Tanieri 7:4 - Kakaɨyari Niukieya

⁴ »Mexɨakame maye hepaɨ katiniyuxexeiyakaitɨni, matsi 'anateya kwixɨ 'anateya hepaɨ kani'anenekaitɨni. Mexi 'akuxi ne ne'ixeiyakai, 'anateya namuriyariexɨani, kwiepa kananukuhanieni, waɨriyarika mekanipitɨani yu'ɨkatekɨ 'amɨtakenikɨ, tewi mɨhɨkɨtɨni hepaɨ. Meta tewi 'iyarieya kaniupitɨarieni.

Tanieri 7:4 ပူးပေါင်းရင်းမြစ်များ

Keremiyaxi 4:7

Maye yuterɨta kanewayeyaniri, xewitɨ nuiwarite 'uname kanayeyaniri, yukie kanayeyaniri 'akwie 'akumaweme mɨhayewakɨ, 'akiekarite 'u'unitɨ kaniyuhayewamɨkɨ meta yemekɨ kiɨripa kanayeimɨkɨ.

'Etsekieri 17:3

Mɨpaɨ ketiniwaraye'eritɨa kename ne Yawé nehaine: »Riwanu kaninuani Kwixɨ 'anetɨ, 'a'anateyeyeutɨ, waɨkawa heuhuxatɨ, witsiheu'anetɨ. Kariuxa yekɨrita kaniuyeyerɨni,

Mateu 24:28

Kanimatsiɨkɨni kaxari tsepa hakewa meeka, mana mekaniyukuxeɨrikuni wirɨkɨxi.

Tanieri 4:36

Kepauka tewi hepaɨ netinekɨhɨawetɨ nematɨa, tawarita nekaniupitɨarieni mariwemekɨ kenemɨti'aitakai. Netsi'ɨxatsitɨwamete meta memanuyetei nemɨra'aitatsie miemete mekanenekuwauni, tawarita 'uweni nekaniuhanitɨarieni. Matsi waɨkawa netɨrɨkaɨyetɨ nekanayani keyuri meripaitɨ.

'Etsekieri 28:9

Hikɨ, metsimemiwamete wahɨxie, ¿petiyɨwe mɨpaɨ pemɨtayɨni: Ne nepɨkakaɨyari? Matsi metsimemiwamete wahɨxie, kakaɨyari pepɨkahɨkɨtɨni matsi tewi mɨmɨwe pekanihɨkɨtɨkamɨkɨ.

'Etsekieri 28:2

«Tewi pemunu'aya, mɨpaɨ ketinayehɨtɨa ti'aitame Tiru kiekame, Yawé naimekɨmɨyɨwe mɨpaɨ kanaineni: »“'Ataɨta pe'uyuta'ɨreka mɨpaɨ peputayɨ: ‘Ne kakaɨyari nepɨhɨkɨ. Haramara 'amatiyewatsie nepɨyeyeika, kakaɨyarixi wa'uwenitsie ne'akaitɨ’. Peru neuxei 'ekɨ pepɨkakakaɨyari, tsepa mɨpaɨ pemɨti'amate. 'Ekɨ tewi pemɨmɨwe xeikɨa pekanihɨkɨtɨni.

Hiwerika 4:19

Memɨtatsi'aye'unie matsi kwinimieme mepayɨwawekai keyuri kwixɨtsi muyuawitsie miemete, hɨritsie mepɨtatsi'uweiyatɨkɨkakai, makumawetsieta mekataniuhupieni.

Keremiyaxi 48:40

Yawé mɨpaɨ kanaineni: «Neuxei. Muhawi maye'unie kwixɨ hepaɨ katiniwieneni, Muhawi heima kaniwieneni.

Keremiyaxi 25:38

Maye yuterɨ kemɨtiuku'e'eiriwa hepaɨ Yawé yukwie mɨpaɨ katiniuku'eirieni, 'ixiparakɨ mɨtiyumemiwakɨ, Yawé haxɨaya mutatawekɨ.

