BIAPHUAN 14:7 - Lai (Hakha) Common Language Bible 2006

⁷ Aw thang piin, “Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u,” a ti.

Laibaibal Thiang (BSI)

⁷ thang ngai in a au i, “Pathian cu ṭih u law Amah cu sunparnâk pe u, zeitintiah bia a ceih cân cu a phân cang; van le rilipi le cerhti hna a Sertu cu bia tuah u,” tiah a ti.

BIAPHUAN 14:7 ပူးပေါင်းရင်းမြစ်များ

GENESIS 22:12

Vancungmi nih cun, “Ngakchiapa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeihmi hmanh pek sian loin na ka um lo caah Pathian nawl ngaih cu na duh ngaingai ti kha ka hngalh,” tiah a ti.

NEHEMIAH 9:6

Nangmah lawnglawng hi Bawipa cu na si; nangmah nih van cu na ser, a sang bik van cu a chung i a ummi thil vialte he na ser hna i vawlei le a cung i a ummi thil vialte zong hi na ser hna i rili le a chung i a ummi thil vialte zong hi na sermi an si dih. An dihlak hin nangmah nih na hmunhter hna i van i a ummi thil vialte nih khin nangmah cu an in biak.

SALM 115:15

Van le vawlei a sertu Bawipa nih cun, thluachuahnak in pe ko hna seh!

SALM 124:8

Bawmhnak kan hmuhnak cu Bawipa sinin a si, amah cu van le vawlei a sertu a si.

SALM 33:6

Bawipa nih a nawlbia in van khi a ser hna, ni le thlapa le arfi khi a bia in a ser hna.

SALM 36:1

Sualnak nih miṭhalo cu a lungchung thukpi ah bia a chimh i Pathian kha a hlawt i a ṭih lo.

SALM 89:7

Nangmah cu pathian hna nih an khuakhannak bu chungah khan an in upat i na kiang i a ummi vialte nih khan an in ṭih dih.

SALM 95:5

Amah nih a sermi rili kha a uk i amah nih a sermi vawlei zong kha a uk fawn.

EXODUS 20:11

Ni ruk chungah Bawipa nih van le vawlei le rili le an chung i a ummi thil vialte kha a ser hna i ni sarih ni ah cun aa din. Cucaah cun Bawipa nih dinh ni cu thluachuah a pek i amah ca rian ṭuannak caah a duh.

ISAIAH 40:3

Aw pakhat nih, “Bawipa caah ramcar chungah lam pakhat sial u! Kan Pathian caah thetse ram i lam cu sial u.

ISAIAH 40:6

Aw pakhat nih, “Thanh tuah,” tiah a ti. Kei nih, “Zeidah ka thanh lai?” tiah ka leh. “Minung vialte hi ram bantuk men an si, ramlak pangpar nakin an chan a sau hlei lo.

ISAIAH 40:9

Maw Jerusalem, tlang sang cungah kai law thawng ṭha kha thanh tuah! Maw Zion, fak piin au law thawngṭha kha thanh tuah. Au ko, ṭih hlah. Judah ram khua hna kha, nan Pathian a ra lio, tiah chim hna.

ISAIAH 42:12

Lamhlatpi ram i a ummi nih Bawipa cu thangṭhat hna seh law sunparnak pe hna seh.

ISAIAH 44:23

Nannih van hna, lunglawmhnak in au tuah u, vawlei cung i a thukmi hmun hna, au tuah u. Tlang te tupi chung thing vialte hna, lunglawmhnak in au tuah u. Bawipa nih a mi Israel mi cu a khamh cang hna i cuticun a lianhngannak kha a langhter cang.

ISAIAH 58:1

Bawipa nih, “Nan au khawh chungin au tuah u. Ka mi Israel mi cu an sualnak kha chim hna u.

JEREMIAH 10:10

Sihmanhsehlaw Bawipa cu Pathian taktak a si, Pathian nung le zungzal Siangpahrang a si. A thin a hun ciammam ah vawlei aa hnin i Miphun hna nih a thinhunnak kha an ing kho lo.

EZEKIEL 7:2

“Mipa, hi bia hi Bawipa Pathian nih Israel mi hna sinah a chim duhmi bia cu a si, a ti: A dih cang! ram cung kil li cungah donghnak cu a tlung lio.

EZEKIEL 7:6

Ram chung i a ummi hna, nan cungah khuacimuihnak ni a tlung cang; cu caan cu a phan dengmang cang, cu ni cu a nai cang, hnahnawhnak le khuari thawng he a ra lai.

DANIEL 8:19

Cun a ka thawh i, “Pathian thinhunnak nih zeidah a chuahter lai ti kha kan hmuhsak lai; langhnak na hmuhmi nih hin a sawhmi cu donghnak caan kha a si.

HOSEA 8:1

Muko kha tum tuah, Bawipa hmunthiang cungah ral cu langta bantukin an rung zuang. Ka mi nih amah he ka sermi ka biakamnak cu an hrawh i Ka cawnpiaknak kha an doh.

MALAKHI 2:2

Nannih nih ka bia kha nan ngaih lo i ka min kha nan upat lo ahcun, nan cungah chiatnak ka tlunter lai, tiah ralkapbu Bawipa nih a ti. Nannih nih zei ah nan ka rel lo caah thluachuahnak nan hmuhmi cu chiatserhnak caah ka canter lai, chiatsernak ah ka canter taktak lai.

