DEUTERONOMI 7:8 - Lai (Hakha) Common Language Bible 2006

⁸ Sihmanhsehlaw Bawipa nih an dawt hna i nan pupa hna sinah chiat a sermi biakamnak cu a tlinter caah, Bawipa nih a ṭhawngmi kut in an chuahpi hna i sal cannak inn chung khan an tlanh hna, Izipt siangpahrang Faro kut chung khan, an chuah hna.

DEUTERONOMI 7:8 ပူးပေါင်းရင်းမြစ်များ

GENESIS 19:16

Asinain Lot cu aa nuainai i sihmanhsehlaw Bawipa nih khan a cungah zaangfahnak kha a ngeih caah, mi nih khan amah cu le a nupi le a fanu pahnih hna cu an kut in an hnuh hna i khua lengah an chuahpi hna i cuka ah cun an kaltak hna.

GENESIS 19:29

Asinain Pathian nih nelrawn chung ummi khua kha a hrawh hna tikah Abraham kha a philh lo i Lot kha himnak hmun ah a zamter.

2 SAMUEL 22:20

Hmun kaupi ah a ka kalpi; Keimah chungah lawmhnak a ngeih caah a ka chuahter.

1 SIANGPAHRANG 10:9

Bawipa na Pathian, nangmah chungah lawmhnak a ngei i Israel mi bawi ṭhutdan cungah an ṭhuttertu cu thangṭhat si ko seh. Bawipa nih Israel cu zungzal in a dawt caah, nangmah nih biading le dinnak cu na tuah nakhnga, siangpahrang ah an ser,” tiah a ti.

1 CHANRELNAK 16:16

Abraham he biakamnak a tuah, Isak sinah chiatser in bia a kam;

2 CHANRELNAK 9:8

Bawipa na Pathian, nangmah chungah lawmhnak a ngei i Bawipa na Pathian ca i siangpahrang ah a bawi ṭhutdan cungah an ṭhuttertu cu thangṭhat si ko seh! Na Pathian nih Israel mi cu a dawt hna i zungzal in hmunhter a duh hna caah, nangmah nih biading le dinnak kha na tuah nakhnga, an cung i siangpahrang ah an ser,” tiah a ti.

SALM 105:42

A sal Abraham sinah a sermi a biakam thiang kha a philh lo.

SALM 44:3

Hi ram cu na mi nih an nam in an teimi a si lo, anmah ṭhawnnak in an teimi zong a si lo; nangmah lianhngannak le ṭhawnnak in a si i nangmah nih na dawt hna langhternak caah an sin i na umhnawh hnanak tu nih khan hi ram cu a tei.

SALM 44:4

Nangmah cu ka siangpahrang le ka Pathian na si; nangmah nih na mi cu teinak na pek hna.

EXODUS 13:14

Hmailei ah nan fale nih, ‘Hihi a sullam zeidah a si?’ tiah an in hal hna ahcun, ‘Sal i kan cannak inn, Izipt ram chung i fater vialte kha, minung he saram he, Bawipa nih a rak thah dih hna. Cu ruangah cun fater paohpaoh Bawipa sinah raithawinak i kan pekchanh hna hi a si i kan fater hna kan tlanh hna hi a si,’ tiah nan leh hna lai.

EXODUS 13:3

Mi zapi kha Moses nih cun a thawh hna i, “Sal ah nan cannak inn, Izipt ram in nan chuah ni hi philh hrimhrim hlah u, zeicahtiah hi ni ah hin Bawipa nih ṭhawnnak a liannganmi he an chuahpi hna. Thilnu phulhmi changreu nan ei hrimhrim lai lo.

EXODUS 20:2

Aa thawh i, “Sal i nan cannak inn chung, Izipt ram chungin an chuahtu hna cu Bawipa nan Pathian hi ka si.

EXODUS 32:13

Na sal Abraham le Isak le Israel kha philh hna hlah law, an sinah na min chalh in chiatser in bia naa kam i, ‘Van i a ummi arfi zat khin tefa kan pek hna lai. Kan kamhmi hna ram hi a dihlak in nan tefa kha ka pek hna lai i anmah ta zungzal in a si lai,’ na timi zong kha philh sawh hlah,” a ti.

EXODUS 6:6

Cucaah cun Israel mi cu na va thawh hna lai i, ‘Keimah cu Bawipa ka si: Izipt mi hna nih hramhram in an in ṭuantermi hna rian hin kan luatter hna lai. An sal nan sinak chung hin kan chuah hna lai. Ṭih a nungmi dantatnak tlunter awkah aa samhmi ka baan ṭhawng hin, nannih cu kan khamh hna lai.

ISAIAH 43:4

Na nunnak khamh awkah miphun pipi zong kha ka hlawt ko hna lai, zeicahtiah nangmah cu ka caah a sungmi na si i upatnak kan pek i kan dawtmi na si.

