2 SIANGPAHRANG 9:17 - Lai (Hakha) Common Language Bible 2006

¹⁷ Jezreel khua innsang cung i a dirmi ralveng nih Jehu pawl an rat cu a hmuh thli hna i, “Mibu bu khat ka hmuh,” tiah a ti. Cun Joram nih, “Rangcung ralkap pakhat i lak law, anmah ton awkah hei thlah tuah, cun anih nih, ‘Daihnak a si maw?’ tiah va ti seh,” tiah a ti.

2 SIANGPAHRANG 9:17 ပူးပေါင်းရင်းမြစ်များ

2 SAMUEL 13:34

Sihmanhsehlaw Absalom cu a zam. Cun ralvengtu tlangvalpa nih khan khua a hei cuan i zohhmanh, tlang pang i a kalmi Horonaim lam khan mi tampi an rat kha a hmuh.

2 SAMUEL 18:24

Cun David cu chunglei kutka le lenglei kutka hna karlak ah khan a ṭhu i vampang pawng i a ummi kutka inncung ah khan ralvengtu kha a hung kai i khua a hei cuanh i a hei zoh tikah, mipa pakhat amah lawng in a ra tlik kha a hmuh.

1 SIANGPAHRANG 2:15

Cun amah nih cun, “Pennak hi keimah ta a rak si i Israel mi vialte nih amah nih a kan pen lai tiin an rak ka ruah dih ko, ti kha na hngalh; sihmanhsehlaw pennak cu a lu taw aa let i ka unaupa caah a cang, zeitintiah Bawipa nih a pekmi a si.

2 SIANGPAHRANG 7:14

Cucaah rangleng cittu mi pahnih an lak hna i siangpahrang nih, “Va kal u law va zoh u,” tiin, Siria ralkapbu kha va dawi awkah a thlah hna.

2 SIANGPAHRANG 9:11

Jehu cu a bawipa sinum hna sin i a hung chuah tikah khan, annih nih amah cu, “A ṭha dih maw? Zeicahdah hi mihrutpa hi na sinah khan a rat?” tiah an ti. Cun anih nih annih cu, “Nannih nih amah cu nan hngalh i a bia zong nan hngalh ko kha ta,” tiah a ti hna.

2 SIANGPAHRANG 9:16

Cun Jehu cu a rangleng kha aa cit i Jezreel ah a kal, zeicahtiah khika ah Joram cu a kuah ko. Cun Judah siangpahrang Ahaziah cu amah zoh awkah khan a rung.

2 SIANGPAHRANG 9:18

Cucaah rangcung ralkap pakhat cu amah ton awkah khan a va kal i, “Siangpahrang nih, ‘Daihnak a si maw?’ a ti,” tiah a ti. Cun Jehu nih, “Daihnak kong ah naa thlaknak zeidah a um? I mer law ka hnu khan ka zul ko,” tiah a ti. Cun ralvengtu nih khan, “Lamkal nih khan a hei phak cang hna, sihmanhsehlaw a ra kir ṭhan lo,” tiah a ti.

2 SIANGPAHRANG 9:19

Cun rangcung ralkap pahnihnak a hei thlah ṭhan i an sin a phak tikah, “Siangpahrang nih, ‘Daihnak a si maw?’ a ti,” tiah a ti. Cun Jehu nih, “Daihnak kong ah naa thlaknak zeidah a um? I mer law ka hnu khan ka zul ko,” tiah a leh.

ISAIAH 56:10

A thawh hna i, “Ka mi ralrinnak a petu ding a simi an hruaitu hna kha mitcaw lawngte an si. An hngalhmi zeihmanh a um lo. Inn hngaktu ui, a bao lomi bantuk an si — an it sawhsawh i mang lawng an man men ko. Ih cu an duh hringhran.

ISAIAH 62:6

Maw Jerusalem, na ralhau cungah ralvengtu ka chiah hna, chun nitlak zan khuadei an dai lai lo. Bawipa nih biakamnak ka tuakmi kha an ka theihter ṭhan lengmang lai i ka biakam cu philh hrimhrim loin an ka tuah lai.

1 SAMUEL 16:4

Bawipa nih nawl a pekmi cu Samuel nih a tuah i Bethlehem khua ah khan a ra. Cu khua upa hna nih amah cu ton awkah khan ther lengmang in an ra i, “Daihnak lei ca i a rami na si maw?” tiah an ti.

1 SAMUEL 17:22

Cun David nih thil kha thilri zohkhenhtu sinah a chiah hna i ralkap hna sinah cun a va le i a ule cu a va biakchawnh hna.