Yemesa 2:5 - Buki Kimaasabaina

⁵ Konovēgu, guna kaloyao! Tookaidiyadi da poyapoya matadi goi sitokai go, kina Yaubada ikinavedi idi numisa pasina siguyau be nakae ikalibubudi nakae boi ikaatotule Tauyana ana tomatakoiyao yaidi ae?

Yemesa 2:5 ပူးပေါင်းရင်းမြစ်များ

Tateta 20:6

Go avatauwa neta simatakooiyegu be nakae guna lovina sikabikaaonedi, e amo tauyadi be nakae mlidi idi bodao badabadaidi simamaima yaidi goi akubunuwedi.

Madiu 25:34

E tuwo tauyadi Tokalibúbuna kakataina goi bei ilatuwokoidi kana, “Komi Tamagu bogina ikaipaakuyemi kōma ina kalibúbuna sinaena goi dogoi dedevidi boi ikatootuledi bei ivinimi. Dogoiyadi boi poyapoya ana kaba vatowo goi bogina ikatubayasidi manumi.

Madiu 5:3

‘Avatauwa komi balomaimi goi kootokai, e komi Yaubada ina bodayauwo bei ikalibubumi, tauna ami dedevina bogina koobabane.

Maki 7:14

E Yeisu ibóbwara ikavava, aiyuwoina boda iduduwemneidi sima ilatuwokoidi idigo kana, ‘Madabokimi konovēgu go, kopoikīki guna livala koyagoi!

Luke 12:21

Nakae bei isowóduwo komi yaimi neta komi imi esaesa kovagugunidi toinimi manumi go, Yaubada yaina geya imi esaesamo.’

Luke 12:32

Komi guna nakae. Geya kobadebadeta go, Tamada bogina ikinavemi bei ina kalibúbuna ivinimi. Tauna taabu koomatōita.

Luke 16:22

E niga tokaiyana ikámasa go, sikavale sinave Eberamo kikina. E toesaesayana nakae ikámasa namlieta sivaliwoge.

Luke 16:25

Go kina Eberamo idigo kana, “Tubugu, kunuwāisi boi nava maa yawoim am dedevina madabokina bogina kubabane go, kina Lasaloyana mou goyogoyoidi ibabanedi. E tuta ame goi kina Lasalo ana kipáiwala ibabane ameko go, kom sem gedageda kubabane.

Luke 22:29

Tuwo Tamagu bogina ivayokoigu yau , e yau nakae avayokoimi komi tokalibúbuna yau taiyao.

Luke 6:20

Yeisu ina tovatotowanayao ipotedi, idigo kana, ‘Avatauwa komi neta kotokai, e komi Yaubada ina bodayauwo bei ikalibubumi, tauna ami dedevina bogina koobabane.

Iyoni 7:48

Tolovina o Parisi kai yaima goi ama taivina amo Tauyana kanumise? Geya tayaamo ae?

Guinuwa 7:2

E kina go Stiveniyana idigo kana, ‘Tamagowo be segowo, konovēgu! Yaubada, Tauyana ina togaga ana ivakaigaga, isowóduwo tubuda Eberamo yaina boi tutayana Mesopotémia goi ikaaiyaka. Moe nava Karani goi geya ilokaseta.

Roma 8:17

E kita natunao, tauna kaga Yaubada boi ikaatotule tomoeeyalina tasiuko Guyau taiyao.

1 Korinta 2:9

go sem geya siyagoiyeta nakae bogina idige kana, ‘Dogoi dedevidi Yaubada ana tomatakoiyao manudi ikatubayasidi. Amo dogoiyadi tomota geya sigitedita, geya sinovedita be nakae geya sinuwedita.’ Aiseya 64:4

2 Korinta 4:15

Bogina koyagoi. Gedagedayadi liliudi moe komi manumi bego Yaubada ina kanuwóiya ibibíbina tomota badabadaidi yaidi; anuwoiyayana bei tomota idi kauyagu ivaituwe. Moe Yaubada ana taimámina manuna.

2 Korinta 6:10

E nakona mama nuwomou go, tuta liliuna kaauyáwana. E nakona katokai go, esaesa mooitamoina kakaiguyauye tomota badabadaidi yaidi. E nakona poyapoya ame goi kai geya konamamo go, yábana konanina liliudi sikaaiyaka yaima.

2 Korinta 8:9

Imi vininabeso itoboine. Ida Tomoya ada kaba gita. Ina kanuwóiya bogina tayagoi bego Tauyana boi mainao toesaesa go, kita manuda ietokai bego kita amo Tauyana ina tokaiyana goi bei taesaesa.

