah Bawipa nih a ti; Zungzal in ka thin a hung lai lo.

JEREMIAH 30:3

zeicahtiah mah hihi Bawipa bia hrimhrim a si: Ka mi Israel mi hna le Judah mi hna an vanṭhatnak ka pek ṭhan hna lai ni a ra lio, tiah Bawipa nih a ti; an pupa hna sinah ka pekmi ram ah khan ka kirpi ṭhan hna lai i cu ram cu an co lai.

JEREMIAH 31:8

Chaklei ram in ka ratpi hna lai, Vanhramdeng in ka pumh hna lai. Mitcaw le kebei zong an sinah an ra ve lai i Fapawi le a ni thla a tling dengmangmi hna zong an sinah an i tel lai; Miphun ngan piin an ra kir ṭhan lai.

JEREMIAH 50:20

Cu caan a phak tikah Israel mi hna chungah sualnak hmuh a si lai lo i Judah mi hna chungah ṭhat lonak hmuh a si lai lo; zeicahtiah ka nuntermi hna cu an sualnak kha ka ngaihthiam hna lai, tiah Bawipa nih a ti.

JEREMIAH 50:4

Khi ni le khi caan ah cun Israel mi hna le Judah mi hna cu hmun khat ah an ra ṭi lai i Bawipa an Pathian cu mitthli he an kawl lai;

JEREMIAH 50:5

Zion lei hoih in cuka kalnak ding lam cu an hal hna lai i, “Ra tuah u, zungzal hmunmi, philh khawh lo ding biakamnak in Bawipa sinah i peh u sih,” an ti lai, tiah Bawipa nih a ti.

JEREMIAH 7:7

Khi tikah hlanlio piin nan pupa hna sinah zungzal in co awkah ka pekmi hna ram ah hin nannih cu kan umter ko hna lai.

EZEKIEL 11:17

Miphun dang hna chung khan ka pumh ṭhan hna lai i ka ṭhek hnanak ram chung khan ka khawmh ṭhan hna lai, cun Israel vawlei cu ka pek ṭhan hna lai.

HOSEA 1:11

Cun Judah mi le Israel mi hna cu hmunkhat ah fonh an si lai i anmahte nih hruaitu pakhat kha an i thim lai, cun annih nih ram kha an co lai, Jezreel ni cu a lianngan lai.

HOSEA 11:12

Efraim nih hlennak bia in a ka kulh i Israel chungkhar hna nih dehnak bia in an ka kulh; Cun Judah cu Pathian kha zulh duh loin aa chang i, A thiang tiah a timi siasal kha an biak ko rih hna.

HOSEA 2:2

Nan nu cu lem tuah u, Amah cu keimah nupi a si lo maw? Keimah cu a va ka si lo maw? Hlawhhlangnu muisam a kenmi cu a hlawt i a duhtu hna cu a ṭang in a ṭhen hna nakhnga, lem tuah u.

AMOS 9:15

Anmah cu anmahle an vawlei te ah khan ka phun ṭhan hna lai i Ka pekmi hna vawlei khan zeitikhmanh ah phawi an si ṭhan bal ti lai lo, tiah Bawipa nan Pathian nih a chim.”

ZEKHARIAH 10:6

Judah innchungkhar cu ṭhawnnak ka pek hna lai i Josef innchungkhar cu teinak ka pek hna lai; Annih cu ka zaangfah hna caah ka kirpi ṭhan hna lai i, Rak hlonh bal hna hlah ning law, cu bantuk cu an si lai; Zeicahtiah keimah cu Bawipa an Pathian ka si i an ka halnak cu ka leh hna lai.

ZEKHARIAH 2:6

Tho u, tho u, chaklei ram in zam u, tiah Bawipa nih a ti; zeicahtiah vancung thlitu pali hna bantuk khin nan thla kan zamter hna lai, tiah Bawipa nih a ti.