Génesis 37:14 - Wanano OT Portions

¹⁴ To ã ni yʉhtichʉ tʉhoro, to pʉcʉro sehe tirore õ sehe ni yahuha: —Ñʉi wahaga mʉ wahmisʉmare, ã jichʉ yʉ ovejaare. ¿Dohse jijari? Tinare ñʉ pahño, yʉ cahapʉ majare tjua ta, mʉ ñʉrire yʉhʉre yahuga —niha. Tirore yahu pahño tuhsʉ, warocaha. To pʉcʉro to warocachʉ ñʉno, to jiri maca Hebrõ wama tiri maca, tʉ̃ yucʉri watoi jiri macare wijaa wahaha José. Waha, Siquẽ wama tiri macapʉ sʉha tiro.

Génesis 37:14 ပူးပေါင်းရင်းမြစ်များ

Génesis 13:18

à yoa Abrã tói jimariro to jiri wʉhʉ, wahiquina cahsari wʉhʉre wawe na, wahaa wahaha tjoa. Waha, Maré wama tiriro ya nʉcʉcã, encina yucʉri jiri nʉcʉcãpʉ sʉ, tói jia tiha. Tí nʉcʉcã sehe Hebrõ wama tiri maca cahai jia tiha. Tói jiro, tãa mehne dahre mʉori tuhu yoa, Yawere ño payoa tiha.

Génesis 23:19

Baharo to nuchʉri dihta, Macpela wama tiri dihtapʉ jiri tʉ̃tipʉ to namono pjacʉ cjirore duhu cũ, cohãa tiha Abrahã. Macpela sehe tiro Abrahã to jiro, Maré wama tiriro ya nʉcʉcã cahai sʉ̃ mʉja taro caha sehe tjuaa tiha. Tí nʉcʉcã sehe Hebrõ cahacãi tjuaa tiha.

Génesis 23:2

Ticoro Canaã yahpapʉ jiri maca Hebrõpʉ yariaa tiha. Tí maca sehe Hebrõ ni, ti wamoahto panopʉre Quiriate Arba ni, ti pisuri maca jisinia tiha. Ã yoa to namono yariachʉ ñʉno, Abrahã sehe tuaro cahyaro mehne tiia tiha. *****

Génesis 35:27

Baharo Jacobo waharucuro niha tjoa. To pʉcʉro Isaa cahapʉ waharo niha. Tí pjapʉre Isaa sehe Jacobo ñʉchʉno Abrahã cjiro to jiro cjiropʉ jia tiha. Abrahã cjiro to jiri pjapʉre tó sehe cʉ̃ nʉcʉ, Maré wama tiriro cjiro ya nʉcʉcã jia tiha. Ã yoa Isaa to jiri pjapʉ sehere tí nʉcʉcã cjiroihta Maré wama tiri maca jia tiha jʉna. Tí maca sehe Quiriate Arba wama tiri maca cahacãi jia tiha. Tí maca Quiriate Arbare mipʉ macaina sehe “Hebrõ” ni, pisuca.

Génesis 37:15

Tí macai to sʉri baharo, tí maca dʉhtʉ cahai to wahmisʉmare ñʉ maca dʉcaha. Ñʉ maca wahcãno, yoaropʉ tja dihta jiropʉ sʉ, ñʉ maca majare tinibiaha tiro, to wahmisʉmare macano. To ã ñʉ maca tinino watoi, cʉ̃iro masʉno tirore piti boca, õ sehe ni sinitu ñʉha: —¿Yabare ñʉ maca tinii nijari mʉhʉ? —ni sinitu ñʉha.

Génesis 41:16

To ã nichʉ tʉhoro, José sehe õ sehe ni yʉhtiha tirore: —Yʉ mʉ sʉro yahu masieraca yʉhʉ. Cohamacʉ dihta mʉhʉre noano wahahto sehe mʉ cahãrire yahurohca —ni yʉhtiha.

Génesis 43:27

à yoa José sehe tinare õ sehe ni sinitu ñʉha: —¿Ne noamajari mʉsa? ¿“Sã pʉcʉ bʉcʉro quiro” mʉsa niriro, noari? ¿Catisiniri tiro? —ni sinitu ñʉha tinare. To ã ni sinitu ñʉchʉ, pairo sehe José to ni duaare tinapʉre ti ya mehne yahu turiaha.