YOSUA 22:6 - ALLAH NIHYET MEM TUNGWATU NYA

^6-9 Leu api Yosua ngat nadi bahara tuhan Allah mem gima Noni njei mun di kei bak yoni. Leu api noni kes yok bingkwei hanyen ug ei ide hanjop di inyeng tak kepti hanyen. Noni bisok kep yok “Nogindini jinyeng bibor ba, jingkwei hanyen tut mindhe-ndhe nihyen kep nya kin perak kin mas kin ngkimom-tembaga kin ngkimom nitu kin sinsun mang bibor. Ma jikwas mun di jipos dima bihi tut yo di imbier kim je nindigsi nya.” Tirigi Yosua kes nihyet hon leu api keret Ruben kin Gad kin Manasye di ibong Minyei Yordan nite dima ug ikes mben Israel nindigsi nya ei ide hanjop nsi. Ikiju bimbut leu Silo ei minu Kanaan leu lene imbut ug ei yonti ide hanjop nsi ei Gilead. tuhan cuk yoni ibong ser hanjop nsi dima bit leu nicukti di tug hon Musa. (Keret Manasye nite hi itug ndei dihyei hanjop nsi leu Musa ei Minyei Yordan nite hi tu. Noro keret Manasye nite hi itug ndei dihyei hanjop nsi leu Yosua ei Minyei Yordan nite bei mpia nicutti bit keret mben Israel nindigsi nya.)

YOSUA 22:6 ပူးပေါင်းရင်းမြစ်များ

NITRITI 14:19

Lene noni njei mun di kei bak Abram bipai bak “Nna ba Allah Di Ninyeng Jei Bibor di pai tes mpia-bbed him kin dihyeisi dini njei mun di kei bak Abram!

NITRITI 47:10

Lene Yakub ngat nadi mem Firaun mbigom kin bu ba, om no leu noho bei.

NITRITI 47:7

Lene Yusuf buwak nicig Yakub kwei bikes no biya ei Firaun noho bei. Lene Yakub ngat nadi mem noni.

SAMUEL GI NICAN 6:18

Niabiati noni bon midut nya bingwig leu su lene ngat nadi tindei mun di kei mem nide limwa nya tug hon tuhan Di Sindem Bibor ninyenga.

SAMUEL GI NICAN 6:19

Leu api noni kwas njita tut yahagom. Noni yai mikwau di noni bam ei su ninggriet gom kin roti nindak gom kin roti nyop di biei ngat kismis joti nindak gom ba, ba gima bikwop pinai nya kin sop nya yahagom. Lene yahagom ingkwei hanyen ug ei ide ig.

SAMUEL GI NICAN 6:20

Tirigi Daud cem ngkwei hanyen ug ei nide ig nibou ndig bipigo nide bat nya lene Mikhal hei um noni lene ba Daud bikek bipai “Njap di ammani nibou ndig Israel bon ninyeng jei bibor! Noni juk sinsun haigtu bi bou awak sop nya igyai him bibindei ba, sop di igyai midyai ei nide ig dima yok ikan bigya noni ne no di nintin kiek ri!”

NIBOU NDIG NYA GI NIGOM 8:66

Hon kep njap gi nimuhwindaningai lene Salomo kes yahagom ba, ingkwei hanyen. Yahagom inggei sut noni lene iba ingon di llei sut mun di kei di tuhan yai bak Nide awak di Daud kin nide limwa di mben Israel yahagom bingkwei hanyen ug ei itimieisi.

NIBOHON MBEN ISRAEL GI NICAN 30:18

Ter bu leu yo dima lene keret Efraim kin Manasye kin Isakhar kin Zebulon nya imang bibor di ibindei pwoi yonti nipou leu api ikwei ei minu ndig Yerusalem bi cem yo rinaha. Gima rino ibon midut kep Njap Ndig Paskah dima noro ibit nisinati di dem mem Njap Ndig Paskah bi. Gima rino Nibou Ndig Hizkia ngat nadi tindei yok bipai,

NEHEI LEUSI 39:43

Lene Musa yok niyai kep mun dima yok hagom bingat lo, ibon hagom bit leu nok tuhan nicuk noti. Gima rino noni ngat nadi leu binhyepo tuhan njei mun di kei bak yoni.

LUKAS 2:34

Simeon ngat nadi tindei mun di kei mem yok leu api pai bak ningwoi-ngwoi nipmem Maria bipai “Allah dimig munggwom dini leu binhyepo Noni mibindei sar mben Israel imang bibor lene mibindei ba, imang bibor igyai niteu leu sisarti bigyai niyaijo nijep. Noni minok bindo di kwei leu Allah leu api tungwatu nya imang bibor misrep tut Noni

LUKAS 24:50

Gima ngwig lene Yesus buwak yok bibie tut yok leu minu ndig ug ei minu mien Betania. Noni yai mun di kei bak yoni ei sirima.

YOSUA 14:13

Lene Yosua ngat nadi tindei mun di kei leu tuhan Allah mem Kaleb di Yefune nipmot leu api kwas minu ndig Hebron tut noni kin yo di intun noni him.

YOSUA 24:28

Lene noni kes tungwatu nya bimbut leu api yahagom ingkwei hanyen ug ei ide hanjop nsi nya.

SAMUEL GI NIGOM 10:25

Lene Samuel pai mingat tut nibou ndig ninyeng tak kepti kin nide midyai nya cem bipas kep hagom ei srat gomti bikon srat dima ei Allah de ninsi di kwes. Lene noni kes tungwatu nya yahagom ba, ingkwei hanyen ug ei ide ig nya.

SAMUEL GI NIGOM 13:2

lene noni mbus mben Israel ibou sribu ningai keyam ei bikwas yok ei nimpung can. Ibou sribu can igya kui noni ei Mikhmas kin nungug him ei minu ndig Betel lene ibou sribu gom igya kui nipmot Yonatan. Leu api Saul cuk Yonatan kin nide limwa nya ug ei Gibea ei hanjop Benyamin. Gima ngwig lene noni kes tungwatu nindigsi nya ba, ingkwei hanyen ug ei ide minu nya.

SAMUEL GI NIGOM 2:20

Bikwop mpe dima lene Eli ngat nadi tindei mun di kei mem Elkana kin Hana leu lene pai bak Elkana “Handei kon ba, tuhan mibindei ba, atnem miyai amunggwom bat nya hi kin bu bina biya luei Samuel di jidimig ei mem Noni pima nohoti.” Gima ngwig lene Elkana nya ingkwei hanyen ug ei itimieisi,