MATTHAI 25:13

Cucaah cun, a ni siseh, a caan siseh, nan hngalh ṭung lo caah ralring tein um ko u.

LUKA 17:18

Annih zong ra kir in Pathian kha an thangṭhat kho lo maw? Hi ramdang mipa lawng hi maw a ra kho?” tiah a ti.

LAMKALTU 14:15

“Zeicahdah mah hihi nan tuah? Kannih zong minung sawhsawhte kan si ve ko, nanmah bantuk minung kan si ve ko. Hika i kan ratnak cu nannih kha hi santlailo thil hna hi hlawt i van le vawlei le rili le a chung i a ummi thil vialte a sertu Pathian lei i mer awkah Thawngṭha ra chim kha a si.

JOSHUA 7:19

Khi tikah Joshua nih Akhan sinah cun, “Ka fapa, Bawipa Israel Pathian sinah sunparnak pe law, amah cu thangṭhat tuah; na tuahmi kha ka chim tuah; ka sinin thup hlah,” tiah a ti.

1 PETER 4:7

Zeizong vialte donghnak caan hi a nai ko cang. Cucaah cun thla nan cam khawh nakhnga, mah le mah aa uk khomi le ralring tein a ummi nan si lai.

BIAPHUAN 11:13

Cu caan te ah cun lihnin fak ngaingai pakhat a um; khuapi cu cheu hra cheukhat a rawk i minung thong sarih lihnin nih cun a thah hna. A tangmi pawl cu an thin a phang i vancung Pathian a lianhngannak kha an thangṭhat.

BIAPHUAN 11:18

Atu caan hi na thinhunnak a rat caan le Mithi hna biaceih caan a si caah, Pathian bia lomi cu an thin a hung ngaingai. Cun atu caan hi na sal na profet hna le na mi vialte hna le nangmah an ṭihtu vialte hna kha, A hme a ngan thlu loin laksawng pek caan a si fawn. Cun vawlei a hrawktu hna hrawh caan kha a si,” an ti.

BIAPHUAN 15:4

Bawipa, ahodah nangmah ṭih loin a um ngam lai? Na lianngannak chim duh loin ahodah a um lai? Nangmah lawng a thiangmi na si. Miphun vialte nih na hmaiah an ra lai i an in biak lai, Thil ding na tuahmi kha mi vialte nih hmuh a si caah,” an ti.

BIAPHUAN 16:9

Ni lin nih cun mi kha a kangh hna i hi hremnak cung i nawl a ngeitu Pathian min kha an thang chiat. Asinain an sualnak kha an mertak duh lo i Pathian lianhngannak kha an thangṭhat duh lo.

BIAPHUAN 18:10

Temhnak a inmi kha an ṭih caah a langhlat piin an dir i cuka cun an i thawh i, “Ṭih a hei nung hringhran dah! Mi tuksa a hei pur hringhran dah! Babilon khualipi, khua lianngan le khua ṭhawng! Suimilam pakhat chungah na rawk dih ko!” an ti lai.

BIAPHUAN 18:17

Sihmanhsehlaw suimilam pakhat chungah a chawva vialte cu an lo dih ai!” an ti lai. Rili lawngcawng bawi vialte hna le khual tlawngmi vialte hna le tilawng rianṭuantu vialte hna le rili cung rianṭuannak in a paw a cawmmi vialte hna cu lamhlatpi in an dir i

BIAPHUAN 18:19

An lu ah lei dip an i phulh, an ṭap an ai i, “Khua lianngan kha zeitluk in dah ṭih a nun cang. Zeitluk in dah tuksapur a si cang. Rili cungah lawng in chaw a letmi vialte hna nih amah rumnak thawngin mirum an rak si dih. Asinain suimilam pakhat chungah a chaw vialte cu an lo dih ko ee,” an ti.

BIAPHUAN 19:5

Cun bawiṭhutdan khan aw pakhat a rung thang i, “Kan Pathian sal vialte hna le a mi vialte hna le amah a ṭihmi vialte hna, a hme a ngan in, kan Pathian cu thangṭhat tuah u,” a ti.

BIAPHUAN 4:11

“Kan Bawipa le kan Pathian, Nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i Nangmah duhnak bangin annih cu ser an si i nunnak an ngei,” tiah an ti.

BIAPHUAN 4:9

A nungmi saram pali nih cun bawiṭhutdan cung i a ṭhumi, zungzal in zungzal tiang a nungmi cu, sunparnak le upatnak le lawmhnak hla in an thangṭhat.

BIAPHUAN 8:10

Vancungmi pathumnak nih khan a muko cu a vun tum, meifar alh bantuk a simi arfi nganpi pakhat cu van in, tiva cheu thum cheu khat le cerh cheu thum cheu khat cungah, a rung tla.

1 SAMUEL 6:5

Cucaah nan bonak mui le nan ram a hrawktu nan zu hna mui cu nan ser lai i Israel Pathian cu sunparnak nan pek lai; nanmah le nan khuazing hna le nan ram cungin a kut cu a hei zanter hmanh maw.