GENESIS 24:27 - Lai (Hakha) Common Language Bible 2006

²⁷ Cun aa thawh i, “Ka bawipa Abraham i a Pathian, ka bawipa sin i a biakam let lo tein a ummi cu thangṭhat si ko seh. Bawipa nih ka bawipa i a unau inn ah ding tein a ka hruai ko,” tiah a ti.

GENESIS 24:27 ပူးပေါင်းရင်းမြစ်များ

GENESIS 13:8

Cun Abram nih Lot cu a thawh i, “Kannih cu rualchan kan si, na mi hna le ka mi hna hi an i sik lengmang awk a si lo.

GENESIS 14:20

Na ral an teitertu Cung Nung Bik Pathian cu thangṭhat si ko seh,” a ti. Cun Abram nih hranchaw a lakmi vialte cheuhra cheukhat a pek.

GENESIS 24:12

Cun thla a cam i, “Bawipa, ka bawipa Abraham i a Pathian, nihin ah hin hlawhtlinnak ka pe law ka bawipa sin i bia na kammi kha hmunhter ko.

GENESIS 24:21

Bawipa nih ka khualtlawnnak ah hin hlawhtlinnak a ka pe maw pe lo tiin mipa nih khan Rebekah cu dai tein a zoh ko.

GENESIS 24:4

Ka chuahkehnak ram ah khan na va kal lai i ka rualchan hna chung khan ka fapa Isak caah cun nupi na va ṭhit lai,” tiah a ti.

GENESIS 24:42

“Cun nihin i tikhor ka ra phak ah khan thla ka cam i, Bawipa, ka bawipa Abraham i Pathian, ka khualtlawnnak ah hin nangmah nih thluachuahnak ka pe ko.

GENESIS 24:48

Ka khuk kaa bil i Bawipa kha ka biak, cun lam ṭha tein a ka hruaitu Pathian, ka bawipa Abraham i a Bawipa kha ka thangṭhat. Amah nih cun ka bawipa i a unau inn ah hin a ka hruai i a fanu kha ka Bawipa fapa caah cun ka hmuh cang.

GENESIS 32:10

Na sal ka cung i na zaangfahnak le zumhawktlak na sinak na langhtermi hi a hmu dingah aa tlakmi ka si lo. Jordan tiva kha ka ṭhiangṭhunh he lawng ka rak tan, sihmanhsehlaw atu cu hi bu bu hnih hna he hin ka ra kir.

GENESIS 32:11

Cucaah cun ka u Esau kut chung hin ka khamh ko tiah kan nawl. Kanmah doh awk le hrawh awkah, hi nu le ngakchia hna tiang hin hrawh awkah a ra rua tiah ka ruah i ka thin a phang ko.

GENESIS 9:26

Cun aa thawh ṭhan i, “Shem Pathian Bawipa cu thangṭhat ko u. Kanaan cu Shem sal a si lai.

2 SAMUEL 18:28

Cun Ahimaaz nih siangpahrang cu a hei auh i, “A ṭha dih ko,” tiah a ti. Cun siangpahrang hmaiah cun vawlei lei hoih in a lu a khun i, “Siangpahrang ka bawipa doh awkah a thomi vialte a sunghtertu hna Bawipa na Pathian cu thangṭhat si ko seh,” tiah a ti.

SALM 100:5

Bawipa cu a ṭha; a fekmi a dawtnak cu zungzal in a hmun, zumhawktlak a sinak cu chan vialte tiangin a hmun.

SALM 68:19

Ni khat hnu ni khat kan thilrit a kan changtu Bawipa cu thangṭhat ko u, amah cu a kan khamhtu Pathian a si.

SALM 98:3

Israel mi bia a kamhmi hna kha a zulh i an cungah a fekmi dawtnak a ngei i zumhawktlak in a um. Kan Pathian nih ral a teinak kha mi vialte nih khuazakip ah an hmuh.

EXODUS 18:10

Aa thawh i, “Izipt mi hna kut chung le Faro kut chungin an khamhtu hna Bawipa cu thangṭhat ko u. Izipt mi kut tang sal cannak i a mi a khamhtu hna Bawipa cu thangṭhat ko u.

EXODUS 2:11

Cu hnu tlawmpal, Moses cu a hung upat tikah khan, a phunhawi mi cu a va leng hna i zeitluk in dah rianhrang ṭuan an hnek hna ti kha a va hmuh. A miphun hawi pakhat Izipt mipa i a thah zong kha a va hmuh fawn.

EXODUS 2:13

A thaizing ah khan a va kal ṭhan i Hebru mi pahnih an rak i velh len ko kha a hmuh hna. A sualpa cu a thawh i, “Zeicahdah na phunhawi a si mipa cu na velh len ko?” a ti.

EXODUS 34:6

Bawipa cu a hmaika cun a lan i, “Bawipa cu zaangfahnak le vel ngeihnak in a khatmi Pathian a si, amah cu fawi tein a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si.

PHUNGTHLÛKBIA 3:6

Na kalnak lam kip ah amah kha hngal law Amah nih na lam kha a tluanter hna lai.

PHUNGTHLÛKBIA 8:20

Dinnak lam ah khan ka kal i biading lam ah khan ka kal,

MIKAH 7:20

Kan pupa hna sinah chiatser in bia na rak kam cang bantuk khan, Na mi Israel mi kan cungah hin zumhawktlak na sinak kha na langhter lai i kannih Abraham tefa hna hi aa thleng lomi na dawtnak kha na kan hmuhter lai.

LUKA 1:68

“Bawipa, Israel Pathian cu thangṭhat u sih. A mi hna bawmh awkah a ra cang i a luatter cang hna.

JOHAN 1:17

Pathian nih Phungbia cu Moses thawng khan a kan pek, sihmanhsehlaw vel le biatak cu Jesuh Khrih thawng khan a ra.

EFESA 1:3

Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawngin kannih cu vancung ram ah hin thlarau laksawng phun kip kha a kan pek.

1TIMOTE 1:17

Zungzal in a hmunmi Siangpahrang, thih a thiam lomi le mit in hmuh khawh a si lomi Pathian, Amah lawnglawng Pathian a simi cu, zungzal in zungzal tiang, upatnak le sunparnak, pek si ko seh! Amen.

RUTH 4:14

Cun nu hna nih khan Naomi sinah cun, “Nihin ni i rualchan naih chambau loin an umtertu Bawipa cu thangṭhat si ko seh; amah min cu Israel mi lakah thang ko seh!

1 SAMUEL 25:32

Cun David nih Abigail cu a thawh i, “Bawipa, Israel Pathian, nihin i keimah ton awkah nangmah an thlahtu hi thangṭhat si ko seh!

1 SAMUEL 25:39

David nih Nabal kha a thi tiah a theih tikah, “Nabal kut ah ningzahnak ka hmuhmi phu a hlam i a sal kha ṭhat lonak tuah loin a ka khamtu Bawipa cu thangṭhat si ko seh; Bawipa nih Nabal cu ṭhat lonak a tuahmi kha amah lu cung lila ah a tlunter ṭhan,” tiah a ti. Cun David nih mi a hei thlah hna i Abigail kha a nupi caah an len.