Epeso 1:18

unana nukotomi bogina ikimavadedi. Tauyana bei koyagoidoko, e bei koyagoi kaga kita, Yaubada ina kimasabayao bogina iduuduweda, itoboineda talotutae. Aiyuwoina bei koyagoi ina kaiguyau dedevina toina moe kita ina kimasabayao.

Epeso 3:8

Yau toosobugu kidi Yaubada ina kimasabayao liliudi yaidi goi go, tuwo ame anuwoiyayana iivinigu bei ana kidi Totuyoyowo yaidi goi Guyau ina esaesa nikuunikuna atalavaite

1 Tesalonáika 2:12

Ame nakae: Kakipaiiwolemi, atemi kavapatuupatudi be nakae kakaugeogéona bego kooketoiya nakae Yaubada ina bodao itoboinedi. Ame Yaubadayana iduuduwemi tomoeeyalina goi kosiu.

2 Tesalonáika 1:5

Imi sinapuyadi kiyakiyaya tayamo bego Yaubada ina takínona moe kivaavasaina, tauna bei ivayokoimi kina tomotaimi. Moe pasina ame tuta mouyadi kobaabanedi.

1 Timoti 6:18

Toesaesayadi kuloviinaēdi bego guinuwa dedevidi yaidi siesaesa dōkana, simaatakōi be nakae sikaiiguyāu.

2 Timoti 4:18

Ida Tomoyayana guinuwa goyogoyoidi tamo tamo yaidi goi bei italigeigu be iyavegu imegu yábana goi iyatoigu. Tauyana aba taimámina ame tuta be nakae tuta simamaima! E nakae!

2 Timoti 4:8

Tuwaina, guna vaiwówana bogina ikaaiyaka, ida Tomoya, Tauyana Totakínona kiboobosina, bei ivinigu. Vaiwowanayana moe yau kiboobosigu Yaubada matana goi. Ago yau aguta geya iviniguta, go sem avatauwa neta ina sowoduwoyana siyaledoko, e adi vaiwówana bei ivinidi.

Iberiu 11:26

Ina nuwonúwana neta ina omayamaya ilotowo, moe esaesa gagaina namlieta da Itipita idi esaesa. Bogina koyagoi. Yábana vaiwowonina manuna imasimasi.

Yemesa 1:12

Avatauwa komi neta mou goi kootogaga, e ami dedevina bogina kobabane, unana mouyadi kotogoisavedi. Tauna ami vaiwówana moe yawoimi vau bei kobabane. Moe Yaubada ikatotule kita Tauyana ana tomatakoiyao yaida.

Yemesa 1:16

Taabu tomota sikatuubaūmi, guna kaloyao.

Yemesa 1:19

Guna kaloyao, neta livala ame konuuwaisi, kana, ‘Liliuda tataiyakeka dōkana be mainao tanuwonūwana baige tabóbwara go, egamogamogu tatōto.’

Yemesa 1:9

E komi tonumisa tookaimi kouyawana gagāgasa ame manuna: Yaubada matana goi komi toesaesa imi numisa pasina, e ikilagasimi.

1 Pita 1:4

Ida lotutayana moe kaga Yaubada boi bogina ikatootuledi bei ivinida. Dogoiyadi moe geya sidaureta geya, go sem sikaiyako vata. Goyo geya itoboineyeta ikibaibailidi. Nakae geya sisaosáwala geya. Yábana goi Yaubada iyatoidi, imatakaavatedi kita manuda.

2 Pita 1:11

Neta moe nakae, e Yeisu Guyau, Tauyana ida Tomoya nakae ada Toyava, bei itagonedokoimi ina kalibúbuna vaatayaina goi kosiu.

Nuwogau 2:9

Imi gedageda be nakae imi tokai bogina ayaagoidi. Go geya kada imi numisa goi komi tokai geya, go sem imi numisayana goi komi kooguyau. E nakae aayagoi ami totagiwayayao toinidi sinuwonúwana kadi, ‘Kai , Yaubada ina bodao’ go, moe geya moitamo geya, go sem kidi Kaleya ana totugugunayao!

Nuwogau 21:7

Avatauwa neta sitogaga, moe dogoiyadi bei sibabanedi be nakae yau bei tauyadi idi Yaubada go, tauyadi bei avanatunedi.

Nuwogau 3:18

Tauna akatuliwolemi maavadaina yeu goi yaigu kogimōne bego koetoesaesa. Kwama poowoudi kogimonēdi bego kokotedi, imi pawaku ina omayamaya ana tabodaboda. Mátana ana medisini kogimōne be matami komigīdi bego kogita dókana.