ESTHER 9:3 - Lai (Hakha) Common Language Bible 2006

³ Peng uktu bawi hna le siangpahrang kut tang bawi hna le ram uktu bawi hna le siangpahrang rianṭuantu bawi hna zong nih khan Judah mi cu an bawmh hna, zeicahtiah Mordekai kha an ṭih.

ESTHER 9:3 ပူးပေါင်းရင်းမြစ်များ

EZRA 2:2

Annih cu Zerubbabel, Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum le Baanah sin i a kirmi an si. Israel mi cu hi zat hi an si:

EZRA 8:36

Cun siangpahrang nih a chiahmi bawi upa hna le Tiva Ral ram uktu bawi hna sinah cun siangpahrang nawlbia ca zong cu an pek hna i annih nih mi hna le Pathian inn cu an bawmh hna.

ESTHER 3:12

Cun siangpahrang ca ṭialtu hna kha thla khatnak thla, a ni hleithum ni ah an auh hna i Haman nih a nawlngeihnak vialte kha hmang in, siangpahrang kut tang bawi hna le peng vialte a uktu bawi hna le mi vialte a uktu bawi hna sinah khan, an peng chung i an hmanmi ca cio in le an miphun nih an hmanmi holh cio in nawlbia pakhat an ṭial; Siangpahrang Ahasuerus min in ṭial a si i siangpahrang kutdong hrolh in khenh chih a si.

ESTHER 8:17

Cun peng kip le khua kip ah khan, siangpahrang nawlbia le biakhiahnak a phaknak paoh ah Judah mi hna caah cun lawmhnak le thanuamnak a um i rawldanghnak an tuah i i dinh ni kha an ser. Cun Judah mi ṭihnak kha an cungah a tlun caah cuka ram mi miphun hna chung cun mi tampi nih Judah mi ka si tiah an i ti.

ESTHER 8:5

cun Esther cu a tho i siangpahrang hmaiah cun a dir. Cun aa thawh i, “Siangpahrang na duhnak a si i na hmaiah mithmai ṭha ka hmuh i siangpahrang na hmaiah hi thil hi ahmaanmi a si i na mit ka tlin a si ahcun, siangpahrang ram chung peng dihlak i a ummi Judah mi hna hrawhnak ding ca i Agag mi Haman, Hammedatha fapa nih a rak ṭialmi ca letnak caah khan nawlbia pakhat in ṭial si seh.

ESTHER 8:9

Thla thumnak thla, Sivan thla, a ni kul le ni thum ni ah, khi caan ah siangpahrang caṭialtu kha an auh i Mordekai nawl peknak ning paoh khan, India ram in Ethiopia ram tiang siangpahrang kut tang bawi hna le ram uktu hna le bawi dangdang hna sinah khan, Judah mi kong cu ca in an kuat hna, peng za khat le peng kul le peng sarih an si, peng kip ah anmah le an ca cio in le miphun kip sinah anmahle an holh cio in an kuat hna, cun Judah mi hna zong cu anmahle an ca le an holh in an kuat ve hna.

DANIEL 3:2

Cun mangki, zipeng, vuanthok, upadi thiammi, tangka kengtu, biaceihtu, ram zohkhenhtu bawi le ram ukbawi vialte hna kha, a phunmi milem conglawmhnak i tel awkah cun a cah hna.