JEREMIAH 23:3 - Lai (Hakha) Common Language Bible 2006

³ Ka tuu a tangmi hna cu ka dawinak hna ram kip khan keimah hrimhrim nih ka pumh ṭhan hna lai. Anmah le an inn cio ah ka ṭinpi ṭhan hna lai i an pungzam lai i an karhcho lai.

JEREMIAH 23:3 ပူးပေါင်းရင်းမြစ်များ

SALM 106:47

Maw Bawipa, kan Pathian, kan khamh tuah, miphun tampi lak i kan i ṭheknak in kan khawm ṭhan law na min thiang kha kan thangṭhat lai i nangmah lawmhnak bia chim in kan i lawm lai.

JEREMIAH 16:15

‘Chaklei ram le ṭhek an sinak ram vialte hna chungin Israel mi a kirpitu hna Bawipa a nun bangin,’ tiin mi nih chiat an ser lai caan kha a ra lio; cun an pupa hna sinah ka rak pekmi anmah ramte ah khan ka kirpi ṭhan hna lai, tiah Bawipa nih a ti.

JEREMIAH 29:14

keimah cu nan ka hmuh lai, tiah Bawipa nih a ti. Cun nannih cu nan vanṭhatnak kha kan pek ṭhan hna lai i miphun vialte hna sin le hmun kip i kan ṭhawl hnanak hmun khan kan pumh ṭhan hna lai i saltannak chungah kan kalter hnanak hmun khan cuka i nan rak kalnak nan ram ah khan kan kirpi ṭhan hna lai, tiah Bawipa nih a ti.

JEREMIAH 30:10

“Cucaah cun ṭih hlah maw Jakob, ka sal; Maw Israel, lungdong in um hlah, tiah Bawipa nih a ti. Zeicahtiah ram hlapi khan kan ratpi ṭhan lai i na tefa hna cu sal i an tannak hmun khan ka kirpi ṭhan hna lai; Cun Jakob cu hnangam tein a um ṭhan lai i thluachuak le lungdai in a um lai.

JEREMIAH 30:3

zeicahtiah mah hihi Bawipa bia hrimhrim a si: Ka mi Israel mi hna le Judah mi hna an vanṭhatnak ka pek ṭhan hna lai ni a ra lio, tiah Bawipa nih a ti; an pupa hna sinah ka pekmi ram ah khan ka kirpi ṭhan hna lai i cu ram cu an co lai.

JEREMIAH 31:7

Zeicahtiah mah hihi Bawipa bia cu a si: Jakob ruangah lunglawmhnak in thang piin au tuah u, Miphun lakah phun ngan bik a si; Thangṭhatnak cu hla in sa u law, Bawipa nih a mi cu a khamh cang hna i Israel mi a tangmi hna cu a zuah hna, tiah chim u.

JEREMIAH 31:8

Chaklei ram in ka ratpi hna lai, Vanhramdeng in ka pumh hna lai. Mitcaw le kebei zong an sinah an ra ve lai i Fapawi le a ni thla a tling dengmangmi hna zong an sinah an i tel lai; Miphun ngan piin an ra kir ṭhan lai.

JEREMIAH 32:37

Ka thin hun le ka thin linh le ka thin han in ka dawinak hna ram vialte chung khan ka pumh ṭhan hna lai i hi hmun ah hin ka ratpi ṭhan hna lai i ahohmanh nih hnahnawh lo tein ka umter hna lai.

JEREMIAH 46:27

“Sihmanhsehlaw maw ka sal Jakob, ṭih hlah, Maw Israel, na hnabei dong hlah; Zeicahtiah ram hlapi khan him tein kan kirpi ṭhan hna lai i Nan tefa hna cu sal i an tannak ram khan ka kirpi ṭhan hna lai. Jakob cu thadam tein a um ṭhan lai i Nunnuam le thinphang lo tein khua a sa ṭhan lai.

JEREMIAH 50:19

Israel cu a tlon tawnnak hmun ah khan ka kirpi ṭhan lai i Karmel le Bashan ah khan a tlong ṭhan lai; Efraim ram tlang hna le Gilead ram tlang hna cungah khan a paw khim tein rawl a ei lai.

JEREMIAH 8:3

Hi miphun ṭhalo chungin a nungmi paohpaoh nih hin, ka ṭhawl hnanak hmun kip ah, nun nakin thih an duh deuh lai,” tiah Ralkapbu Bawipa nih a ti.

EZEKIEL 11:17

Miphun dang hna chung khan ka pumh ṭhan hna lai i ka ṭhek hnanak ram chung khan ka khawmh ṭhan hna lai, cun Israel vawlei cu ka pek ṭhan hna lai.

EZEKIEL 36:11

Nan cungah minung tampi le saṭil tampi ka phun hna lai; annih cu an karh lai i tefa tampi an ngei lai. Nannih cu hlanlio nakin tam deuh le rum deuh ah kan ser hna lai. Cuticun Bawipa ka si kha nan hngalh lai.

EZEKIEL 36:24

Miphun hna lak khan kan chuah hna lai i ram kip khan kan pumh hna lai i nanmah vawleite ah khan kan kalpi hna lai.

EZEKIEL 36:37

Mah hihi Bawipa Pathian bia an si: Israel mi cu hihi ka hal u, tiah ka ti rih hna lai: An pa hna cu tuu zat in ka tamter hna lai, laksawng thiang ah pekchanhmi tuu hna bantukin, puai caan i Jerusalem khua tuu hna bantuk ah ka ser hna lai.

LEVITIKAS 26:9

Cun nannih cu hmaizahnak kan pek hna lai i kan punzamter hna lai i kan karhsoter hna lai i, nannih he ka biakamnak kha ka fehter lai.

MIKAH 2:12

“Sihmanhsehlaw nannih Israel mi a tangmi vialte cu hmunkhat ah kan pumh hna lai. Tuukawm kawm khat chung i a ummi bantuk le tlonnak pakhat chung i a tlongmi tuu bantukin hmunkhat ah kan pumh hna lai i, Nan ram ah cun mi tampi thawngpang a leng lai,” a ti.

MIKAH 7:12

Nan mi hna cu a kenkip in nan sinah an ra kir lai — nichuahlei ah Assiria in, thlanglei ah Izipt ram in, a hlatnak rili in le tlang kip in an ra kir lai.