ISAIAH 63:9

Annih khamhtu cu vancungmi a si lo, Bawipa hrimhrim kha a si. A dawt hna i an zawn a ruah hna caah a khamh hna. Hlanah khan a rak zohkhenh zungzal ko hna.

JEREMIAH 31:3

Lamhlat piin an sinah ka rung lang; Israel mi hna, nannih cu kan dawt zungzal hna i Dong loin kan zohkhenh zungzal ko hna.

EZEKIEL 36:22

“Cucaah Israel mi cu, hihi Bawipa Pathian bia a si, tiah chim hna. Nannih Israel mi hna, hi ka tuahmi hi nanmah ruangah a si lo, nan phaknak miphun kip sin i nan thurhhnawmhtermi ka min thiang ruangah khan a si deuh.

MIKAH 6:4

Izipt ram in kan chuahpi hna, sal cannak ram in kan tlanh hna; Nanmah hruai awkah Moses le Aaron le Miriam kha ka thlah hna.

MIKAH 7:20

Kan pupa hna sinah chiatser in bia na rak kam cang bantuk khan, Na mi Israel mi kan cungah hin zumhawktlak na sinak kha na langhter lai i kannih Abraham tefa hna hi aa thleng lomi na dawtnak kha na kan hmuhter lai.

ZEFANIAH 3:17

Bawipa na Pathian cu, nangmah kha him tein umter awkah na chungah ralkap bantukin a um ko; Na cungah a lung aa lawm lai i a tha a nuam lai; A dawtnak cu an hmuhter ṭhan lai; Hlanlio bantuk khan na cungah lunglawmhnak au thawng he aa lawm lai.

MALAKHI 1:2

“Nannih cu kan dawt hna,” tiah Bawipa nih a ti. Nannih nih nan i thawh i, “Kannih cu na kan dawt maw?” nan ti.

MATTHAI 11:26

Asi, ka Pa, cucu nangmah nih siseh ti na duhningte a si.

LUKA 1:55

Abraham le a tefa vialte hna sinah zungzal in zaangfahnak langhter ding kha a philh lo,” tiah a ti.

ROM 11:28

Thawngṭha kong in ti ahcun, annih cu Pathian ral an si; Thawngṭha an cohlan duh lo caah — cucu nanmah Jentail mi ṭhatnak caah a si. Sihmanhsehlaw thimnak lei in ti ahcun annih cu an pupa hna ruangah khan Pathian hawikom an si,

DEUTERONOMI 1:8

Zohhmanh, ram cu nan hmaiah ka chiah cang; nan pupa Abraham, Isak, le Jakob sinah Bawipa nih anmah le an hnu i an tefa hna sinah pek awkin chiat a sermi ram ah cun va lut u law, va co u,’ tiah a ti.

DEUTERONOMI 10:15

sihmanhsehlaw Bawipa nih dawtnak in na pupa hna cungah a lung a chiah i annih hnu i an tefa, nannih cu, midang vialte hlan in an thim hna, nihin ah nan si bang hin.

DEUTERONOMI 23:6

Nan nunchung vialte anmah he i remnak le an rumnak kha zeitikhmanh ah nan kawlpiak hna lai lo.

DEUTERONOMI 33:3

A si, a mi kha a dawt hna; Amah sinah thiantermi vialte cu a kut chungah an um; Cucaah na keneh kha an zulh, Nangmah sinin lam hmuhsaknak kha an hmuh,

DEUTERONOMI 4:20

sihmanhsehlaw nannih cu Bawipa nih thir titnak meiphu, Izipt ram cun, amah miphun hrimhrim si awkah, atu i nan si bang hin, an chuahpi hna.

DEUTERONOMI 4:34

Asiloah, pathian zei tal nih miphun dang pakhat chungin miphun pakhat cu amah ca i va kal i vaa lak awkah, hneksaknak le hmelchunhnak le khuaruahharnak le ral dohnak le a ṭhawngmi kut le samhmi ban le thil ṭihnung in, Bawipa nan Pathian nih Izipt ram ah nan mit hmuh ah an tuahpiakmi hna vialte bang khan tuah a zal bal maw?

DEUTERONOMI 4:37

Cun amah nih nan pupa kha a dawt hna i anmah hnu i an tefa hna cu a thim hna i nannih cu amah hmai hrimhrim in le a liannganmi a ṭhawnnak in Izipt ram in an chuahpi hna i,

DEUTERONOMI 5:6

“ ‘Keimah cu Bawipa na Pathian, Izipt ram, sal sinak inn chungin an chuahpitu ka si.

1JOHAN 4:19

Kannih nih Pathian kan dawt cu Pathian nih a kan dawt hmasa caah a si.

1 SAMUEL 12:22

Nannih cu amah ca miphun i ser kha Bawipa lawmhmi a si caah, a min ngan ruang ah hin, Bawipa nih a mi cu an hlonh hna lai lo.