دانیال 2:9 - کیتاب مقدّس به گیلکی (رشتی)

⁹ هسأ اگه می خوابَ مرَ نیگید فقط ایتأ حوکم شِمرِه اجرا به. شومأن نقشه بکشه‌ییدی کی مرَ دورُغ بیگید و بیخودٚ گبأن بزنید اَ اومیدٚ اَمرأ کی شاید اوضاع عوضَ به. پس می خوابَ مِره واگویا بوکونید تا من خأطر جم ببم کی تأنیدی اونَ مِره تعبیر بوکونید.»

دانیال 2:9 ပူးပေါင်းရင်းမြစ်များ

استر 4:11

«تومامٚ پادشا خدمتکارأن و اونٚ ولایتٚ مردومأن، همه‌تأن دأنیدی کی اگه مردای یا زنأکی پادشا ورجأ، صحنٚ اندرونی میأن بشه بدونٚ اَنکی پادشا اونَ دوخوأنه، تنها ایتأ حوکم اجرا به و اون کشته به، مگر اَنکی پادشا خو طلایی چوگانَ اونٚ طرف درازَ کونه تا اون زنده بمأنه. هسأ سی روزه پادشا مرَ دونخوأده کی اونٚ ورجأ بشم.»

دانیال 2:16

دانیال بوشو پادشا ورجأ خوأهش بوکوده کی فرصتی بدأره تا خودش او خوابَ تعبیر بوکونه.

دانیال 2:21

او کسی کی وختأن و فصلأنَ عوضَ کونه، پادشایأنَ برکنارَ کونه و پادشایأنٚ دیگرَ به سلطنت رسأنه، هونه کی حکیمأنَ حکمت و فهیمأنَ دانایی فده.

دانیال 2:8

پادشا جواب بده: «معلومه کی شومأن فرصتٚ دونبأل گردیدی، چونکی دأنیدی کی می حوکم عوضَ نیبه.

دانیال 3:15

هسأ اگه حاضریدی کی وختی کرنا و نی و تنبور و چنگ و سنتور و دُهُلٚ صدا و هر جور سازٚ دیگرٚ نوایَ بیشتأوستیدی، طلایی مجسمه جُلُو زیمینٚ سر بکفید و اونَ پرستش بوکونید، کی هیچی. ولی اگه اَ کارَ نوکونید، فوری آتشٚ تونٚ دورون تأودَه بیدی. بأزین دینیمی کویدأنه خودا تأنه شمرَ می دسٚ جأ نجات بده.»

دانیال 5:28

‹پِرِس› ینی شیمی پادشایی تقسیم به و مادأن و پارسأنَ ببخشه به.»

دانیال 5:31

و داریوش کی قومٚ مادٚ جأ بو و دور و برٚ شصت و دو سال دأشتی، به سلطنت فأرسه.

دانیال 7:25

اون، ضدٚ خودای موتعال گب زنه و خودا موقدّسأنَ آزار رسأنه و سعی کونه هم وختأنی کی تعیین بوبوسته و هم شریعتَ وأگردأنه. اوشأن ای‌زمان، چند زمأن و نیم زمأن اونٚ دسٚ دورون تسلیم بیدی.