AYUB 1:1 - ALLAH NIHYET MEM TUNGWATU NYA

¹ Ayub bong ei Us. Noni kuk no bak Allah biningon gom tut Noni. Ayub ningon sren bimbres no leu mun di kinei hagom.

AYUB 1:1 ပူးပေါင်းရင်းမြစ်များ

NITRITI 10:23

Aram de nintun him yamti di bram yam nya rino timiei minu Us kin Hul kin Geter kin Mas nya ri.

NITRITI 17:1

Tirigi Abram de njap ug ei ari bingwam ningot muhwindatai ba, muhwindatai lene tuhan tau kep noni bipai bak “Dani ne Allah Di Sindem Bibor ri. Ma abit dihyet ba, ayai mun bit leu dingon kanti kikau cem.

NITRITI 22:12

Lene tuhan nihyet tibim ei malaikati dima nuhui him bipai “Ma akes anda leu apmot lene angget noni au. Nogindini dikan tut bipia akuk na biDa ba, apwoi dingona. Lewo angon tak kep apmot gom ngat dima leu Da bi.”

NITRITI 36:28

Lene Disyan nok pung di mben Us kin mben Aran intun him.

NITRITI 42:18

Njap ningai ngwig leu lene Yusuf pai biyok “Dittin tut Allah bidibit nicuk dati. Midikes je leu ig bui nsi dini tug hon puig gom ngat he.

NITRITI 6:9

Ayat dini yok pui sut Nuh kin niyai munti nya. Nuh ningon sren ba, nongkom ningon kwes kin Allah mem nijam dima. Allah kin Nuh ingon ce yam bi.

NIBOU NDIG NYA GI NICAN 20:3

“tuhan e, ma ayok ngon kep bipia diba dingon gom kin dingon sren biyai midyai nok awak mem Na kikau. Dibrim dingkek ba, dita dibou ei gima dibit angon kanti kikau.” Pai nok leu api ba ningon di ngguk bibor bipim nggruet.

NIBOHON MBEN ISRAEL GI NIGOM 1:17

Sem yai nipmot bat nya di inyeng rino Elam kin Asyur kin Arpakhsad kin Lud kin Aram kin Us kin Hul kin Geter kin Mesekh. Yo dini ne pung di mem mben di iba yok bijem inyeng hanyen nya intun him ri.

AYUB 1:8

tuhan hig ser noni “Angig ayai kep Ditde awak di Ayub tu e? No dima ningon gom ba, ningon kwes dor njiriek tungwatu dihyeisi dini hagom. Noni kuk no biDa bimbres no leu mun di kinei hagom cem.”

AYUB 2:3

tuhan hig ser noni “Angig ayai kep Ditde awak di Ayub tu e? No dima ningon gom cem ningon kwes cem dor njiriek tungwatu dihyeisi dini hagom. Noni kuk no biDa bimbres no leu mun di kinei hagom cem. Mbro nok gino abrim angkek kep Da leu binhyepo disindui sut ba, abingon noni mikui-kausi pima lo, ningon gom tut Da kikau.”

AYUB 28:28

Allah pai bak tungwatu nya “Suar jiba nibou di cut bak Allah bikon ninyeng mem gima jibiyai ningon ki leu Noni. Ma joom jenti ei minu ting leu mun di kinei nya leu binhyepo jibiyai ningon dor niti leu Noni.”

AYUB 4:6

Akuk na bak Allah lene abon mun tunggwei sut Noni hi bi sren. Gi nok lene gi igbit rino aba angon com ba, ayok angon mem Noni.

AYUB 9:21

Dibon mun tunggwei hi bi noro nna ba dingon cut leu su. Dikou sut ditde niyaijoti. Mun di micut igkep da bon ninyeng mem da bu bi. No di bon mun tunggwei kin no di bon mun igbit yahacem ide mun di yuum ei igyaijo ningwig honti noyam. Allah mibindei sar yahacem.

NEHEI LEUSI 18:21

Noro ma ayai bit leu dingon kanti dini. Ma adimig pinai di ingon ki nya ibou poi leu api ata yok nok nibou mem ade limwa di imangti ibou sribu gom kin ibou sratus gom kin ibou ningot muhwi kin ibou ningot gom lene nok. Ma ata yo di ittin tut Allah bibit nihyet kin yo dino aba angon com yok kin yo di ingon ya mem gima tungwatu ingot kep yok bi cem.

