EZabbuli 17:3 - Bbaibbuli y'oLugwere

³ Ogezeserye ebiseego byange era nʼokebera nʼomwoyo gwange obwire. Waneekenenyere era nandi nʼonjajiryamu nsobi. Ndi mumaliriri okutasobya omu ntumula.

EZabbuli 17:3 ပူးပေါင်းရင်းမြစ်များ

EZabbuli 11:5

OMusengwa yeekeenenya ebikole byʼabatuukirirye, neye acaawa ababbibabbi abataka ebikole byʼobukambwe.

EZabbuli 119:106

Ndayira era neeyama okukwatanga amateekago amatuukirirye.

EZabbuli 139:1

Oo Musengwa, waneekeenenyere era ommaite.

EZabbuli 139:23

Oo Kibbumba onkebere, kaisi otegeere ebiri omu mwoyo gwange. Onkeme, kaisi omanye ebiseego byange.

EZabbuli 16:7

Nawuujanga oMusengwa oyo annungamya, nʼobwire omwoyo gwange gunjegesya.

EZabbuli 26:2

Onkeme, Musengwa, ongezyesye, okebere omwoyo gwange nʼenseega yange,

EZabbuli 39:1

Nakobere nti, “Neegenderezanga omu mpisa gyange, era nakuumanga olulumi lwange nandi ni ntumula ebibbibibbi. Nasirikanga obutabbaaku nʼekintumula kasita abakola ebibbibibbi babbanga baliwo.”

EZabbuli 66:10

Oo Kibbumba, watugezeserye, watulongoire ngʼowebakola efeeza.

EZabbuli 7:4

ooba nkolere omukaagwa wange ekintu ekibbikibbi, waire okulumya omulabe wange nga mpaawo nsonga,

ENgero 13:3

Eyeekuuma omu ntumula akuuma bwomibwe, neye atumulyaga yeereetaku kujigirika.

Bikole 11:23

OBbalunaba oyo yabbaire musaiza omusa eino ayabira oku kulungamya okwʼoMwoyo oMutukulye era aizwire okwikirirya. Oweyatuukire omwAntiyokiya, yena ni yeeboneraku ngʼoKibbumba owaalagire abantu abo ekisa, nʼabba musangaali ino. Atyo nʼabasisiitira bonabona okubba bamaliriri omu myoyo gyabwe okukalangukira oku kwikiririrya omu Musengwa nʼomwoyo gumo. Abantu abandi bangi kwabo abamuwuliire ngʼatumula nʼebiyakolere bona ni baikirirya aMawuliro aMasa, ni baira eeri oMusengwa.

Bikole 16:9

Omu kiire, oPawulo nʼasuna okwolesebwa. Oomwo oPawulo nʼabona omusaiza azwera e Makedooniya ngʼayemereire amwegairira ati, “Neso owoizaku e Makedooniya nʼotubbeera.”

1 Abʼe Kolinso 4:4

olwʼokubba mpaawo kikole ekibbikibbi ekinseegaku nti nkolere. Neye ekyo tikitegeeza kiti bantoireku omusango, wazira ampimamu nʼasalawo ooba ndi mwesigwa, iye Musengwa oYesu.

2 Abʼe Kolinso 1:12

Atyanu iswe ekituleetera okwenyumiriza niikyo kinu kiti: Omu myoyo gyaiswe tukakasa tuti, eneebitya yaiswe omu bantu era okukirira nakimo enkolagana yaiswe na inywe eriwo mu butuukirirye nʼomu mazima ebizwa eeri oKibbumba. Ebyo titubikolere mu malabuki gʼabantu-buntu, neye lwʼekisa kya Kibbumba ekiri na iswe.

Yaakobbo 3:2

Swenaswena emirundi mingi tusobya omu ntumula, neye tuli nʼokwefuda okubona tuti tutumula kusani. Ekyo kityo olwʼokubba omuntu oyo atasobya omu byatumula abba atuukiriire, ngʼayegere okwefuga, era ayezya okufuga omubirigwe gwonagwona.

1 Peetero 1:7

Okubagezya okwo, kwizire kaisi olwo okwikirirya kwanywe kubbe kwʼamazima, era kaisi oomwo muzwemu inywe okusuna okubawuuja, nʼokubagulumalya nʼekitiisya, oYesu Kurisito ngʼabonekere. Ekikoba kiti, okwikirirya kwanywe nago ikwo kwʼebbeeyi eyʼamaani okukiraku eyo eyʼezaabbu iyo ejigirika, waire nga bagisaanucirye nʼomusyo kaisi bagikenena.

1 Samwiri 24:10

Olwatyanu weeboneireku nʼagago ngʼoMusengwa owaabbaire akuwaireyo omu bwezye bwange omu mpuku. Wabbairewo abankobere nkwite, neye nze ni nkuleka. Ni nkoba nti, tinakukoleku akabbikabbi musengwa wange, olwʼokubba niiwe oyo oMusengwa oguyasukireku amafuta.

1 Samwiri 24:12

OMusengwa asale omusango aakatiwo na nze. OMusengwa niiye abbe anyaaŋe olwʼebyo ebyonkola, neye nze tinalikukolaku kabbikabbi konakona.

1 Samwiri 26:11

Neye nze oMusengwa yangaine okusiirya engalo yange ni nkola akabbikabbi oku muntu oMusengwa oguyasukireku amafuta. Atyanu otoole eisimo nʼejaaga eyo erimu amaizi ebiri e namutwewe, era tweyabire.”

1 Samwiri 26:23

OMusengwa asasula nabuli muntu ngʼobutuukiriryebwe nʼobwesigwabwe obwebuli. Olwatyanu oMusengwa akuwaireyo omu bwezye bwange, neye nandi ni nkukolaku akabbikabbi iwe oMusengwa oguyasukireku amafuta.