Maki 16:14 - Buki Kimaasabaina

¹⁴ Niga Yeisu ina tovatotowanayao yawou tayamo sikakáika go, matadi goi Yeisu ivataoduwe. Ivataoduwe go, geya idi numisamo pasina be nakae idi dabakasa pasina ibowoidi idigo kana, ‘Komi manakae! Guna taoyamna mlina avataoduwegu sedao yaidi namlieta moe sitalavaite yaimi go, geya konumisedita!’

Maki 16:14 ပူးပေါင်းရင်းမြစ်များ

Madiu 11:20

E niga Yeisu ivatowo tomota asa maniyedi goi ibowoidi. Asayadi goi bogina iguinuwedi. Guinuwayadi toni kasa sigitedi go, geya situgavileta, tauna ibowoidi idigo kana,

Madiu 17:20

E Yeisu kana, ‘Unana geya konumisadokoneta. U, moe pasina go, ame alatuuwokoimi konōve: Neta imi numisa beno kutukutuna nakiyana, itoboinemi ame koyayana kolatuwoko kami, “Kubāla kūna amoko goi”, bei ibala ina amoko goi. Aiyuwoina neta imi numisa beno kutukutunayana nakiyana, e geya kada tayaamo kaga bei imoumou yaimi. [

Madiu 28:17

Katuko kana koyayana goi, e Yeisu kagite, tuwo kasakululu Tauyana yaina go, maniyema kananayuwo.

Maki 7:18

Go kina Yeisu ilatuwokoidi kana, ‘Komi nakae bodayadi, nava nuwomi geya itaporeta? Manakae? Ame geya koyagoiyeta ae? Kaga liliuna taakanidi, geya sinoita nuwoda goi, go sem sisou sina gamoda goi namlieta sisowóduwo sina mosamosa. Tauna moe dogoiyadi geya itoboinedita sikibaibailida.’ Yeisu ina livalayadi ame goi awoinu liliudi ivayokoidi awoinu taagonaidi.

Luke 24:11

Ago kidi korotoyadi vevina idi livala sinove go, idi livalayana ana taiyakeka nakae sikautaotáwana, tuwo geya sinumisedita.

Luke 24:25

Go kina Yeisuyana idigo kana, ‘O komi tamogemogemi nakae dabami sikasa! Neta Yaubada ina tokabivalavalayao idi livala liliudi konumisedi!

Iyoni 20:25

E niga ima, kai tovatotowanayama kalatuwoko kadigo kama, ‘Ida Tomoya bogina kagite!’ ‘Neta nere kiyauna nimana goi agitedi nakae nere kiyaunayana nimagu goi abisikonedi nakae silalumina abisikone, bei anumisa bego moitamo Tauyana kogite. Go geya, bei geya aanumisa’, iya Tomasi kaena.

Iyoni 20:26

Maliyalina ainima aito mlidi aiyuwoina kai Yeisu ina tovatotowanayao kakaaiyaka go, Tomasiyana taiyao. Kakaaiyaka, vada totomna bogina kakatunibode nakae karoke go, Yeisu isowoduwomna, nauyayanaima goi itaoya, idigo kana, ‘Yaubada ina tuboina yaimi!’

Iyoni 20:27

Ikavava, Tomasiyana ilatuwoko kana, ‘Nimam kuyosāle ameko kubisikōne go, nimagu kugitēdi. Nimam kuyosāle silalumigu kubisikōne. Taabu kunaanayūwo, go sem kunumisāmo yau maa yawoigu!’

Iyoni 21:1

Amo dogoiyadi mlidi yaima. Ina vagitakwanayana ame nakae:

Iyoni 21:14

Moe bogina sivato Yeisu tokámasa yaidi ina taoyamna mlina goi isowóduwo kai ina tovatotowanayao yaima.

Guinuwa 1:3

Ame tauyadi yaidi Yeisu ina mamayuyu be ina kámasa mlidi toinina ivagitako kina maa yawoina. Ina taoyamna ana kiyakiyaya badabadaidi ivatulukoidi bei siyagoi kina moitamo maa yawoina ame nakae: Maliyalina poti (40) sinaedi iisowóduwo yaidi go, ina sowoduwoyadi goi ivatuulukoidi manuna.

1 Korinta 15:5

Ina taoyamnayana mlina isowóduwo yaina goi namlieta kidi yawou aiyuwo yaidi goi.

Nuwogau 3:19

Avatauwa komi neta yau amatakooiyemi, akamamaetalimi be asapimi. Tauna kotugavīla go, kopooisōgana imi numisa manuna.