Keremiyaxi 4:13

Xekeneuxeiya hai hepaɨ 'a'ahume. Kaxetamama wiyeri mɨtɨrɨkaɨye hepaɨ pɨtiyuxexeiya. Kawayutsiximama kwinimieme matsi mepayɨwawe kwixɨtsi kememɨkahayɨwawe. Xɨa'ui tame. Tame tepeuyexɨri.

Nɨawari 9:20

Yawé, marika keniwarupitɨa, kename tixaɨtɨ mekatehɨkɨ teɨteri mɨpaɨ meketehetimani.

Kuwi 25:6

matsi tewi tita tihɨkɨ, kwitsi kanihɨkɨtɨni, matsi tewi tixaɨtɨ pɨkatihɨkɨ, hareku mɨkatiyunaki'erie kanihɨkɨtɨni».

2 Tsamuheri 1:23

»Tsahuri Kunatani matɨa. 'Aixɨa mepɨte'u'iyarikai. Mɨkɨ 'aixɨa mepɨtenaki'eriwakai, 'axeikɨa yunaitɨ mekaniukwini. Mɨkɨ kwinimieme mekatenanautsawawekaitɨni keyuri kwixɨ, meta waɨkawa mekanitɨrɨkawikaitɨni keyuri mayetsi.

Hutarieka 'inɨari 28:49

»Yawé xeime 'ateewa paitɨ kiekame pukuha'aritɨani, waniukitsie xekawa'eniekame, kwie manu'axe paitɨ paneni, mɨkɨ kwinimieme 'ayɨwetɨ kwixɨ hepaɨ.

Matsiɨkɨtɨ kemɨratɨa 13:2

Mɨkɨ yeutanaka nemuxei tɨwe hepaɨ katiniyuxexeiyakaitɨni, hutse hepaɨ re'ɨkatɨ, meta maye hepaɨ retenitɨ. Hikɨ kuu 'amɨtimariwe yɨtɨrɨkariya kanipitɨani, heitserie kanipitɨani mɨti'aitanikɨ 'uwenitsie 'akaitɨ hakewa kuu 'amɨtimariwe mɨre'aitakai, meta heitserie waɨkawamekɨ kanipitɨani.

Tanieri 7:5

»Hutarieka mieme 'ɨrawe nemuxei hutse hepaɨ katiniyuxexeiyakaitɨni. Tapa yu'etsata kwinie kanetitewikaitɨni meta haikame 'aki 'umeteyari yuteta kanatɨkɨkaitɨni. Mɨkɨ 'ɨrawe mɨpaɨ katiniutahɨawarieni: “Kenanukukexi, wai keneutikwa'i waɨkawa”.

Keremiyaxi 49:19

»Kurutani mɨ'ɨtsiyata maye mayeneika makutsiɨraɨye 'ɨxapa yapauka mɨ'axe hepaɨ, yapauka neniwatimariutamɨkɨ 'erumitsixi, wahetsiemieme xeime nekananayexeiyamɨkɨ. Tawari Kakaɨyari pumawe nehepaɨ 'anetɨ. Xewitɨ mɨnetsita'iwa pɨkayɨwe. Nixewitɨ muxatsi wahɨweme netsi 'aye'unietɨ pɨka'ayeiwe».

Tanieri 2:38

Meta matsi, 'Ekɨ ti'aitame yunaime teɨteri kwiepa memu'uwa kameniyetuirieni, yeutari meta muyuawitsie memɨte'uwɨtɨkɨka. Tsepa hakewa meme'uwa, Kakaɨyari kameniupitɨani yunaime mɨkɨ pemɨtiwa'aitɨwametɨnikɨ. 'Ekɨ ti'aitame, mɨkɨ mu'u hurukɨ mɨwewiya 'ekɨ pekanihɨkɨtɨni.

Tanieri 7:12

Hipatɨta 'ɨrawetsixi yutɨrɨkariya mekaniunawaiyarieni, peru yapaɨmexɨa memu'uwanikɨ mekaniupitɨarieni.