Kubiikula 11:18 - Bbaibbuli y'oLugwere

¹⁸ Abantu abataikirirya basunguwaire ino; neye nʼobusungubwo bwizire. Ekiseera kituukire okusalira abafu omusango, nʼokuwa empeera abaweereryabo abanaabbi, nʼabatuukirirye bonabona abakuwa ekitiisya abatobato nʼabakulu. Era ekiseera kituukire okulikirya abo abajigirica ekyalo.”

Kubiikula 11:18 ပူးပေါင်းရင်းမြစ်များ

EZabbuli 103:11

Ngʼeigulu obweriri e yala eino nʼekyalo, nʼokutakakwe okutakoma gikikoma okubba okungi eeri abo abamutya.

EZabbuli 110:5

OMusengwa ali oku lubbaalwo olwʼengaloyo endiiro okukukuuma, oweyalisunguwala, yalisasaigula abakabaka.

EZabbuli 147:11

Wazira oMusengwa asangaalira baabo abamutya, abo abateeka eisuubi lyabwe mu kutakakwe okutakoma.

EZabbuli 2:5

Awo ngʼasunguwaire nʼabakaawuukira, era omu bulwabwe nʼabakanga, era nʼakoba ati,

EZabbuli 85:9

Dala mutegeke okununula abamutya, kaisi ekitiisyakye kibbenge omu kyalo kyaiswe.

Matayo 5:12

Kale ebyo owebibbangawo mujaagaanenge era musangaalenge ino, olwʼokubba oKibbumba yalibawa empeera eyʼamaani omwigulu. Kyalibba kityo nakimo ngʼoKibbumba oweyawaire abanaabbi empeera abo ababbairewo nga inywe mukaali okubbaawo, ibo abazeiza baanywe abebayiigaanirye.”

Luuka 1:50

Era akwatira ekisa abo abamutya, mu buli mulembe.

AbʼEbbulaniya 9:27

Era nga buli muntu oKibbumba oweyamutegekeire okufa lumo, era oluzwanyuma lwʼokufa, ni bamusalira omusango,

Kubiikula 10:7

Neye omu kiseera ekyo, omalaika owomusanvu ekiyalifuwiramu ekondeereye, oKibbumba yalituukirirya ekyamakye, ngʼoweyakobeire abaweereryabe abanaabbi.”

Kubiikula 11:2

Neye oluuga oluli e nza owʼeYeekaalu eya Kibbumba oluleke, tiwalupima, olwʼokubba baluwaire bantu aBatali Bayudaaya. Abo balifutyanka oYerusaalemi ekibuga ekitukulye, okumala emyeri 42.’

Kubiikula 13:10

Oyo oKibbumba oguyategekeire ati balimutwala mu bugalama, yalyaba omu bugalama. Nabuli oKibbumba oguyategekeire ati balimwita nʼempiima, yalifa mpiima. Kale abatuukirirye basaaniire okubba abagumu era abeesigwa eeri oMusengwa omu mbeera gyonagyona.

Kubiikula 13:16

Awo abantu bonabona, abatobato nʼabakulu, nʼabasuni nʼabadoobi, nʼabʼeidembe nʼabagalama, ogusolo ni gubaazya okubateekaku eraama yaagwo oku ngalo endiiro ooba oku mpumi.

Kubiikula 14:10

oKibbumba yalimubonereza nʼobukambwe. Yaligada ngʼanywa ekikopo ekibasukiremu ondiko owʼobusungu bwa Kibbumba nʼobukambwe bwonabwona. Era balimugadya nʼomusyo ogwoca eino omumaiso agʼabamalaika abatukulye, nʼaga Ntaama oMutomuto wa Kibbumba.

Kubiikula 15:1

Tete ni mbona ekyewunyo ekindi omwigulu, ekinene era ekyewuninkirirya. Wabbairewo abamalaika musanvu nga baleeta ebirulumo musanvu ebisembayo, olwʼokubba niibyo ebimalayo obusungu bwa Kibbumba.

Kubiikula 15:7

Ekimo oku bibbumbe ebyomi ebina, ni kiwa abamalaika omusanvu ebibya omusanvu ebyʼezaabbu, ebiizwire obusungu bwa Kibbumba onanyere obwomi emirembe nʼemirembe.

Kubiikula 18:6

Era akoba abamalaika ati: “Musasule oBbabbulooni ebintu ebibbibibbi ebiyakolere abandi. Oku bikole ebyʼekibuga ekyo, inywe musingisyewo emirundi mibiri. Obulumi obuyatuucirye oku bainaye mubumutuuceku yena nga mukubbisyamu emirundi mibiri.

Kubiikula 19:15

Omu munwagwe ni muzwamu empiima ekyogi ekyʼokuwangula amawanga. Yaligafuga nʼobwezye bungi ooti muntu akubbisya omwigo ogwʼekyoma, nʼafutyanka ekikunyiro ekyʼomwenge ogwʼobusungu obungi obwa Kibbumba oWabwezye Bwonabwona.

Kubiikula 19:18

Mwize mulye emirambo gyʼabakabaka, nʼegyʼabakulu bʼamaje, nʼegyʼabaisukale, nʼegyʼembalaasi, nʼegyʼabagityaimeku, nʼegyʼabantu bonabona abagalama nʼabʼeidembe, abakulu nʼabatobato!”

Kubiikula 19:5

Era eigono ni lizwa awabbaire entebe eyʼobwakabaka ni likoba liti: “Muwuuje oKibbumba waiswe inywe nywenanywena abaweereryabe, na inywe nywenanywena abatobato nʼabakulu abamuwa ekitiisya.”

Kubiikula 20:12

Ni mbona abafu bonabona, abakulu nʼabatobato, neye atyanu nga tete boomi, beemereire omumaiso agʼentebe eyo eyʼobwakabaka. Ebitabo ebitali bimo ni babibiikula. Nʼekitabo ekindi ni bakibiikula, ekibeeta bati kitabo ekyʼobwomi, ekirimu amaliina agʼabantu oKibbumba abeyawaire obwomi obutawaawo. Abafu ni babasalira omusango kusinzirira ku bibakolere, ngʼowebabiwandiikire omu bitabo.

Kubiikula 20:15

Kale buli muntu ogubayajiirye ngʼeriinalye tibaliwandiikire omu kitabo ekyʼabantu abali nʼobwomi obutawaawo, bamudyakire mu nyanza eyʼomusyo.

Kubiikula 22:12

OYesu akoba buli muntu ati, “Obone, njiza mangu. Naliiza nʼempeera okuwa buli moiza, nga nsinzirira ku biibyo ebiyakolere.