ISAIAH 45:18 - Lai (Hakha) Common Language Bible 2006

¹⁸ Van cu Bawipa nih a ser hna — amah cu Pathian a si. Vawlei kha a ser i a siam — fekte le saupi nguh in a ser, vawlei cu thetse ram, ram pakpalawng ah a ser lo, minung umnak caah a ser. Amah cu, “Keimah hi Bawipa cu ka si, keimah hleiah pathian dang an um lo,” a titu kha a si.

ISAIAH 45:18 ပူးပေါင်းရင်းမြစ်များ

GENESIS 1:1

A hramthawk ah, Pathian nih van le vawlei a ser hna tikah,

GENESIS 1:2

vawlei cu mui zong a ngei lo, pungsan zong a ngei lo. Rilipi cu muihnak nih a khuh i ti cungah cun Pathian ṭhawnnak cu aa chawk.

GENESIS 1:26

Cun Pathian nih cun, “Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai,” tiah a ti.

GENESIS 1:28

Thluachuahnak a pek hna i, “Tefa tampi in ngei u law nan tefa cu vawlei cung khuazakip ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna,” a ti.

GENESIS 9:1

Pathian nih Noah le a fapa hna cu thluachuah a pek hna i, “Fa tampi in ngei hna u law nan fale cu vawlei cung khuazakip ah khat hna seh.

SALM 115:16

Vancung khi Bawipa ta a si, sihmanhsehlaw vawlei hi cu, mi kha a pek hna.

PHUNGTHLÛKBIA 30:4

Van ah khin ahodah a hung kai i a ṭum ṭhan? Aho nih dah a kut chungah thli kha a hum hna? Aho nih dah ti kha a puan in a fun hna? Aho nih dah vawlei cu a ramri kha a ser hna? A min cu ahodah a si i a fapa min cu ahodah a si? Na hngalh ahcun chim tuah.

ISAIAH 42:5

Pathian nih van khi a ser hna i a samh hna; vawlei le a cung i a ummi thilnung vialte kha amah nih a ser hna; vawlei cung i a ummi vialte kha nunnak le thaw a pek hna. Cu Bawipa Pathian nih cun a sal cu a thawh i,

ISAIAH 44:24

“Keimah cu Bawipa, nanmah an sertu hna le an khamhtu hna ka si. Keimah cu zeizong vialte a sertu Bawipa ka si. Keimah lawnglawng nih van cu ka samh hna; vawlei ka rak ser ah hin ahohmanh nih an ka bawm lo.

ISAIAH 45:12

Vawlei a sertu cu keimah ka si i a cung um dingah mi a sertu cu keimah ka si. Ka ṭhawnnak in van cu ka samh hna i ni le thlapa le arfi cu ka uk hna.

ISAIAH 48:13

Ka kut in vawlei hram kha ka ser hna i van kha ka samh hna. Van le vawlei kha ka auh hna tikah, khulrang tein an ra chuak.

ISAIAH 51:13

Nanmah kha an sertu hna le van kha a samh i vawlei hram a bunhtu Bawipa kha nan philh cang dahra? Nanmah an hremtu hna an thinhun le nanmah thah an zaltu hna an thinlinh cu zeicahdah ṭih zungzal in nan um? An thinhunnak nih cun a tawngh hmanh an tawng kho hna lai lo.

JEREMIAH 10:12

Pathian nih vawlei hi a ṭhawnnak in a ser Vawlei hi a fimnak in a umnak hmun ah hin a umter Van khi a thiamnak in a samh hna.

JEREMIAH 51:15

Pathian nih vawlei hi a ṭhawnnak in a ser, Vawlei hi a umnak hmun ah hin a fimnak in a umter; Van khi a thiamnak in a samh hna.