EZabbuli 146:9 - Bbaibbuli y'oLugwere

⁹ OMusengwa akuuma abasenze, nʼabbeera abanamwandu nʼabafuubbi, neye afafaagania ababbibabbi.

EZabbuli 146:9 ပူးပေါင်းရင်းမြစ်များ

2 Samwiri 15:31

Atyanu oDawudi babbaire bamukobeire bati, “Akisofeeri moiza oku bantu abeeyimbirye okwAbbusalomu.” Kale oDawudi nʼasaba ati, “Oo Musengwa nkwegairiire, amalabuki Akisofeeri agaawa ogasuuce busirusiru.”

2 Samwiri 17:23

Akisofeeri oweyaboine ngʼamalabukige tibagasengereirye, nʼategeka ondogoyiwe, nʼakanga e ika omu kibuga kyʼe waabwe, nʼakola ekiraamo, ni yeemyeda. Omulambogwe ni baguteeka omu kiija kyabwe.

Eseza 5:14

Awo omukaliwe oZeresi nʼabakaagwabe bonabona ni bamukoba bati, “Bakukolere akalabba kʼefuuti ooti 75 obugulumali, eizo amakeezi osabe okabaka, oMoludekaayi bamwanike okwo afe, olwo oyezye okwaba okulya ekiinulo nʼokabaka ngʼoli musangaali.” OKamani nʼaseega ati, ago gabbaire malabuki masa. Kale nʼalagira ni bakola akalabba.

Eseza 7:10

Kale ni baaba baanika oKamani oku kalabba akeyabbaire ategekere kwanikaku Moludekaayi. Awo obusungu bwa kabaka ni bwikaikana.

Eseza 9:25

Neye Eseza oweyamanyikisirye okabaka olukwe olwo, okabaka nʼawuluca ekiragiro mubuwandiike ati olukwe oKamani oluyabbaire asalire okwita aBayudaaya, lucuukiire niiye oKamani. Era ekiragiro ekyo ni kikoba kiti, oKamani nʼabataanebe niibo abebali nʼokwanika oku kalabba.

EZabbuli 10:14

Neye iwe, Kibbumba obona ebigosi nʼenima, era weetegekere okubbeera. Abo abanambulaku obubbeeri beewaayo giri niiwe, bulijo niiwe obbeera abafuubbi.

EZabbuli 145:20

OMusengwa akuuma abo bonabona abamutaka, neye yalijikirica ababbibabbi bonabona.

EZabbuli 147:6

OMusengwa asetula abebanyooma, neye afafaagania ababbibabbi.

EZabbuli 18:26

Weeragisya ngʼobwoli mulongoole eeri abo abalongoole omu myoyo, neye weeragisya ngʼobwoli muzira eeri ababbibabbi.

EZabbuli 68:5

Niiye oiteeye wʼabafuubbi, era niiye omulwaniriri wʼabanamwandu, iye oKibbumba abba omu kifookye ekitukulye.

ENgero 15:25

OMusengwa avunirawo nakimo enyumba eyʼowʼamalala neye akuuma ensalosalo gyʼabanamwandu.

ENgero 4:19

Neye enzira yʼababbibabbi eri ooti ndikiirya ekwaite zigizigi, tibabona ekibaleetera okwesiitaala.

1 Abʼe Kolinso 3:19

Ekyo kityo olwʼokubba abantu bʼoku kyalo ekibatwala bati malabuki, Iye oKibbumba akibona ngʼekyʼobusirusiru. Era ngʼeKiwandiike owekikoba kiti: “OKibbumba akolesya amalabuki gʼabalabuki ngʼomutego okubapapalya.”

AMateeka 16:11

Era mwajagaaniranga omumaiso ga Musengwa iye oKibbumba waanywe, omu kifo ekiyalironda okumusinzirangamu. Mwajagaananga nga muli aamo nʼabaana baanywe, nʼabagalama baanywe, nʼaBaleevi abʼomu bibuga byanywe, nʼabagwira, nʼabafuubbi nʼabanamwandu ababba mwinywe.

Yaakobbo 1:27

Ediini entuuce era ebulaku kyokuginenya omumaiso ga Kibbumba oItewaiswe, niiyo eenu: Okulabiriranga abafuubbi nʼabanamwandu omu budoobi bwabwe, nʼokwekuumanga ebyʼekyalo okutatwonoona.