NIPINGOK NINGONTI 14:16

Yo di ingon ki nya itindei ser mun di kinei bimbres yonti leu noro yo di ingon mbum nya ibou buwei ba, iba ingon ko-ko wai.

NIPINGOK NINGONTI 14:2

No di ningon gom ttin tut tuhan Allah binggei sut ninyeng noro no di ningon mang ningwes om Noni.

NIPINGOK NINGONTI 16:17

No di ningon kwes kei mbres nonti leu mun di kinei nya. Noni cuon niyaisi tug hon gino sok kep nonti tut niyai munti nya.

NIPINGOK NINGONTI 16:6

Allah mikos ser ade sisar gino angon gom tut Noni. Noni micuon igyaisi leu binhyepo mun di kinei bibor cut igkep yok bi.

NIPINGOK NINGONTI 20:7

Munggwom nya di ibon icig bat di igyai munti nya kei bibor kei di ingon gom ne ingon nggei-hi-nggei.

NIPINGOK NINGONTI 3:7

Ma aba angon bisrip huk bipia angon ki dor njiriek mun di igbit mem na au. Abit tuhan nihyet ba, ambres nanti leu mun di kinei hagom.

NIPINGOK NINGONTI 8:13

Nikon tuhan ninyengti noyam kin ningon mpo tut mun di kinei. Dingon mpo tut yo di ingon jei nya kin yo di illei-lau sut yonti kin yo di igyai kep mun di sibut kin yo di iris mun igkei yahagom.

YEREMIA 25:20

kin mben Mesir yahagom kin ngkiai nya yahagom di ibong timiei ei minu Mesir kin nibou ndig minu Us yahagom kin nibou ndig minu Filistin yahagom di ibong bidem minu ndig Askelon kin Gaza kin Ekron kin yo di igyaijo di ibong ei ig kum kroisi ei minu ndig Asdod,

NIBWOS-BWOS NYENTI 4:21

Je di mben Edom kin mben Us e, tirigi bon nituti mem je lene ma jingon llei bibor hak ug o! Mun di buhun micut igkep jeni cem lewo jibou ngwak sibui sut mun di pu je ba, mun dima biyai ningat nguti bijenti rin o!

YEHEZKIEL 14:14

Mbro nok gino Nuh kin Danel kin Ayub nya ibong ei mpia dima lo, ibou ningai dima ide nibon munti di kei teu yonti njem innei he ba, ingwes ngun. Da di tuhan Di Dinyeng Jei Bibor disimbot dat tu.

YEHEZKIEL 14:20

mbro nok gino Nuh kin Danel kin Ayub nya ibong ei sirima lo, deheng bitug hon Da di Allah di niyaijo kin Da di tuhan Di Dinyeng Jei Bibor dinyeng bipia bit bon yoni iteu tungwa hi bitut yonti imunggwom bat nya cem bingwes ngun kan bi. Noro yonti njem he rima ingwes ngun tug hon ide nibon munti di kei nya.”

LUKAS 1:6

Ba, yahacem iba ingon di sren biyai mun di bindei ba, Allah joi sut yok. Iba ingon di gom bibit Allah nihyet kin nicuk yokti nya hagom.

NINDAT KEP TUHAN NICUKTI NYA 18:13

Gima rino ma jiba jingon di gom boom jenti bijinok awak mem jide tuhan Allah.”

YAKOBUS 5:11

Ipai sut yok bipia ingon nggei-hi-nggei lewo ingon jo nyahan tut yo di ihwen bit yok. Jikan tut Ayub di ningon jo nyahan leu api Allah njei mun di kei bak noni drek dip ug e. Lewo Allah ngondut nye nindig bibor bisingat tut nye di tungwatu.

PETRUS GI NIGOM 3:11

Suar noni mbres nonti leu sisar biyai kep niyai munti di kei nya lene ba ningon titut yam bibrim ningkek bibindei ba, ningon kwes kin nisut bat yo di ingon jo kep nya.