دانیال 5:7 - کیتاب مقدّس به گیلکی (رشتی)

⁷ فریاد بزه کی تومامٚ افسونگرأن و اُسطُرلابچی‌یأن و طالع‌بینأنَ بأورید و اون، بابِلٚ حکیمأن بوگفته: «هر کی بتأنه اَ بینیویشته‌یَ بخوأنه و مِره تعبیر بوکونه، دستور دهم ارغوانی ردای اونَ دوکونید و طوقٚ طلا اونٚ گردن تأودید، بأزین اون سوّمی حاکمٚ مملکت به.»

دانیال 5:7 ပူးပေါင်းရင်းမြစ်များ

پیدایش 41:8

فردایی فرعونٚ خیال پریشان بو. خو آدمأنَ اوسه کوده کی تومامٚ مصرٚ جادوگرأن و حکیمأنَ بأورید. فرعون هرچی کی خواب بیده‌بو، اوشأنَ بوگفته. ولی هیکس نتأنستی اونٚ خوابَ تعبیر بوکونه.

استر 3:1

بأزین خشایارشاه خو ایتأ اَمیر، هامانَ کی هَمِداتای اَجاجی زأی بو، ایتأ مقامَ پیله‌تر جٚه مقامٚ گوذشته، فدَه و اَطویی هامان تومامٚ دیگر اَمیرأنٚ جأ بوجورتر بوبوسته.

خروج 7:11

ولی فرعون خو حکیمأن و جادوگرأنَ دوخوأده، او مصری‌یأنم خوشأنٚ جادو جنبلٚ اَمرأ هو کارَ بوکودی.

دانیال 1:20

نبوکدنصر هر سؤالی جٚه حکمت و فهم کی او چارتأ جوانٚ جأ وأورسه‌یی، اوشأنَ ده برابر بهتر جٚه تومامٚ جادوگرأن و افسونگرأنٚ سرتاسرٚ خو مملکت دأنستی

دانیال 1:4

اَ جوانأن، وأستی بی‌عیب و نقص، خوش بر رو، و یاد گیفتنٚ وأسی زبر و زرنگ، دانا و فهیم بیبید و بابِلی زوان و ادبیاتَ یاد بیگیرید تا بتأنید پادشا کاخٚ دورون خدمت بوکونید.

دانیال 2:2

هَنٚ وأسی پادشا فرمان بدَه تا جادوگرأن، افسونگرأن، فالگیرأن و اُسطُرلابچی‌یأنَ اونٚ ورجأ بأورید تا بتأنید او خوابی‌یَ کی بیده اونٚ رِه تعبیر بوکونید. اوشأنم بمویید اونٚ ورجأ بِیسَه‌یید.

دانیال 2:27

دانیال جواب بده: «هیچ حکیم، افسونگر، جادوگر یا طالع‌بین نتأنه رازی‌یَ کی پادشا خوأیه، اونٚ رِه تعبیر بوکونه

دانیال 2:48

بأزین پادشا دانیالَ پیله مقام و ایتأ عالمه پیش‌کشی فدَه و اونَ سرتاسرٚ بابِلٚ اوستانٚ حاکم و تومامٚ بابِلٚ حکیمأنٚ رئیس چأکوده.

دانیال 2:6

ولی اگه می خواب و اونٚ تعبیرَ مرَ بیگید، می جأ پیله پاداشأن، پیش‌کشی‌یأن و پیله افتخار فیگیریدی. پس مرَ بیگید چی خوابی بیدم و اونٚ تعبیر چیسه.»

دانیال 4:14

اون فریاد بزه و بوگفته: ‹درختَ وَوینید و اونٚ شاخه‌یأنَ قطعَ کونید، اونٚ ولگأنَ وأچینید و اونٚ میوه‌یأنَ پخش و پلا بوکونید. حیوانأنَ جٚه اونٚ سایه جیر و پرنده‌یأنَ جٚه اونٚ شاخه‌یأن فراری بدید.

دانیال 5:11

تی مملکتٚ دورون ایتأ مردای ایسَه کی خودایأنٚ موقدّسٚ روحَ دأره. تی پئرٚ سلطنتٚ موقع، بینش، هوش و حکمتی کی خودایأنٚ حکمتٚ مأنستن بو، اونٚ دورون وجود دأشتی. نبوکدنصرٚ پادشا، تی پئر، اونَ جادوگرأن، افسونگرأن، اُسطُرلابچی‌یأن و طالع‌بینأنٚ رئیس چأکوده‌بو،

دانیال 5:15

حکیمأن و افسونگرأنَ بأوردیدی می ورجأ کی اَ بینیویشته‌یَ مِره بخوأنید و معنی بوکونید ولی اوشأن نتأنستیدی اَ کارَ بوکونید.

دانیال 5:16

بیشنأوستم کی تو تأنی رازأنَ تعبیر بوکونی و پیله موشکلأنٚ رِه چاره بیأفی. هسأ اگه بتأنی اَ بینیویشته‌یَ بخوأنی و اونَ معنی بوکونی، بأزین تأنی ارغوانی ردایَ دوکونی، طلایی طوقَ تی گردن تأودی و سوّمی حاکمٚ مملکت بیبی.»

دانیال 5:29

بأزین بِلشَصَّر فرمان بدَه دانیالَ ارغوانی ردا دوکونید، طلایی طوقَ اونٚ گردن تأودید و اعلام بوکونید کی اون، سومی حاکمٚ مملکت بوبوسته.